Kyavalevi 24 - KITABU KITAKATIFU

¹ Na Yahova ya volera Musa, na a vola,

² U lage avana va Israeli va ku letere maguta ge mizeituni amere ga duywa ga ve gobulavu, kwaakidza itaya kazozo.

³ Kyova wengubo yokukinga yelilolekidza, mu lihema lyokuvuganira mu, Haruni a la gi lomba kutwula mgolova kuduka mugamba irnbiri wa Yahova kazozo: li la va lilaga lyemihiga nemihiga mu visukululwi vyenyu.

⁴ A la lomba tsitaya ku kinara kilahi kyetsitaya imbiri wa Yahova kazozo.

⁵ Kandi u la vugula ubusie bunyuki, nokwuminya ubukima tsimango likumi na tsiviri: vidieli viviri vyelikumi vyomugero, gu langwa efa, vi la va mu imango indala.

⁶ Na u la tsi vika mu tsimbaso tsiviri, tsitano na indala ku luvaso lulala, na tsitano na indala ku lundi, ku imeza indahi imbiri wa Yahova.

⁷ Na u la vika ku kimuli kyere ku luvaso sa lulala, ki ve ku ubukima kyokwidzulitsa, kihaanwa ki haanirwa nomuliru ku Yahova.

⁸ Ku lidiku lyamasabato gosi a la vika tsimango bulungi imbiri wa Yahova kazozo; li veye lilagana lyemihiga nemihiga kigira avana va Israeli.

⁹ Na tsi la va tsya Haruni na avana veve; na va la tsi lagira mu hatakatifu: kigira tsi veye kuye tsintakatifu ligali mu vindu vi haanirangwa nomuliru ku Yahova ku lilaga lyemihiga nemihiga.

¹⁰ Na mwana womukali wa Israeli, wa dada wewe ya li Muegepeti, ya twula kutsia hagati ha avana va Israeli; na mwana womukali wa Israeli no mundu mulala wa Israeli va duyana mu hokusosa:

¹¹ ma mwana womukali wa Israeli ya nyega Lieta, nokulaama; na va mu leta ku Musa. Na lieta lya mama wewe lya langwa Shelomithu, mwana wa Dibiri, wehiri ya Dan.

¹² Na va mu vika mu buhambe, va duke kuvolerwa likuva li twula ku Yahova.

¹³ Na Yahova ya volera Musa, na a vola,

¹⁴ U twulidze uyu wa laama, u tsie naye kyova wa hokusosa; na yavo vosi ava mu hulira, va vike makono gavo ku mutwe gwigwe, na livugana lyosi li mu lasa na magina.

¹⁵ Na u la volera avana va Israeli, na u vole, Ku vosi uyu u laama Nyasaye wewe a la ginga ubwoni bwibwe.

¹⁶ Na uyu u nyega lieta lya Yahova, ligali a liitwa; livugana lyosi li la mu lasa na magina: na uyu mugeni, kuli uyu wivulwa ku mwinye, lwa a nyega Lieta lya Yahova, ligali a liitwa.

¹⁷ Na uyu u duyanga mundu na a kudza ligali yiitwe.

¹⁸ Na uyu u duyanga mutugu ni gu kudza a la tunga, livamwoyo ku livamwoyo.

¹⁹ Na mundu na a va na a kola wundi mulema; kuli a koli, naye a kolerwe ndiyo:

²⁰ ulugoma nolugoma, imoni nemoni, lino nelino; kuli ya kolera mundu na a va mulema, naye a la tungwa kuli ndiyo.

²¹ Uyu wiitanga mutugu a la tunga: na uyu wiita mundu a liitwa.

²² Mu la va nelilaga lilala lyeng'ine, ku uyu u veye mugeni, kuli ku uyu wivulwa ku mwinye: kigira inze mbeye Yahova Nyasaye wenyu.

²³ Na Musa ya volera avana va Israeli; navo va leta uyu wa laama ni va tsia naye kyova wa hokusosa, nokumulasa namagina. Na avana va Israeli va kola kuli Yahova ya laga Musa.