Kyavalevi 11 - KITABU KITAKATIFU

¹ Na Yahova ya volera Musa na Haruni, na a va volera,

² Mu volere avana va Israeli, nokuvola, Yivi vi veye vindu vyelivamwoyo vya mu nyala kulia mu tsinyama tsyosi tsi veye ku lirova.

³ Ku tsyosi yiyi i veye netsimbagayu tsiviri, na i litsanga igamula mu tsinyama tsyosi, yiyi mu nyala kulia.

⁴ Navutswa yitsi mu la wla kulia ku yitsi tsi litsanga igamula, kinga ku yitsi tsyetsimbagayu tsiviri: ing'amia, kigira i litsanga igamula, navutswa si i veye netsimbagayu tsiviri mba, i veye indamano ku mwinye.

⁵ Na likinieli kigira, li litsanga igamula, navutswa si li veye netsimbagayu tsiviri mba, li veye lidamano ku mwinye.

⁶ Na kifwoyo, kigira ki litsanga igamula, navutswa si ki veye netsimbagayu tsiviri mba, ki veye kidamano ku mwinye.

⁷ Na impidzi kigira i veye netsimbagayu tsiviri, navutswa Ei i litsanga igamula mba, i veye indamano ku mwinye.

⁸ Mu ta lia inyama yetsinyama yitsyo, kandi mu ta dira ku mibiri mikudzu gyatsyo; gyi veye midamano ku mwinye.

⁹ Ku vyosi vi veye mu amadzi mu nyala kulia yivi: vyosi vi veye na matsutsuya na magamba mu amadzi, na mutsinyanza, na mu migera, yivi mu nyala kulia.

¹⁰ Na vyosi vi ta li na matsutsuya na magamba mu tsinyanza, na mu migera, ku vyosi vi gendanga mu amadzi, na ku vyosi vi veye nelivamwoyo mu amadzi vi veye vidamano ku mwinye,

¹¹ na vi la va vidamano ku mwinye; mu ta lia tsinyama tsyavyo, na mibiri mikudzu gyavyo gyi la va midamano ku mwinye.

¹² Vyosi vi ta li na matsutsuya na magamba, vi veye vidamano ku mwinye.

¹³ Na yaga ku manyonyi ga la va madamano ku mwinye; ga ta libwa, ga veye madamano: indidzu, na indidzu inke, na kihungu,

¹⁴ na live, na lugaka kuli tsingano tsyalwo,

¹⁵ na majikolo kuli tsingano tsyago,

¹⁶ na liudo, na imbugavuga, na iguliraho, na kilidza kuli tsingano tsyakyo,

¹⁷ na likuule, na liluvi, na likuule linene,

¹⁸ na likuule lyetsinziga, na liluvi linene, na isoti,

¹⁹ naligungu, na ling'ang'a kuli tsingano tsyalyo, na lihutihuti na linyinya.

²⁰ Vyosi vi molanga nevirenge vine ni vi veye na tsimbaha, yivi vi veye vidamano ku mwinye.

²¹ Navutswa mu nyala kulia yivi vi veye netsimbaha, na vi molanga nevirenge vine, vi veye na virenge igulu ku tsinduvatiru, vya vi nyala kutumatumira ku lirova;

²² yivi kuvyo mu nyala kuvilia: tsisigi ku tsingano tsyatsyo, na mahaling'ang'a ku tsingano tsyago, na vitale ku tsingano tsyavyo, na makuba ku tsingano tsyago.

²³ Navutswavyosi vya mabaha na vi molanga, na vyevirenge vine vi veye vidamano ku mwinye.

²⁴ Ku yivi mu la gwa avadamano: ku vosi u dira mubiri mukudzu gwavyo a la mudamano kuduka mgolova;

²⁵ na ku vosi uyu u ginga kindu ku mubiri mukudzu gwavyo a logidza tsingubo tsitsye na mwene a la mudamano kuduka mgolova.

²⁶ Ku tsinyama tsyosi yiyi i veye na makumbu, na i ta li netsimbagayu tsiviri, kandi i ta lia igamula, i veye indamano ku mwinye: ku vosi u dira tsinyama yitsi a la va mudamano.

²⁷ Na ku tsinyama tsyosi tsyevirenge vine yitsyi tsi gendanga na makumbu, tsi veye tsindamano ku mwinye: ku vosi u dira mibiri mikudzu gyatsyo a la va mudamano kuduka mgolova.

