Likunula 7 - KITABU KITAKATIFU

¹ Inyima wevindu yivi nda lola tsingelosi vane va singiye ku tsikorna tsine tsyelirova, va gimira tsimbuudza tsine tsyelirova ha ta va nembuudza i huudza ku lirova, noku inyanza, noku misala gyosi.

² Kandi nda lola ingelosi wundi yanegira kutwula ivugwe, ya li nomuhuri gwa Nyasaye u veye mwoyo: ya hanzukira tsingelosi vane nomwoyo munene ava hebwa tsingulu kwononnya lirova nenyanza,

³ na a vola, Mu tononnya lirova, kinga inyanza, kinga misala, kuduka ku tange kuvika muhuri mu bweni bwa vatugwa va Nyasaye wetu.

⁴ Kandi nda hulira hesabu ya yavo ava vikwa muhuri, ya li tsielfu mia na tsielfu makumi gane na tsine, ava vikwa muhuri ku tsihiri tsyosi tsyavana va Israeli:

⁵ Ku ihiri ya Yuda va vikwa muhuri tsielfu likumi na tsiviri; Ku ihiri ya Rubeni tsielfu likumi na tsiviri; Ku ihiri ya Gadi tsielfu likumi na tsiviri

⁶ Ku ihiri ya Aseri tsielfu likumi na tsiviri; Ku ihiri ya Nafitali tsielfu likumi na tsiviri; Ku ihiri ya Manase tsielfu likumi na tsiviri;

⁷ Ku ihiri ya Simeoni tsielfu likumina tsiviri; Ku ihiri ya Levi tsielfu likumi na tsiviri; Ku ihiri ya Isakari tsielfu likumi na tsiviri;

⁸ Ku ihiri ya Zebuloni tsielfulikumi na tsiviri; Ku ihiri ya Yosefa tsielfu likumi na tsiviri; Ku ihiri ya Benjamini tsielfu likumi na tsiviri; va vikwa muhuri.

⁹ Inyima wevindu yivi nda lola, kandi, henza, kiduma kinene kyomundu a vula ho u nyala kuvalidza, ki twula ku tsihiri tsyosi, noku tsimpya tsyosi, noku vandu vosi noku tsinimi tsyosi, kya singira imbiri wentebe nembiri wo Mwana Weligondi, va vikwa tsingubo tsindavu kandi va li namatu gamakindu mu makono gavo;

¹⁰ va hanzuka nomwoyo munene, ni va vola Ubuhonnyi nobwa Nyasaye wetu wikaye ku intebe, nobwo Mwana Weligondi.

¹¹ Kandi tsingelosi vosi va singira ku nyasi kwentebe nokwa vakulundu nokwevilombe vi veye mwoyo vine; navo va gwa mammama imbiri wentebe nokusigamira Nyasaye,

¹² ni va vola, Amini: bugasu, nobukumi, nobugeeri, nelisantidza nelidzominywa, nelinyala, netsingulu, vi ve ku Nyasaye imihiga nemihiga. Amini.

¹³ Kandi mulala ku vakulundu ya tivula na a mbolera, Yava ava vikwa tsingubo tsindavu ni va nga bwaha, kandi va twula haliha?

¹⁴ Na inze nda mu volera, Mwami wange, ive u manya. Naye ya mbolera, Yava nivo va twula mu kivi kinene yikyo, navo vogidzi tsingubo tsyavo mu masahi go Mwana Weligondi, nokutsikola tsi ve tsindavu.

¹⁵ Kigira yaga va singiye imbiri wentebe ya Nyasaye; nokumutumekira mbasu nobudiku mu litempeli lilye: kandi uyu wikaye ku intebe a la singeridza lihema lilye kuvo.

¹⁶ Va la vula kulola inzala kandi, kandi si va la va nobuluhu kandi; kandi liuva li la vula kuvasamba, kali uluya lwosi:

¹⁷ kigira Mwana Weligondi u veye hagati hentebe a la va mwayi wavo, a la vimirira kuduka ha madzi gelivamwoyo ga senukanga: na Nyasaye a leya maliga gosi mu tsimoni tsyavo.