Likunula 5 - KITABU KITAKATIFU

¹ Kandi nda lola mu mukono mulungi gwa uyu wikaye ku intebe, kitabu kya ng'odwa mugati nokwigulu, kya vikwa mihuri gyitano na gyiviri.

² Kandi nda lola ingelosi wetsingulu ni ya hanzuka no mwoyo munene, na a teva Ibwaha u dukani kukunula kitabu yiki nokuboholola mihuri gyakyo?

³ Kandi si ha li nomundu ku vosi migulu, kinga ku lirova, kinga isi welirova wa nyala kukunula kitabu yikyo, kinga kukihenza.

⁴ Na inze nda lira ligali kigira mundu si ya loleka u duka kukunula kitabu yikyo kinga kukihenza.

⁵ Nomundu mulala ku vakulundu yavo ya mbolera, U ta lira mba; henza uyu King'ang'a u veye wehiri ya Yuda, Kitinya kya Daudi, u guuti a duke kukunula kitabu nokuboholola mihuri gyakyo gyitano na gyiviri.

⁶ Kandi nda lola hagati hentebe na hagati he vilombe vi veye mwoyo vine, na hagati havakulundu makumi gaviri na vane, Mwana Weligondi u singiranga, kuli wiiteywi, u veye netsinziga tsitano na tsiviri, netsimoni tsitano na tsiviri, tsi veye Roho vatano na vaviri va Nyasaye, va tumeywi va tsie mu lirova lyosi.

⁷ Yadza na a vugula kitabu mu mukono mulungi gwa uyu wikaye ku intebe.

⁸ Kandi lwa ya vugula kitabu zana, vilombe vi veye mwoyo vine navakulundu makumi gaviri na vane va gwa imbiri wo Mwana Weligondi, sa mulala ya li nobukana nevituva vyethahabu vizula kimuli, ki veye lisaala lyavatakatifu.

⁹ Kandi vimba lwimbo luhya, ni va vola, U dukani kuvugula kitabu nokuboholola mihuri gyakyo: kigira wiitwa, nokugulira Nyasaye namasahi gogo avandu ku luhya lwosi, noku tsinimi tsyosi, noku vandu vosi, noku tsihiri tsyosi,

¹⁰ nokuvakola ubwami navasalisi ku Nyasaye wetu; kandi va lameha ku lirova.

¹¹ Nda lola, kandi nda hulira mwoyo gwetsingelosi vanyingi ku nyasi kwentebe, nokwevilombe vi veye mwoyo noku vakulundu; livalidzwa lyavo lya li tsielfu likumi hali tsielfu likumi, tsielfu tsyetsielfu;

¹² ni va vola nomwoyo munene, U dukani Mwana Weligondi wiiteywi kuvugula linyala nobutugi, nobugeeri, netsingulu, nelidzominywa, nobukumi nobugasu.

¹³ Kandi vilombe vyosi vi veye migulu, nevi veye ku lirova, nevi veye isi welirova, nevi veye ku inyanza, kandi vindu vyosi vi veye rnuvyo, nda vi hulira vi vola, Ku uyu wikaye ku intebe, kandi ku uyu Mwana Weligondi, ubugasu yibu, nelidzominywa yilyo, nobukumi yibwo, nobwamehi yibwo kuduka mihiga nemihiga.

¹⁴ Nevilombe vi veye mwoyo vine vya vola, Amini. Navakulundu va gwa hasi nokusigamira.