²⁸ Na uyu u ginga mubiri mukudzu gwenyama yiyo a logidza tsingubo tsitsye, na a la va mudamano kuduka mgolova: tsi veye tsindamano ku mwinye.

²⁹ Na yivi nivyo vi veye vidamano ku mwinye ku yivi vi molanga ku lirova: kisiliminyu, na imbeba, likudu kuli tsingano tsyalyo,

³⁰ na lishamgoma, na imbulu, na lissyagali na luhuyu, na inyambu.

³¹ Yivi nivyo ku vyosi vi molanga, vi veye vidamano ku mwinye: ku vosi uyu u dira kuvyo, lwa vi kudzi, a la va mudamano kuduka mgolova.

³² Na ku vyosi kyekilala ku vindu yivi ki gwira lwa vi kudzi, ki la va kidamano; ni ki va kiju kyomusala, kinga ingubo, kinga lisero, kinga ligunia, ku viju vyosi, kya ki gwa ku, ni ki veye kiju kyemiyinzi ku gyosi, ga ki dukira kuvikwa mu amadzi, na ki la va kidamano kuduka mgolova; kunangwa ki la va kilahi.

³³ Na viju vyobudohi, kya kindu ku yivi ki gwa mu, vyosi vi veye mukyo vi la va vidamano, na mu latanya kiju.

³⁴ Na vyokulia vyosi vi veye mu, vi libangwa, vya amadzi ga vikwa ku ki la va kidamano; na vyokunwa vyosi vi nwedzangwa ki veye mu viju vi vye vidamano.

³⁵ Na vindu vyosi vyekidonye kyemibiri mikudzu gyevindu yivi ki gwa ku ki la va kidamano; ni ga va mu mahiga, kinga hokuvika tsinyingu ki latanywa: vi veye vidamano, na vi la va vidamano ku mwinye.

³⁶ Navutswa kidaho kinga lina lya amadzi ga veye mu ki la va kilahi; navutswa yiki ki dira mibiri mikudzu gyavyo ki la va kidamano.

³⁷ Na kidonve kyemibiri mikudzu gyavyo ni ki gwa ku bugutsa bwokumidza, bu la midzwa bu la va bulahi.

³⁸ Navutswa amadzi ni ga vikwa ku bugutsa, na kidonye kyombiri mukudzu gwavyo ni ki gwa kuhwo, bu veye budamano ku mwinye.

³⁹ Na inyama ya mu nyala kulia, ni i kudza; uyu u dira mubiri gwayo a la va mudamano kuduka mgolova.

⁴⁰ Na uyu u lia ku mbiri yigu a logi dza tsingubo tsitsye, na a la va mudamano kuduka mgolova: na uyu kandi u ginga mbiri yigu a logidza tsingubo tsitsye, na a la va mudamano kuduka mgolova.

⁴¹ Na vyosi vi molanga ku lirova vi la va vidamano; vi la vula kulibwa.

⁴² Ku vyosi ki molanga nenda yakyo, na vyosi vi gendanga nevirenge vine, noku vyosi ki gendanga nevirenge vinyingi, kali vindu vyosi vi molanga ku lirova, yivi mu ta lia mba; kigira vi veye vidamano.

⁴³ Mu tekola kuva avadamano ku kindu ki molanga, kandi mu tekola avadamano kuvyo, kuduka kwononywa kuvyo.

⁴⁴ Kigira inze mbeye Yahova Nyasaye wenyu: kunangwa mwetakase avene, na mu ve avatakatifu; kigira inze mbeye mutakatifu: kandi mu teyononya mwinye avene nekindu ki molanga ku tsingano tsyosi ki molanga ku lirova.

⁴⁵ Kigira inze mbeye Yahova wa mwanegiridza kutwula mu kivala kya Egepeti, nduke kuva Nyasaye wenyu: kunangwa mu la va avatakatifu, kigira inze mbeye mutakatifu.

⁴⁶ Yili ni lilaga lyenyama, na lyelinyonyi, na lya vyosi vi veye mwoyo vi gendanga mu amadzi, na vyosi vyalombwa vi molanga ku lirova;

⁴⁷ kuduka kwavukanya hagati hevidamano na vilahi, na hagati hekindu ki veye mwoyo kilibangwa, na ki ta libangwa.