Likunula 4 - KITABU KITAKATIFU

¹ Inyima wevindu yivi nda lola kandi henza, kiliango kigulika migulu, nomwoyo gwokutanga gwa nda hulira, kuli kisiliva gu volerana na inze, mulala a vola, Yanegira yino, na inze nda ku mannya ivindu vi la duka lwenyima.

² Nonoho nda li mu Roho; kandi henza, intebe ya vikwa migulu, nomulala yikala ku intebe;

³ kandi uyu wikala ku ya li neligondo kuli ligina lya ijasipi nelya isadio: kandi kya li ho kisahi kya kumbiridza intebe, kya li neligondo lyezumaradi.

⁴ Ka ndi tsintebe makumi gaviri na tsine tsya kumbiridza intebe: kandi ku tsintebe zana avakulundu makumi gaviri na vane vikala ku, ava vikwa tsingubo tsindavu; kandi ku mitwe gyavo tsitaji tsyethahabu.

⁵ Kandi uluheni, nemyoyo, netsinkupa vya twula ku intebe. Kandi tsitaya tsitano na tsiviri tsyomuliru tsyaaka li imbiri wentebe, tsi veye Roho vatano u na vaviri va Nyasaye;

⁶ kandi imbiri wentebe kya li ho kuli inyanza yechupa kuli ubulengeru; kandi hagati hentebe, noku inyasi kwentebe vya li ho vilombe vi veye mwoyo vine, vizula tsimoni imbiri nenyima.

⁷ Kandi kilombe kyokutanga kya fwanana neking'ang'a, nekilombe kya kaviri kya fwanana nekimoli, nekilombe kya kavaka kya li nelifwana lyommoni kuli mundu, nekilombe kya kane kya fwanana nendidzu i buluka.

⁸ Kandi vilombe vi veye mwoyo vine, sa kilala kuvyo kya li namavaha gatano na lilala, navyo vizula tsimoni hosi nomugati: navyo si vi sosanga mbasu nobudiku, vi volanga, Mutakatifu, mutakatifu, mutakatifu, Mwami Nyasaye, Wanyala Vyosi, wa li ho, no veye ho, no udzanga.

⁹ Kandi vilombe vi veye mwoyo lwa vi li ha uyu wikaye ku intebe ubukumi, nelidzominya, nelisantidza uyu u veye mwoyo mihiga nemihiga,

¹⁰ avakulundu makumi gaviri na vane va la gwa imbiri wa uyu wikaye ku intebe, nokusigamira uyu u veye mwoyo mihiga nemihiga, nokuta hasi tsitaji tsyavo imbiri wentebe, ni va vola,

¹¹ Ive u dukani, Mwami wetu na Nyasaye wetu, kuhebwa ubu kumi yibu nelidzominywa yili nelinyala yili: kigira ive wa lomba vindu vyosi, kandi kigira ubulaliri bubwo vya li ho, kandi vya lombwa.