Kwidzulitsa 8 - KITABU KITAKATIFU

¹ Amalago gosi ga nku lagi lero mu ga gumire kugakola, mu duke kuva mwoyo, nokumedeka, nokwingira, mu gumire kivala kya Yahova yesuhira avaguga venyu.

² Na u lidzulitsa inzira yosi ya Yahova Nyasaye wowo ya kwimirira mihiga makumi gane mu kyangalangwi, a duke kukugehidza, nokukugeridza, a manye aga veye mu mwoyo gugwo, kuli ni wenyanga kugumira amalago gege, naho mba.

³ Na a ku kola kwegehidza, ya ku leka nenzala, ya ku lageridza maana, kindu kya wa vula kumanya, kinga vaguga vovo si va ki manya; a duke kukumannya, mundu si a nyala kuva mwoyo nobukima bweng'ine, navutswa ku makuva gosi ga twula mmunwa gwa Yahova mundu a veye mwoyo.

⁴ Ingubo yoyo si ya kunguha ku ive, kandi kirenge kikyo si kya vimba, ku mihiga makumi gane yigyi.

⁵ Kandi u manye mmwoyo gugwo, kuli umundu a hedzanga mwana wewe amageli, ni ndiyo Yahova Nyasaye wowo a ku hedzanga.

⁶ Na u gumire amalago ga Yahova Nyasaye wowo, u gende mu tsinzira tsitsye, nokumutia.

⁷ Kigira Yahova Nyasaye wowo u ku viki mkivala kilahi, kivala kyemigera gya madzi, nevisenukiru, nevidaho, vi senukanga mmavona na mu vigulu;

⁸ kivala kyengano nashairi, nemizabibu, namakuyu namakomamanga; kivala kyemisala gyemizeituni nobwuki;

⁹ kivala kyo u lagira mu bukima bugira komodza, si u la gehera kindu mukyo; kivala kyamagina gakyo ga veye kivya, nevigulu vya va twulidzanga mu mugasa.

¹⁰ Na u la lia nokwiguta, u la gasidza Yahova Nyasaye wowo kigira kivala kilahi kya ya ku ha.

¹¹ Welinde gase u livirira Yahova Nyasaye wowo, ku livula kugumira malago gege, nelikalaga lilye, ne miima gyigye gya nku laganga lero:

¹² gase, lwa u lia nokwiguta, nokwombaka tsinyumba tsindahi, nokumenya mu;

¹³ nevyayo vyetsing'ombe nevyamagondi vi medeka, nefetha yoyo nethahabu yoyo vi medeka, na vyosi vya u veye navyo vi medeka;

¹⁴ hene yaho mwoyo gugwo gu liginga, na u livirira Yahova Nyasaye wowo, wa ku twulidza mkivala kya Egepeti, mu inyumba yobutugwa;

¹⁵ wa kwimiririra mu kyangalangwi kinene kyelitihidza, kya li netsinzoka tsyo muliru netsing'ee, kivala kyobuluhu ki ta li namadzi; wa ku twulidzira madzi mu lwanda ludinyu;

¹⁶ wa ku lageridza maana mu kyangalangwi, ya vaguga venyu va vula kumanya; a duke kukugehidza, a duke kukugeridza, a duke kukukolera bulahi mu kiheri kikyo:

¹⁷ gase u la vola mmwoyo gugwo, Ubunyali bwange, netsingulu tsyomukono Kwange tsi nyoleye ubutugi yibu.

¹⁸ Navutswa widzulitse Yahova Nyasaye wowo, kigira niye u ku hedzanga ubunyali bwokunyola ubutugi; a duke kudinyeridza lilagana lilye lya yesuhira avaguga vovo, kuli ga veye lero.

¹⁹ Navutswa ga la va, nu wivirira Yahova Nyasaye wowo, nokulonda avanyasaye vandi, nokuvatumekira, nokuvasigamira, ndolekidza ku mwinye lero, mu la diva ligali.

²⁰ Kuli avetsihiri va Yahova ya dividza imbiri wenyu, na ndiyo mwinye mu la diva; kigira si mwa hulira mwoyo gwa Yahova Nyasaye wenyu.