Kyavalevi 13 - KITABU KITAKATIFU

¹ Na Yahova ya volera Musa na Haruni, nokuvola,

² Mundu na a veye nelivimba ku ligodo lyombiri gwigwe, kinga ligamba, kinga ubufwiriru bwokung'ereng'ana, ni bu gwa lilwala lyobugere mu ligodo lyombiri gwigwe, hene yaho a la letwa ku Haruni musalisi, kinga ku mulala ku avana veve avasalisi:

³ na musalisi a la henza ku lilwala lyeligodo lyombiri: ni i va amaswa aga veye mu bufwiriru ga girunkana kuva malavu, na liloleka lyobufwiriru li tsiye liduku kuvita ligodo lyombiri gwigwe, li veye lilwala lyobugere; na musalisi a la mu henza, nokuvola a veye mudamano.

⁴ Na ubufwiriru bwokung'ereng'ana ni bu veye bulavu mu ligodo lyombiri gwigwe, na liloleka lyabwo ni li ta tsia liduku kuvita ligodo, na amaswa gabwo ni ga ta girunkani kuva malavu, hene yaho musalisi a la mu vika haluvega madiku gatano na gaviri:

⁵ na musalisi a la mu henza ku lidiku lyagatano na gaviri: na henza, naye na a lola lilwala li vuli kumedeka mu ligodo lilye, ma musalisi a la mu vika haluvega madiku gatano na gaviri kandi:

⁶ na musalisi a la mu henza kandi ku lidiku lya gatano na gaviri kandi; ni i va lilwala zana li tangi kuniala, na lilwala li vuli kumedeka mu ligodo lilye mba, hene yaho musalisi a la vola a veye mulahi: li veye ligamba vutswa: naye a logidza tsingubo tsitsye, nokuva mulahi.

⁷ Navutswa ligamba ni li medeka mu ligodo, inyima welyemannya lilye ku musalisi ku linyola litakaswa lilye, a lemannya ku musalisi kandi:

⁸ na musalisi a la henza; na henza, ligamba li medeka mu ligodo, hene yaho musalisi a la vola a veye mudamano: bu veye ubugere.

⁹ Lilwala lyobugere lwa li va ku mundu, a letwe ku musalisi;

¹⁰ na musalisi a la henza; na henza, ni ha veye nelivimba lilavu mu ligodo, ni li girukanyi amaswa kuva malavu, na inyama imbisi ni i veye mu i livimba,

¹¹ bu veye ubugere bwa kale mu ligodo lyombiri gwigwe, na musalisi a la vola a veye mudamano: si a la mu vika ha luvega; kigira a veye mudamano.

¹² Na ubugere ni bu kira kumeda mu ligodo lilye na ubugere ni bu kunika ligodo lyosi lya uyu u veye nelilwala kutwula ku mutwe kuduka ku virenge vivye, kuli musalisi a lola;

¹³ hene yaho musalisi a la henza; na henza, ni i va ubugere bu kuniki mbiri gwigwe gwosi, a la vola a veye mulahi uyu a veye nelilwala yilyo: bu girunkani kuva ubulavu bwosi: a veye mulahi.

¹⁴ Navutswa lwenyama imbisi i loleka kuye, a la va mudamano.

¹⁵ Na musalisi a la henza inyama imbisi, na a vola a veye mudamano: inyama imbisi i veye indamano: bu veye ubugere.

¹⁶ Kinga inyama imbisi ni i girunkana kandi kuva indavu hene yaho a la tsia ku musalisi;

¹⁷ na musalisi a la mu henza; na henza, lilwala ni li girunkanywa kugwa lilavu, hene yaho musalisi a la vola a veye mulahi uyu a veye nelilwala: a veye mulahi.

¹⁸ Na mbiri lwa gu veye nelisunguti mu ligodo lyagwo, na li honi,

¹⁹ na ha lisunguti lya li, ni ha veye nelivimba lilavu, kinga ubufwiriru bwokung'ereng'ana, bwakanyu hakekeke, hene yaho a la bu mannya ku musalisi;

²⁰ na musalisi a la henza; na henza, na liloleka lyaho ni li va nellina lyokutsia liduku mu ligodo lyene, na amaswa gaho ni ga girunkana kuva malavu, hene yaho musalisi a la vola a veye mudamano: bu veye lilwala lyobugere, bwa twulira mu lisunguti.

²¹ Navutswa musalisi na a lola ha zana ni ha veye bugira amaswa malavu kandi si ha veye nellina lyokutsia liduku mu ligodo, navutswa ha tangi kuniala; hene yaho musalisi a la mu vika ha luvega madiku gatano na gaviri:

²² na ni ha va ni ha landa mu ligodo, hene yaho musalisi a la vola a veye mudamano: li veye lilwala.

