Likunula 16 - KITABU KITAKATIFU

¹ Kandi nda hulira mwoyo munene gu twula mu litempeli, ni gu volera tsingelosi vatano na vaviri, Mu tsie mwagulule vituva vitano na viviri vyobutima bwa Nyasaye ku lirova.

² Kandi uyu wokutanga ya tsia, ni yagulula kituva kikye ku lirova; nakyo kya gwa lwangaala ludamano ligali ku vandu ava li nekyokumanyirwa kya uyu inyama, ava sigamira kifwananyi kikye.

³ Kandi wa kaviri yagulula kituva kikye ku inyanza, nakyo kya gwa amasahi kuli agomukudzu; na vyosi vya li mwoyo vya kudza, vindu vya li mu inyanza.

⁴ Kandi wa kavaka yagulula kituva kikye ku migera noku visenukiru vyamadzi; navyo vya gwa masahi.

⁵ Kandi nda hulira inge losi wamadzi, na a vola, Ive u veye Mulungi, u veye ho nowa li ho, ive Mutakatifu, kigira wa kalaga ndiyo:

⁶ kigira va sundula masahi gavatakatifu nagavaprofeti, kandi ive u mali kuvaha amasahi kunwa: va dukani nago.

⁷ Kandi nda hulira bwali bu vola, Yee, O Mwami Nyasaye, Wanyala Vyosi, li veye lyeligali nelilungi likalaga lilyo.

⁸ Kandi wa kane yagulula kituva kikye ku liuva; nalyo lya hebwa lisamba avandu nomuliru.

⁹ Kandi avandu va sambwa noluhya lunene: kandi va nyega lieta lya Nyasaye u veye netsingulu tsyamaduya yaga; kandi si veganira kumuha lidzominya.

¹⁰ Kandi wa katano yagulula kituva kikye ku intebe ya uyu inyama; kandi ubwami bwibwe bwa kolwa kisundi; kandi va nyanya tsinimi tsyavo kigira ubusaliri,

¹¹ kandi va nyega Nyasaye womigulu kigira ubusaliri bwavo kandi kigira lwangaala lwavo; kandi si veganira ku miyinzi gyavo.

¹² Kandi wa vatano na mulala yagulula kituva kikye ku mugera munene, Farati; kandi amadzi gagwo guma, inzira i lomberwe avami ava twula ebutwuliru bweliuva.

¹³ Kandi nda lola gya twula mu munwa gwoguyoka, nomu munwa gwa uyu inyama, nomu munwa gwomuprofeti wobubehi, roho gyivaka midamano, kuli amakere:

¹⁴ kigira gyi veye roho gyamademone, gyi kolanga vilolekidzu; gya tsia ku vami vomulirova lyosi, kuvavugannya ku bulwani bwelidiku linene lya Nyasaye Wanyala Vyosi.

¹⁵ (Henza, inze nzidza kuli mwivi. A veye nobugasu u lindirira, nokulinda tsingubo tsitsye, gase a la genda kyahonyo, na va lole tsisoni tsitsye.)

¹⁶ Kandi ga va vugannya halala ha hangwa mu lulimi lwa Vahebraina Hari-Magedon.

¹⁷ Kandi wa vatano na vaviri yagulula kituva kikye ku tsimbuudza; nomwoyo munene gwa twula mu litempeli, noku intebe, ni gu vola, Ga mali kukolwa:

¹⁸ vya li ho tsimbeni, nemyoyo, netsinkupa; kandi lya li ho lidegera linene lye lirova, lya li kuli lya vula kuva ho kutwula inyinga avandu va duka mu lirova, kuli wa lya li linene.

¹⁹ Kandi lidala linene lyavukanywa vi twula mu, vidieli vivaka, kandi amadala getsihiri ga gwa: kandi Babuloni lidala linene lidzulitswa imbiri wa Nyasaye, li hebwe kikombe kyewaini yobululu bwobutima bwibwe.

²⁰ Kandi visulu vyosi viruka, nevigulu si vya loleka kandi.

²¹ Kandi imbula inene yamagina, amagina selilala lya leng'ana netalanta, ya twula migulu ni yika ku vandu: kandi avandu va nyega Nyasaye kigira liduya lyembula yamagina; kigira liduya lyayo li veye linene ligali.