Kwidzulitsa 6 - KITABU KITAKATIFU

¹ Henza, yaga nigo namalago, nemiima namakalago, ga Yahova Nyasaye wenyu ya laga kumwegidza, mu duke kugakola mu kivala ha mwambuka kukigumira;

² u duke kutia Yahova Nyasaye wowo, kugumira miima gyigye gyosi, namakalago gege, ga nku laga, ive, namwana wowo, nomisukulu wowo, madiku gosi gelimenya lilyo; madiku gogo ga kolwe manyingi.

³ Kunangwa Israeli, u hulire, u henze na u ga kole; bu duke kuva ubulahi ku ive, u duke kumedeka ligali, kuli Yahova, Nyasaye wa vaguga vovo, ya ku suuviridza, mu kivala ki gangulukanga maveere nobwuki.

⁴ O Israeli, u hulire: Yahova Nyasaye wetu, Yahova a veye mulala:

⁵ na u yanze Yahova Nyasaye wowo nomwoyo gugwo gwosi, naroho gugwo gwosi, netsingulu tsitsyo tsyosi.

⁶ Makuva yaga ga nda ku laga lero, ga la va mmwoyo gugwo;

⁷ na u legidza avana vovo kugo nobugulu, mu la volerana kugo lwa wikala mu inyumba yoyo, na lwa u gendanga ku inzira, na lwa u gonanga, na lwa u vukanga.

⁸ Na u la ga boha ga ve kilolero ku mukono gugwo, na ga la va kuli kyokwidzulitsa hagati hetsimoni tsitsyo.

⁹ Kandi u ga ng'ode ku maliba genyumba yoyo, noku viribwa vivyo.

¹⁰ Na ga la va, lwa Yahova Nyasaye wowo a ku leta mu kivala kya yisuhira avaguga vovo, Abrahamu, na Isaka, na Yakobo, kukuha madala manene namalahi, ga wa vula kwombaka,

¹¹ netsinyumba tsi zula vindu vilahi vyosi, vya wa vula kwidzulitsa, nevidaho vya yavwa, vya wa vula kuyava, nemilimi gyemizabibu, na gyemizeituni, gya wa vuia kusimika, nive u la lia nokweguta;

¹² kunangwa welinde gase u livirira Yahova, wa ku twulidza mu kivala kya Egepeti, mu inyumba yobutugwa.

¹³ U tie Yahova Nyasaye wowo; u mu tumekira, na u lisuha ku lieta lilye.

¹⁴ Mu ta londa avanyasaye vandi, mu vanyasaye vavandu va veye tsimbega tsyenyu tsyosi;

¹⁵ kigira Yahova Nyasaye wowo u veye hagati hoho, a veye Nyasaye we likendeka; gase ubutima bwa Yahova Nyasaye wowo bu laaka ku ive, na a la kwononya kukutwulidza mu lirova.

¹⁶ Mu ta geridza Yahova Nyasaye wenyu, kuli mwa mu geridzira ha Massa.

¹⁷ Mu gumire nobugulu malago ga Yahova Nyasaye wenyu, nelilolekidza lilye, ne miima gyigye, gya ya ku laga.

¹⁸ Na u kole aga veye malungi namalahi mmoni mwa Yahova; bu duke kuva bulahi ku ive, na u duke kwingira nokugumira kivala kilahi kya Yahova yesuhira vaguga vovo,

¹⁹ nokukunga avasigu vovo vosi imbiri wowo, kuli Yahova ya vola.

²⁰ Lwa mwana wowo a li ku teva inyinga idzanga, na a vola, Lilolekidza, namalago, nemiima, namakalago ga Yahova Nyasaye wetu ya laga, ga veye ki?

²¹ Hene yaho u la volera mwana wowo, Kwa li avatugwa va Farao mu Egepeti: Yahova ya ku twulidza Egepeti nomukono gwetsingulu;

²² Yahova ya lolekidza vilolekidzu nevyokugennya, vinene neviliduhu, ku Egepeti, noku Farao, noku inyumba yeye yosi, imbiri wetsimoni tsyetu;

²³ naye ya ku twulidza yo, a duka kukwingeridza, a duke kukuha kivala kya yesuhira avaguga vetu.

²⁴ Na Yahova ya ku laga kukola amalago yaga gosi, nokutia Yahova Nyasaye wetu, bu duke kuva ubulahi ku kwinye madiku gosi, a ku honnye ku ve mwoyo, kuli ga veye lero.

²⁵ Na ga la va ubulungi ku kwinye, ni ku va ni ku gumira lilaga yili lyosi imbiri wa Yahova Nyasaye wetu, kuli ya ku laga.