Likunula 15 - KITABU KITAKATIFU

¹ Kandi nda lola kilolekidzu kindi migulu, kinene nekyokugennya, tsingelosi vatano na vaviri ava li namaduya gatano na gaviri gekiheri, kigira ubutima bwa Nyasaye bu dukira mugo.

² Kandi nda lola kuli inyanza yechupa ya tsukanywa nomuliru; navo ava guuta ni va twula ku inyama uyu, noku kifwananyi kikye, noku hesabu yelieta lilye, va li va singiye ku inyasi yenyanza yechupa yeyo, va veye nobukana bwa Nyasaye.

³ Kandi vimba ulwimbo lwa Musa mutugwa wa Nyasaye, nolwa Mwana Weligondi, ni va vola, Minene nokugennya gyi veye miyinzi gyigyo, O Mwami Nyasaye, Wanyala Vyosi; tsi veye nobulungi nageligali tsinzira tsitsyo, Ive Mwami wemihiga.

⁴ Ibwaha u vula kutia, O Mwami, nokwidzominya lieta lilyo? Kigira ive u veye mutakatifu weng'ine; kigira tsihiri tsyosi tsi ladza nokusigama imbiri wowo; kigira vikolwa vivyo vilungi vi lang'aminyeywi.

⁵ Kandi inyima wevindu yivi nda lola, litempeli lyelihema lyelilolekidza lyomigulu lya bohololwa:

⁶ kandi tsingelosi vatano na vaviri vamaduya gatano na gaviri va twula mu litempeli, ni va vikeywi ligina lilahi nelyokung'ereng'ana, kandi va li ni va boheywi tsinkova tsyethahabu mu kiritu.

⁷ Kandi kilala ku vilombe vi veye mwoyo vine, kya ha tsi ngelosi vatano na vaviri vituva vitano na viviri vyethahabu, vizula ubutima bwa Nyasaye welivamwoyo mihiga nemihiga.

⁸ Kandi litempeli lizula mwoki gwa twula ku bukumi bwa Nyasaye, noku tsingulu tsitsye; kandi si ha li nomundu wa nyala kwingira mu litempeli, ki luhe ki duke kiheri kyamaduya gatano na gaviri getsingelosi vatano na vaviri.