Likunula 19 - KITABU KITAKATIFU

¹ Inyima wevindu yivi nda hulira kuli mwoyo munene gwekiduma kinene migulu, ni va vola, Aleluya; Ubuhonnyi, nobukumi, netsingulu, vi veye vya Nyasaye wetu:

² kigira likalaga lilye li veye lyeligali kandi lilungi; kigira u kalagiye muheyi munene, uyu wa li na a gotidza lirova nobuheyi bwibwe, kandi u vanzi kisalya kyamasahi gavatugwa veve mu mukono gwigwe.

³ Kandi hali kaviri va vola, Aleluya. Kandi mwoki gwigwe gwa vuya mihiga nemihiga.

⁴ Kandi avakulundu makumi gaviri na vane ne vilombe vi veye mwoyo vine va gwa hasi nokusigamira Nyasaye wikaye ku intebe, ni va vola, Amini; Aleluya.

⁵ Kandi mwoyo gwa twula ku intebe, ni gu vola, Mwidzominye Nyasaye wetu, mwinye avatugwa veve vosi, na mwinye ava mu tidzanga, avakekeke navanene.

⁶ Kandi nda hulira mwoyo kuli mwoyo gwekiduma kinene, kandi kuli mwoyo gwamadzi manene, kandi kuli mwoyo gwetsinkupa tsyetsingulu, ni gu vola, Aleluya: kigira Mwami Nyasaye wetu, Wanyala Vyosi, yamehanga.

⁷ Ku yanze nokusangala ligali, kandi ku mu kuminye: kigira kiserero kyo Mwana Weligondi ki duki, kandi mukali wewe wetegeki.

⁸ Kandi ya hebwa yivike ingubo yekatani indahi, ing'ereng'anu ne siye ku: kigira ikatani indahi i veye vikolwa vilungi vyavatakatifu.

⁹ Kandi ya mbolera, U ng'ode, Va veye nobugasu ava langeywi va tsie mu lilia lyekiserero kyo Mwana Weligondi. Kandi ya mbolera, Yaga ga veye amakuva ageligali ga Nyasaye.

¹⁰ Kandi nda gwa hasi ha virenge vivye kumusigamira. Naye ya mbolera, Henza, u ta kola mba; inze mbeye wakyo halala na ive navamwavo vovo ava gumira lilolekidza lya Yesu: U sigamire Nyasaye: kigira lilolekidza lya Yesu li veye roho gwobuprofeti.

¹¹ Kandi nda lola ligulu ni ligulika; kandi henza, iparasi indavu, na uyu wa nina ku a langwa Musuuvirifu no Weligali; kandi mu bulungi a kalaga nokukola lihe.

¹² Kandi tsimoni tsitsye tsi veye kuli lumemo lwomuliru kandi ku mutwe gwigwe tsi veye ku tsitaji tsinyingi; kandi a veye nelieta li ng'odeywi li ta veye ho nomundu u li manya, na a ta li uyu mwene.

¹³ Kandi u vikeywi ingubo yuhirwa masahi: nelieta lilye li langwa Inkuva ya Nyasaye.

¹⁴ Namahe gavasi kari ga veye migulu ava nina ku tsiparasi tsindavu, nokuvikwa ingubo yekatani indahi, nendavu ni siye ku, ga mu londa.

¹⁵ Kandi kivavi kyogi ki twula mu munwa gwigwe, a duke kuduya tsihiri nakyo: kandi a la vameha nempimbo yekivya: kandi a duvaga kinu kyewaini yobululu bwobutima bwa Nyasaye, Wanyala Vyosi.

¹⁶ Kandi a veye nelieta li ng'odeywi ku ingubo yeye nokwitango lilye, MWAMI WAVAMI NOMUNENE WAVANENE.

¹⁷ Kandi nda lola ingelosi mulala a singiye ku liuva; kandi ya hanzuka nomwoyo munene, na a volera manyonyi gosi aga bulukanga hagati hobwerefu, Hambi mu vugane halala ku lilia linene lya Nyasaye;

¹⁸ mu duke kulia tsinyama tsyavami, netsinyama tsyavanyampara, netsinyama tsyavandu vetsingulu, netsinyama tsyetsiparasi, netsya yavo avikala ku kandi tsinyama tsyavandu vosi avene luhya navatugwa, kandi avakekeke navanene.

¹⁹ Kandi nda lola inyama, navami velirova, namahe gavo, va vugani halala kukola lihe ku uyu wikaye ku iparasi, kandi ku mahe gege.

²⁰ Kandi inyama ya gumirwa, no muprofeti wobubehi wa kola vilolekidzu imbiri wewe, vya ya gadira yavo ava vugula kyokumanyirwa kyenyama, navo ava sigamira kifwananyi kikye: navo vaviri va tebwa, na va veye mwoyo, mu inyanza yomuliru yaakanga nekibiridi:

²¹ navatigaye viitwa nekivavi kya uyu wikaye ku iparasi, nakyo kya twula mu munwa gwigwe: namanyonyi gosi giguta tsinyama tsyavo.