Likunula 11 - KITABU KITAKATIFU

¹ Inze nda hebwa kidundu ki fwana impimbo: kandi mulala va mbolera, Singira, u gere litempeli lya Nyasaye, nobwali, navo ava sigamira mu.

² Kandi mugidzi gwetempeli u gu leke u ta gu gera mba; kigira tsihiri va hebeywi gwene yigu: nelidala litakatifu va la li duvaga imyeli amakumi gane na gyiviri.

³ Kandi nda va ha avalolekidzi vange vaviri, navo va la profeta amadiku elfu indala netsimia tsiviri na makumi gatano na lilala, ni viviki amagunia.

⁴ Yava va veye misala gyiviri gyemizeituni, nevinara viviri vyetsitaya, vi singira imbiri wo Mwami welirova.

⁵ Kandi ku vosi mundu ni yenya kuvononnya, muliru gu twula mu minwa gyavo nokulia avasigu vavo; kandi ku vosi mundu ni yenya kuvononnya ga mu dukira yiitwe ndiyo.

⁶ Yava va veye netsingulu tsyokuboha ligulu, imbula i vule kukupa mu madiku gobuprofeti bwavo: kandi va veye netsingulu ku madzi kugagirunkannya ga gwe masahi, nokuduya lirova neliduya lyosi tsinyinga tsyosi tsya va yanza.

⁷ Kandi inyinga va li dukidza lilolekidza lyavo, inyama i twulanga mu bogo i la va kolera lihe nokuvaguuta, nokuviita.

⁸ Imibiri gyi kudzi gyavo gyi gona ku inzira yelidala linene, ku lugano lwa roho li langwa Sodoma ne Egepeti, kandi ho Mwami wavo ya bambwa.

⁹ Kandi avalala ku va ndu, noku tsihiri, noku tsinimi, noku tsimpya, va henza imibiri gyavo gyi kudzi, madiku gavaka nenusu, kandi si va bugirira imibiri gyavo gyi kudzi gyi tebwe mu kilindwa.

¹⁰ Kandi yava ava menya mu lirova va yanza kuvo, nokusangala; kandi va haa nirana vihaanwa avene navene; kigira avaprofeti vaviri yavo va li va saliridza ava menya ku lirova.

¹¹ Inyima wamadiku gavaka nenusu, mwika gwokuva mwoyo gu twula ku Nya saye gwingira muvo, navo va singira nevirenge; kandi ubutii bunene bwa gumira yavo ava va lola.

¹² Kandi va hulira mwoyo munene gu twula migulu ni gu va volera, Mwanegire yino. Navo vanegira migulu mu lilesi; kandi avasigu vavo va va lola.

¹³ Kandi mu isaa yiyo lya li ho lidegera lyelirova linene, nekidieli kilala ku likumi vyelidala kya gwa; navandu tsielfu tsitano na tsiviri viitwa mu lidegera yilyo: na vandi va tigala ubutii bwa va gumira, ni vidzominya Nyasaye womigulu.

¹⁴ Ubudamano bwa kaviri bu viti: henza, Ubudamano bwa kavaka bu udzanga bwangu.

¹⁵ Ingelosi wa katano na kaviri ya kupa; gya twula myoyo minene migulu, ni gyi vola, Ubwami bwelirova bu gwiye bwo Mwami wetu, nobwa Kristo wewe: naye a lameha mihiga nemihiga.

¹⁶ Kandi avakulundu makumi gaviri na vane avikala ku tsintebe tsyavo imbiri wa Nyasaye, va gwa mammama nokusigamira Nyasaye,

¹⁷ ni va vola, Ku santidza ive, O Mwami Nyasaye, Unyala Vyosi, u veye ho nowa li ho; kigira u vuguye tsingulu tsitsyo tsinene nokwameha.

¹⁸ Kandi tsihiri tsya li nobutima, kandi ubutima bubwo bwa duka, kandi inyinga yavakudzu va kalagirwa, kandi inyinga yavatugwa vovo avaprofeti va hebwa amadanyi gavo, navatakatifu, navatidzanga lieta lilvo, avakekeke navanene; nokudividza avadividza lirova.

¹⁹ Kandi litempeli lya Nyasaye li veye migulu ligulwa; kandi lisanduku lyamalago gege lya loleka mu litempeli lilye; kandi vya londa tsimpeni, nemyoyo, netsinkupa, nelidegera lyelirova, nembula yamagina manene.