Biblia Todo Logo
Bìoball air-loidhne

- Sanasan -

Likunula 21 - KITABU KITAKATIFU

1 Kandi nda lola ligulu lihya nelirova lihya: kigira ligulu lyokutanga nelirova lyokutanga li mali kuvita; kandi inyanza si i veye ho kandi.

2 Kandi nda lola lidala litakatifu, Yerusalemi lihya, liikanga kutwula migulu wa Nyasaye li tegekeywi kuli mwiha wesiahiye musatsa wewe.

3 Kandi nda hulira mwoyo munene gu twula mu intebe, ni gu vola, Henza, ubumenyo bwa Nyasaye bu veye halala navandu, kandi a la menya navo, navo va la va avandu veve, kandi Nyasaye mwene a la va halala navo, Nyasaye wavo:

4 kandi a leya vosi sa mulala amaliga mu tsimoni tsyavo; nelikudza si li la va ho kandi; kandi lisyoma, nelilira, nobusaliri, si vi la va ho kandi: vindu vyokutanga vi mali kuvita.

5 Kandi uyu wikaye ku intebe ya vola, Henza, inze nkola vindu vyosi vi ve vihya. Kandi ya mbolera, Ng'oda: kigira amakuva yaga ga veye agobusuuvirifu nageligali.

6 Kandi ya mbolera, Ga koleywi. Inze mbeye Alfa na Omega, litanga nekiheri. Inze nda ha wobuluhu kisenukiru kyamadzi gelivamwoyo, a nwe ku vutswa.

7 Uyu u guuta a la lia vindu yivi; kandi nda va Nyasaye wewe, naye a la va mwana wange.

8 Navutswa ava veye nobutii, nava ta suuvira, nava vihiriridzi, naviiti, navaheyi, navakumu, nava sigamira misambwa, navobubehi vosi, lisanga lyavo li la va mu inyanza i sambanga muliru nekibiridi; i veye likudza lyakaviri.

9 Yadza mulala ku tsingelosi vatano na vaviri ava li nevituva vitano na viviri, vizula maduywa gatano na gaviri gekiheri; kandi ya volerana na inze, na a vola, Hamba yino, nda ku mannya mwiha, mukali wo Mwana Weligondi.

10 Kandi ya ngingira mu Roho kumbila mu kigulu kinene kandi kitambi, kandi ya mmannya lidala yilyo litakatifu Yerusalemi, liika kutwula migulu wa Nyasaye:

11 lya li nobukumi bwa Nyasaye: ubung'ereng'anu bwalyo bwa li kuli ligina lilahi ligali kuli bweligina lyejasipi li siye ku kuli ubulengeru:

12 lya li nelidigi linene kandi litambi; kandi lya li neviribwa likumi na viviri, kandi ha viribwa ha li netsingelosi likumi na vaviri; kandi ameta ga ng'odwa ku, aga li ameta getsihiri likumi na tsiviri tsyavana va Israeli:

13 ha luvega lwevugwe ha li neviribwa vivaka; kandi ha luvega; lwa ka sikasini viribwa vivaka; kandi ha luvega lwa kusini viribwa vivaka; kandi ha luvega lwemadioli viribwa vivaka.

14 Kandi lidigi lyelidala zana lya li nemise likumi na gyiviri, kandi ku mise ga li ku ameta likumi na gaviri gavatumwa likumi na gaviri vo Mwana Weligondi.

15 Kandi uyu wa volerana na inze ya li nekyo kugera kidundu kyethahabu kyokugera lidala, neviribwa vyalyo, nelidigi lyalyo.

16 Kandi lidala li veye netsimbega tsine, kandi ubutambi bwalyo bu leng'ana nobubambalalu bwalyo: kandi ya gera lidala neki dundu, tsimaili tsya duka elfu indala na tsimia tsitano: ubutambi bwalyo nobubambalalu bwalyo nobudiguluku bwalyo bwa leng'ana.

17 Kandi ya gera lidigi lyalyo, lya duka mikono mia indala namakumi gane na gyine, kigero kyomundu, ki veye kyengelosi uyu.

18 Kandi lyombakwa lyelidigi lyalyo lya li lyejasipi: kandi lidala zana lya li lyethahabu inzere, kuli ubulengeru bwere.

19 Imise gyelidigi gyelidala gya siafwa namagina tsing'ano tsyosi tsindahi. Muse gwokutanga gwa li ijasipi; gwa kaviri isafiro; gwa kavaka ikalkedoni; gwa kane zumaradi;

20 gwa katano sardaniki; gwa katano na mulala isadio; gwa katano na gyiviri ikerusoliso; gwa katano na gyivaka iberulo; gwa katano na gyine itopazi; gwelikumi ikerusopraso; gwelikumi na mulala kuakinso; gwelikumi na gyiviri amesusito.

21 Kandi viribwa likumi na viviri vya li tsilulu likumi na tsiviri; kiribwa sa kilala kya li ilulu indala; kandi inzira yelidala ya li yethahabu inzere, kuli ya li yobulengeru.

22 Kandi si nda lola mu litempeli: kigira uyu Mwami Nyasaye Wanyala Vyosi, kandi uyu Mwana Weligondi, va veye litempeli lyalyo.

23 Kandi lidala zana si li veye nelyenya liuva, kinga mweli, okwaaka kulyo: kigira ubukumi bwa Nyasaye bwa li lavidza, kandi itaya yalyo i veye Mwana Weligondi.

24 Kandi tsihiri tsi la genda mu bulavu bwalyo: navami velirova va leta ubukwni bwavo mulyo.

25 Kandi viribwa vyalyo si vi li hanwa mba mbasu (kigira si ha la va ho nobudiku):

26 kandi va la leta ubukumi nelidzominya lyetsihiri mulyo:

27 kandi ku vyosi ki veye kinyaviru, kandi uyu u kolanga livihiriridza nobubehi si va lingira mba: navutswa yava ava ng'odua mu kitabu kyelivamwoyo.

©Bible Society of Kenya, 1967

Bible Society of Kenya
Lean sinn:



Sanasan