²³ Navutswa ubufwiriru bwokung'ereng'ana bu singiye ha bwa li, na bu vula kulanda, bu veye imbala yelisunguti; na musalisi a la vola a veye mulahi.

²⁴ Kinga mbiri ni gu veye mu ligodo lyagwo na homuliru gwa samba, na inyama imbisi ya hasambwa ni i gwa ubufwiriru bwokung'ereng'ana bwakanyu hakekeke kinga bulavu;

²⁵ hene yaho musalisi a la henza ha zana; na henza, amaswa gomu ubufwiriru ga girunkani kuva malavu, na liloleka lyaho li veye nellina lyokutsia liduku mu ligodo; bu veye ubugere, bu twuliye ha sambwa: na musalisi a la vola a veye mudamano: li veye lilwala lyobugere.

²⁶ Navutswa musalisi na a henza ha zana, na amaswa malavu si ga li mu ubufwiriru, kandi si ha veye nellina lyokutsia liduku mu ligodo, navutswa ha niaye; hene yaho musalisi a la mu vika ha luvega madiku gatano na gaviri:

²⁷ Na musalisi a la mu henza ku lidiku lyagatano na gaviri: ni ha landa mu ligodo, hene yaho musalisi a la vola a veye mudamano: li veye lilwala lyobugere.

²⁸ Na ubufwiriru ni bu singira ha bu veye, ni bu vula ku landa mu ligodo, navutswa ha niaye; li veye livimba lya ha sambwa, na musalisi a la vola a veye mulahi: kigira i veye imbala yelisambwa.

²⁹ Na mundu musatsa kinga mukali na a va nelilwala ku mutwe kinga ku tsinderu tsitsye,

³⁰ hene yaho musalisi a la henza lilwala zana; na henza liloleka lyalyo ni li va liduku mu ligodo, na amaswa ha zana ga veye malaviriru, na mayerere, hene yaho musalisi a la vola a veye mudamano: bu veye ubufuma, bu veye ubugere bwomutwe, kinga bwetsinderu.

³¹ Na musalisi na a va na henza lilwala zana lyobufuma, na henza, liloleka lyalyo ni li vula kuva neliduku mu ligodo, na amaswa ni ga vula kuva mu mamwamu, hene yaho a la mu vika ha luvega madiku gatano na gaviri:

³² na ku lidiku lya gatano na gaviri musalisi a la henza lilwala; na henza, na ubufuma ni bu vula kumedeka, na amaswa amalaviriru ni ga ta li mu, na liloleka lyobufuma ni li ta veye neliduku mu ligodo,

³³ hene yaho a la vegwa, navutswa ubufuma bu la vula kuvegwa; na musalisi a la mu vika ha luvega madiku gatano na gaviri kandi:

³⁴ na ku lidiku lya gatano na gaviri a la henza bufuma; na henza, bufuma ni bu vula kulanda mu ligodo, na liloleka lyabwo ni li vula kutsia liduku mu ligodo; hene yaho musalisi a la vola a veye mulahi: naye a logidza tsingubo tsitsye, na a la va mulahi.

³⁵ Navutswa bufuma ni bu landa mu ligodo lilye inyima weliva mulahi,

³⁶ kunangwa musalisi a la mu henza; na henza, ubufuma ni bu landa mu ligodo,, musalisi si a lenya amaswa malaviriru; a veye mudamano.

³⁷ Navutswa na a lola bufuma bu leki kulanda, na amaswa mamwamu ni ga mera mubwo; ubufuma bu honi, a veye mulahi: na musalisi a la vola a veye mulahi.

³⁸ Na lwa musatsa kinga mukali a veye nobufwiriru bwokung'ereng'ana, mu ligodo lyombiri, tsimbala tsyo kung'ereng'ana tsindavu;

³⁹ hene yaho musalisi a la henza; na henza, ubufwiriru ni bu veye bulavu hakekeke, lu veye lwiyage, lu siruki ku ligodo; a veye mulahi.

⁴⁰ Kandi lisu lyomundu ni li twula ku mutwe gwigwe, a veye wekyavusu; navutswa a veye mulahi.

⁴¹ Na lisu lilye ni li va ni li twula ku mutwe mbweni, a veye wekyavusu mbweni; navutswa a veye mulahi.

