Likunula 3 - KITABU KITAKATIFU

¹ Kandi u ng'odere ingelosi welivugana li veye mu Saride. Yivi nivyo vya uyu u veye na Roho vatano na vaviri va Nyasaye, netsing'ereng'ani tsitano na tsiviri, a volanga: Mmanya miyinzi gyigyo, u veye nelieta lyokuva mwoyo, na ive u kudzi.

² U ve muhenzereri u singeridze vindu vi tigaye vyenyanga kukudza: kigira si ndola miyinzi gyigyo kuva midukanu imbiri wa Nyasaye wange.

³ Kunangwa widzulitse kuli wa vugula, kandi kuli wa hulira; u linde, nokweganira. Kunangwa niva nu u vula kulinda, ndadza kuli mwivi, na ive u la vula kumanya isaa ya ndidza ku ive.

⁴ Navutswa u veye nameta makekeke mu Saride ava vula kuvika tsingubo tsyavo mu kifwabwi: navo va la genda halala na inze ni viviki tsindavu; kigira va dukani.

⁵ Uyu u guutanga a la vikwa ndi tsingubo tsindavu; na inze si ndeya lieta lilye mba mu kitabu kyelivamwoyo, kandi ndeyama lieta lilye imbiri wa Dada wange, kandi imbiri wetsingelosi veve.

⁶ Uyu u veye nogutu, a hulire aga Roho a voleranga mavugano.

⁷ Kandi u ng'odere ingelosi welivugana li veye mu Filadelfia. Yivi nivyo vya uyu u veye mutakatifu, noweligali, kandi u veye nolufunguo lwa Daudi, nowigulanga kandi si ha veye nomuhani, no hananga kandi si ha veye nowigula, a volanga:

⁸ Mmanya miyinzi gyigyo (henza, mmali kukuha kiliango kyalamu, kandi si ha veye no nyala kuhana), u veye netsingulu tsinkekeke, kandi wa linda likuva lyange, kandi wa vula kwambakana lieta lyange.

⁹ Henza, nku hedzanga avelivugana lya Setani, ava volanga va veye Avayuda, navutswa si va li ndiyo, navutswa va vehanga; henza, nda va kola vadze kukusigamira ha virenge vivyo, nokumanya inze nku yanzi.

¹⁰ Kigira wa linda likuva lyobwikudziri bwange inze kandi nda ku linda u twule ku isaa yokugeridzwa, isaa i li duka ku lirova lyosi, kugeridza ava menyanga ku lirova.

¹¹ Nzidza bwangu: u gumire budinyu kya u veye nakyo, a ta va ho mulala a hile itaji yoyo.

¹² Uyu u guutanga nda mu kola itiru mu litempeli lya Nyasaye wange, kandi si a la tsia kyova kandi mba: kandi nda ng'oda kuye lieta lya Nyasaye wange, nelieta lyelidala lya Nyasaye wange, Yerusalemi lihya, liikanga kutwula migulu ku Nyasaye wange, kandi nda ng'oda kuye lieta lyange, inze mwene, lihya.

¹³ Uyu u veye nogutu, a hulire aga Roho a voleranga mavugano.

¹⁴ Kandi u ng'odere ingelosi welivugana li veye mu Laodikia. Yivi nivyo vya u veye Amini, mulolekidzi musuuvirifu noweligali, mutangi welilomba lya Nyasaye, a volanga

¹⁵ Mmanya miyinzi gyigyo, si u veye nobukindu kinga kihyu: nkano wa li ubukindu kinga kihyu.

¹⁶ Kunangwa kigira u veye noluya, kandi si u veye nekihyu kinga nobukindu, nda ku tudza u twule mu munwa gwange.

¹⁷ Kigira u vola, Inze mbeye mutugi, kandi nyoye ubutugi, kandi si mbeye nelyenya kindu; kandi si u manya u veye mudambi, kandi u veye muyingu nomudaka nomuboku nomwere:

¹⁸ nku volera u gule ku inze ithahabu i siyeywi nomuliru, u duke kugwa mutugi; netsingubo tsindavu, u duke kwivika tsisoni tsyekyahonyo kyikyo tsi vule kulang'aminywa; kandi u gule ku inze, lunyasi lwokuvaka tsimoni tsitsyo, u duke kulola.

¹⁹ Ku vosi ava nyanzi, mba gayanga nokuvaha amageli: kunangwa u ve nobugulu nokweganira.

²⁰ Henza, nsingiye ha kiliango nzigulihidzanga: mundu ku vosi na a va na a hulira mwoyo gwange nokunzigulira kiliango, ndingira ha a veye, kandi nda lia halala naye, naye halala na inze.

²¹ Uyu u guutanga, kuli inze nda guuta, nokwikala halala na Dada mu intebe, nda mu ha yikale halala na inze mu intebe yange.

²² Uyu u veye nogutu, a hulire aga Roho a voleranga mavugano.