Kyavalevi 1 - KITABU KITAKATIFU

¹ Yahova ya langa Musa, na a mu volera nomwoyo gwa twula mu lihema lyokuvuganira, mu na a vola,

² U volere avana va Israeli, nokuvavolera, Ku mwinye vosi mundu na a leta kihaanwa ku Yahova, mu la leta kihaanwa kyenyu kyemitugu, ku tsing'ombe naho ku magondi.

³ Kindu kyekihaanwa kikye ni ki va ni ki veye kihaanwa kyokusambwa kyetsing'ombe, a la leta igiriki indukanu: a la gi leta ha kiliango kyelihema lyokuvuganira mu, a duke kubugirirwa imbiri wa Yahova.

⁴ Kandi a la vika mukono gwigwe ku mutwe gwekihaanwa kyokusambwa; nakyo ki la bugirirwa kuye kuva kyokumukunikira ubwoni bwibwe.

⁵ Naye a liita igiriki imbiri wa Yahova: na avana va Haruni, avasalisi, va la leta masahi, nokuguuha ku tsindulu tsyobwali bu veye ha kiliango kyelihema lyokuvuganira mu.

⁶ Kandi a la nyenya kihaanwa kyokusambwa, nokudonnya vidonye vyayo.

⁷ Na avana va Haruni musalisi va la vika muliru ku bwali, nokuvika tsinku ku muliru,

⁸ na avana va Haruni, avasalisi, va la vika ku vidonye vyenyama, mutwe gwayo, na itinya yayo, vi la lohidzwa ku tsinku tsi veye ku muliru gu veye ku bwali:

⁹ navutswa amala gayo na virenge vyayo a la vyogidza: na musalisi a la samba vyosi ku bwali, kuva kihaanwa kyokusambwa, ki haanwa nomuliru, kyokufunyira Yahova mwayu.

¹⁰ Na kihaanwa kikye ni ki va ni ki veye kyekyayo, kyamagondi kinga kyetsimbuli, kihaanwa kyokusambwa; a la ki leta kisatsa kidukanu.

¹¹ Na a la kiitira ku luvega lwobwali lwa kasikasini, imbiri wa Yahova: na avana va If aruni, avasalisi, va luuha masahi gakyo ku bwali tsimbega tsyosi.

¹² Naye a la ki donnya vidonye, halala nomutwe gwakyo na itinya yakyo; na musalisi a la vi lohidza ku tsinku tsi veye ku muliru gu veye ku bwali:

¹³ navutswa amala na virenge a la vyogidza namadzi. Na musalisi a la haana vyosi, nokuvisamba ku bwali: ki veye kihaanwa kyokusambwa, kihaanwa kyokuhaanwa nomuliru, kyokufunyira Yahova mwayu.

¹⁴ Kandi kihaanwa kikye ku Yahova ni ki va ni ki veye kihaanwa kyokusambwa kyamanyonyi, ma a la leta kihaanwa kikye ku makuulu, kinga ku avana va makuulu ga tugwa.

¹⁵ Na musalisi a la li leta ku bwali, na a la li votola mutwe gwalyo, nokulisamba ku bwali; na masahi galyo ga la tahidzirwa kundulu kwobwali;

¹⁶ na a la twulidza livodzero lyalyo halala na amandu galyo, nokuvika haluvega hobwali, ku luvega lwevugwe, hobugono bweligoke;

¹⁷ na a la li tandula netsimbaha tsyalyo, navutswa si a la lyavukanya vidonye viviri mba. Na musalisi a la li samba ku bwali, ku tsinku tsi veye ku muliru: ki veye kihaanwa kyokusambwa: kihaanwa kyokuhaanwa nomuliru, kyokufunyira Yahova mwayu.