⁴² Navutswa mutwe gwekyavusu, kinga gwekyavusu kyombweni, ni li loleka mu lilwala lilavu na lyakanyu; bu veye ubugere bu twuliye mu mutwe gwigwe gwekyavusu, kinga mu kyavusu kyombweni.

⁴³ Hene yaho musalisi a la mu henza; na henza, livimba lyelilwala ni li va lilavu na lyakanyu mu mutwe gwigwe gwekyavusu, kinga mu kyavusu kyombweni, kuli liloleka lyobugere mu ligodo lyombiri;

⁴⁴ uyu a veye wobugere, a veye mudamano: ligali musalisi a la vola a veye mudamano; lilwala lilye li veye ku mutwe gwigwe.

⁴⁵ Na mugere u veye nelilwala yili, tsingubo tsitsye tsi la tandulwa, na lisu lyoku mutwe gwigwe li la yunguvala, na a la boha munwa gwigwe gwegulu, na a la hanzuka, Mbeye mudamano, mbeye mudamano.

⁴⁶ Ku madiku gosi gelilwala yili li veye muye a la va mudamano; a veye mudamano: a la menya yeng'ine; bumenyo bwibwe bu la va kyova wa hokusosa.

⁴⁷ Na ingubo yelilwala lyobugere li veye muyo, ni i va ni veye ingubo yobwoya bwamagondi, kinga ingubo yekatani;

⁴⁸ ni li va ni li veye mu tsimbusi tsyobulungi, kinga tsyobugika; ni i va ni i veye yekatani, kinga lyobwoya bwamagondi; ni li va ni li veye mu lisero, kinga mu tsyosi tsya lombwa nelisero;

⁴⁹ na lilwala zana ni li va ni li veye nelifwana lyobulimu, kinga lyakanyu mu ingubo, kinga mu lisero, kinga mu tsimbusi tsyobulungi, kinga tsyobugika, kinga mu kyosi kyelisero; li veye lilwala lyobugere, na li la mannywa ku musalisi.

⁵⁰ Na musalisi a la henza lilwala zana, na a la vika ha luvega yikyo ki veye nelilwala kuduka madiku gatano na gaviri:

⁵¹ na ku lidiku lya gatano na gaviri a la henza lilwala zana: na lilwala ni li landa mu ingubo ni bu va mu tsimbusi tsyobulungi kinga tsyobugika, kinga mu lisero, ubutumiki ku bwosi bwelisero li tumikangwa mubwo; lilwala li veye ubugere bululu; i veye indamano.

⁵² Na a la samba ingubo zana ni tsi veye tsimbusi tsyobulungi kinga tsyobugika, mu ingubo yobwoya bwamagondi kinga yekatani, kinga ku kyosi kyelisero, yelilwala li veye mu: kigira bu veye ubugere bululu; ingubo yiyi i la sambwa nomuliru.

⁵³ Na musalisi na a va na a lola na henza, lilwala ni li ta landa mu ingubo, kinga mu tsimbusi tsyooulungi, kinga mu tsyobugika, kinga mu kyosi kyelisero;

⁵⁴ hene yaho musalisi a la haana munwa vogidze yikyo kya li nelilwala, na a la ki vika ha luvega madiku gatano na gaviri kandi:

⁵⁵ na musalisi a la henza, inyima welyogidzwa lyelilwala; na henza, ni li vula kugirunkana lifwana lyalyo, na lilwala li vula kulanda, ki veye kidamano; u la ki samba mu muliru: bu veye bwoneku, ni bu va ni bu veye kyahonyo kyomusi naho kyiguhl.

⁵⁶ Na musalisi na a lola, ni i va lifwana lyelilwala li gehi inyima welyogidza lyalyo, hene yaho a la tandula lilwala li twule mu ingubo, kinga ku lisero, kinga mu tsimbusi tsyobulungi, kinga tsyobugika:

⁵⁷ kandi ni li va ni li loleka mu ingubo, mu tsimbusi tsyobulungi, kinga mu tsyobugika, kinga mu kyosi kyelisero, li veye lilwala li lolekanga: yikyo kyelilwala li veye mu u la ki samba nomuliru.

⁵⁸ Na ingubo kinga tsimbusi tsyobulungi kinga tsyobugika, kinga kyosi kyelisero, kyogidzwe, na lilwala li twula kukyo, hene yaho i logidzwa hali kaviri, na ki la va kilahi.

⁵⁹ Yili ni lilaga lyelilwala lyobugere mu ingubo yobwoya bwamagondi, kinga yekatani, kinga mu tsimbusi tsyobulungi, kinga tsyobugika, kinga mu kyosi kyelisero, kuvola vi veye vilahi, kinga kuvola vi veye vidamano.