Kwidzulitsa 34 - KITABU KITAKATIFU

¹ Na Musa yanegira kutwula mu vireremu kya Moabu kutsia mu kigulu kya Nebo, ku isonga ya Pisiga, ki veye engereka ya Yeriko. Na Yahova ya mmannya kivala kyosi kya Gileadi, kuduka Dan,

² na Nafitali kyosi, nekivala kyosi kya Efiraim na Manase, nekivala kyosi kya Yuda, kuduka ku inyanza yemadioli,

³ na Kusini, ne Kereremo kyelivona lya Yeriko, lidala lyamakindu, kuduka Zoaru.

⁴ Na Yahova ya mu volera, Yiki ni kivala kya ndisuhira Abrahamu, ne Isaka, na Yakobo, ni mbola, Nda ha visukululwi vivyo: ligali mmali kukumannya, navutswa si u lambuka yo mba.

⁵ Kunangwa Musa zana mutumekiri wa Yahova ya kudzera yo mu kivala kya Moabu, kuli likuva lya Yahova.

⁶ Na ya mu ta mwivona mu kivala kya Moabu ku luvega lwa Bethipeoru: navutswa si ha veye nomundu u manya kilindwa kikye kuduka lero.

⁷ Na Musa ya li mundu wemihiga mia na makumi gaviri lwa ya kudza: imoni yeye si ya luha, kandi tsingulu tsyomubiri gwigwe si tsya geha.

⁸ Navana va Israeli va syomera Musa mu kereremu kya Moabu madiku makumi gavaka: ma madiku geiisyoma lya magenga ga Musa ga hera.

⁹ Na Joshua mwana wa Nuni ya li ni yizuye roho gwobugeeri; kigira Musa ya vika makono gege kuye: navana va Israeli va mu hulira, va kola kuli Yahova ya laga Musa.

¹⁰ Na si ya vuka mu Israeli kutwula inyinga yeyo, muprofeti ku lugano lwa Musa, wa Yahova ya manya moni namoni,

¹¹ ku vilolekidzu vyosi nevyokugennya, vya Yahova ya mu tuma kukola mu kivala kya Egepeti, ku Farao, no ku vatumekiri veve vosi, noku kivala kikye kyosi,

¹² noku mukono gwosi gwetsingulu, nelitihidza lyosi linene, lya Musa ya kola mu tsimoni tsya Israeli vosi.