Biblia Todo Logo
Bìoball air-loidhne

- Sanasan -

Likunula 18 - KITABU KITAKATIFU

1 Inyima wevindu yivi nda lola ingelosi wundi yika kutwula migulu, wetsingulu tsinene; kandi lirova lyosi lya lavidzwa nobukumi bwibwe.

2 Kandi ya hanzuka no mwoyo gwetsingulu, na a vola, Babuloni linene, li gwiye, li gwiye, nokugwa kivuganiru kyamademone, habuhambe bwa roho gyosi mudamano, nobuhambe bwamanyonyi madamano na gokuvihiririhidza.

3 Kigira tsihiri tsyosi tsi gwiye kigira iwaini yobuheyi bwalyo; kandi avami velirova va heye nalyo, kandi avelirova ava kolanga likirannya va kolwa avatugi ku tsingulu tsyelivula kwiigalira lyalyo.

4 Kandi nda hulira mwoyo gundi gu twula migulu, gu vola, Avandu vange mu twule mulyo, mu vule kuva nelisanga nalyo mu bwoni bwalyo, kandi mu vule kuvugula ku liduywa lyalyo:

5 kigira ubwoni bwalyo bu vungi kuduka migulu, kandi Nyasaye yidzuliye ubudamano bwalyo.

6 Li hebwe kuli lya haana, kandi mu li he hali kaviri kuvita miyinzi gyalyo: mu kikombe kya lya tsukannya mu li tsukannyire mu hali kaviri.

7 Ku liidzominya lyalyo, noku limenya lyalyo bugira kwilinda, mu li he ubusaliri neliverera kule ng'ana na yaga: kigira livola mu mwoyo gwalyo, Inze mmenya mu bwami, kandi si mbeye mukunzakali, kandi si nda va neliverera kali hakuzu.

8 Kigira yaga liduywa lyalyo li la duka ku lidiku lilala, nalyo li veye likudza, neliverera nenzala; kandi li la sambwa nomuiiru ligali; kigira Mwami Nyasaye wa li kalagira a veye netsingulu.

9 Kandi avami velirova, ava heya naye nava menya naye bugira kwiigalira, va la lira nokusyoma inyinga va lola mwoki gwelisambwa lyalyo,

10 va singiye ihale kigira ubutii bwobu saliri bwalyo, ni va vola, O bayaye bayaye, lidahl linene, Babuloni, lidala lyetsingulu kigira ku isaa indala likalagirwa lilyo li duki.

11 Kandi avakirannyi velirova va liranga nokulisyomera, kigira si ha veye nomundu kandi u gula vindu vyavo;

12 vindu vyethahabu, nevyefetha, nevyamagina malahi, nevyalulu, nevyetsingubo tsyekatani inda hi, nevyekiforosadi, nevyetsingubo tsinzesereru, nevyetsinzakanyu; nevyemisala gyosi gyi funya mwayu, kandi viju vyosi vya lombwa amino genzogu, kandi viju vyosi vya lombwa nomusala mulahi ligali, nevyomugasa, nevyekivya, nevya marimari;

13 nevyomudalasini, nevyaliki, nevyekimuli, nevyamaguta, nevya ubani, nevyaiwaini, nevyamaguta, nevyobusie bunyuki, nevyengano, nevyetsing'ombe, nevyamagondi, nevyetsiparasi, nevyamagari gobulwani, nevyavatugwa, nevyemyoyo gyavandu.

14 Kandi makuyu gomwoyo gugwo gwa kayirangwa ga twuli ku ive, kandi vindu vyosi vyobunolu nevyobulahi vi divi kutwula ku ive, kandi avandu si va li vi nyola kandi mba.

15 Avakirannyi vevindu yivi ava lya kola avatugi, va la singira ihale kigira ubutii bwobusaliri bwa lyo nokulira nokusyoma;

16 ni va vola, O bayaye, bayaye, lidala linene yilyo, lya vikwa tsingubo tsyekatani indahi, netsyekiforosadi, netsinzaka nyu, nokulombwa nethahabu, na magina malahi, na lulu

17 kigira ku isaa indala ubutugi ubunene ndi bu koleywi hatswa. Kandi avanene vosi vobwato kandi vosi avelemanga nobwato hosi, navamadzi, navosi ava nyola vindu vyavo ku inyanza va singira ihale,

18 kandi va hanzuka lwa va lola mwoki gwelisa mbwa lyalyo, ni va vola, Lidala ki li veye kuli lidala linene yili?

19 Kandi va vika uluguki ku mitwe gyavo, ni va hanzuka ni va lira nokusyoma, ni va vola, O bayaye, bayaye, lidala linene, mulyo vosi ava li nobwato bwavo ku inyanza, va kolwa avatugi kigira ubulahi bwalyo kigira ku isaa indala li koleywi hatswa.

20 Mu sangale kulyo, ive ligulu, navatakatifu, navatumwa, navaprofeti; kigira Nyasaye u vanzi kisalya kyenyu kulyo.

21 Kandi ingelosi wetsingulu ya ginga ligina kuli lugina lunene, na a li ta mu inyanza, na a vola, Ndi neligwa linene Babuloni lidala linene li la tebwa hasi, kandi li la vula kuloleka ligali kandi.

22 Kandi myoyo gya va kupanga ubukana, navi mbanga tsinyimbu, na va kupanga malere, na va kupanga kisiliva, si gyi li hulirwa mu ive kandi mba; kandi avasidza vosi, ku busidza bwosi, si va li loleka mu ive kandi mba; kandi mwoyo gwolugina si gu li hulirwa mu ive kandi mba;

23 kandi ubulavu bwetaya si bu lyaaka mu ive kandi mba; nomwoyo gwosereye nogwomwiha si gu li hulirwa mu ive kandi mba; kigira ava kirannyanga mu ive va li avanene velirova; kigira tsihiri tsyosi tsya gadwa nobukumu bubwo.

24 Kandi amasahi gavaprofeti nagavatakatifu naga vosi aviitangwa ku lirova, ga loleka mulyo.

©Bible Society of Kenya, 1967

Bible Society of Kenya
Lean sinn:



Sanasan