Kwidzulitsa 31 - KITABU KITAKATIFU

¹ Na Musa ya tsia na a volera Israeli vosi amakuva yaga.

² Na a va volera, Lero inze mbeye mundu wemihiga mia namakumi gaviri si nyala kandi kutwula nokwingira: na Yahova u mali kumbolera, Si u lambuka Yordani yigu mba.

³ Yahova Nyasaye wowo, niye u kwimirira kwambuka; na a la dividza tsihiri yitsi imbiri wowo, na ive u la tsi gumira: Joshua, niye u kwimirira kwambuka, kuli Yahova ya vola.

⁴ Na Yahova a la kolera yavo kuli ya kolera Sihon na Ogu, avami va Vaamori, nekivala kyavo; ava ya dividza.

⁵ Na Yahova a la va vika havulavu imbiri wenyu, na mu la va kolere kuli lilaga lyosi lya nda mu laga

⁶ Mu ve avagulu navaluviriri, mu ta va nobutii, kandi mu ta va tia: kigira Yahova Nyasaye wowo, niye u tsitsanga halala nive; si a la ku gehera, kandi si a la ku leka mba.

⁷ Na Musa ya langa Joshua, na a mbolera mmoni mwa Israeli vosi, U ve mugulu nomuluviriri: kigira u lingira navandu yava mkivala kya Yahova yesuhira avaguga vavo a la va ha; na ive u la va lihidza miyandu.

⁸ Na Yahova, niye u kwimiriranga; a la va halala nive, si a la ku gehera, kandi si a la ku leka mba: u ta tia, kinga u ta henda mwoyo.

⁹ Na Musa ya ng'oda lilaga yili, na a ha avasalisi avana va Levi, ava ginganga lisanduku lyelilagana lya Yahova, noku vakulundu va Israeli vosi.

¹⁰ Na Musa ya va laga, na a va volera, Ku mihiga gyosi gwe gyitano na gyiviri, kiheri kyagwo ku inyinga yagwo ya lagwa, muhiga gwelilakulwa, mu lilia lyamadiri,

¹¹ lwa Israeli vosi vadza kwemannya imbiri wa Yahova Nyasaye wowo, ha a li tovola, u some lilaga yili imbiri wa Israeli vosi mmatu gavo.

¹² U vugannye avandu, avakali navasatsa navana, na mugeni wowo u veye mu viribwa vivyo, va duke kuhulira, kandi va duke kweyegidza, nokutia Yahova Nyasaye wenyu, nokulinda kukola amakuva gosi gelilaga yili;

¹³ navana vavo, ava vula kumanya, va duke kuhulira, va duke kweyegidza kutia Yahova Nyasaye wenyu, madiku gosi aga mu menya mu kivala kya mwambukanga Yordani kutsia kukigumira.

¹⁴ Na Yahova ya volera Musa Henza, madiku gogo gesundi himbi gelikudza lilyo: u lange Joshua mudze, mwemannye mu lihema lyokuvuganira mu, nduke kumuha lilaga. Na Musa na Joshua va tsia, ne vemannya mu lihema lyokuvuganira mu.

¹⁵ Na Yahova ya loleka mu Lihema mu munara gwelilesi: nomunara gwelilesi gwa singira higulu ho muliangu gwe Lihema.

¹⁶ Na Yahova ya volera Musa, Henza, ive u la gona navaguga vovo; navandu yava va la vuka, nokukola ubuheyi ku lilonda vanyasaye vageni avekivala, kya va tsitsanga yo kuva hagati havo, va la ndeka, nokwononya lilagana lyange lya nda kola halala navo.

¹⁷ Hene yaho ubutima bwange bu laaka kuvo lidiku yilyo, na nda va leka, na nda visa mmoni mwange kuvo, va duke kumirwa, nobudamano bunyingi nekivi vi la duka kuvo, kuduka va vole lidiku yilyo, Ubudamano bunyingi yibu bu duki ku kwinye si ga veye kigira Nyasaye wetu si a veye hagati hetu?

¹⁸ Na nda visira ligali mmoni mwange mu lidiku yili kigira budamano bwosi bwa va kola, kugirunkana ku vanyasaye vandi.

¹⁹ Kunangwa kalunu mweng'odere ulwimbu yilu ive wegidze avana va Israeli: u va vikire mminwa gyavo, lwimbu yilu lu duke kuva umulolekidzi wange ku avana va Israeli.

²⁰ Kigira lwa mmali kuvaleta mkivala kya ndisuhira avaguga vavo, ki gangalukanga amaveere nobwuki, navo lwa va mali kulia nokwiguuta, nokukomera; hene yaho va la girunkana ku vanyasaye vandi, nokuvatumekira, nokulega inze, nokwononya lilagana lyange.

²¹ Kandi ga la va, ubudamano bunyingi na kivi lwa vi mala kuduka kuvo, lwimbu yilu lu la lolekidza imbiri wavo kuli umulolekidzi, kigira lu la vula kwivirirwa mu minwa gyavana vavo: kigira kali kalunu mmanya tsiganagani tsyavo tsya va ganagananga lero, ni nkikiri kuvavika mkivala kya ndesuhira.

²² Kunangwa Musa ya ng'oda ulwimbu yilu lidiku yilyo, ni yegidza avana va Israeli.

²³ Na ya ha Joshua mwana wa Nuni lilaga, na a mbolera, U ve umugulu nomuluviriri; kigira u la hila avana va Israeli mu kivala kya nda visuhira: na inze nda va halala nive.

²⁴ Kunangwa, lwa Musa ya malilidza kung'oda amakuva gelilaga yili mu kitabu, kuduka lwa gafwa,

²⁵ hene yaho Musa ya laga Valevi, ava ginganga lisanduku lyelilagana lya Yahova, na a va volera,

²⁶ Mu vugule kitabu yiki kyelilaga, mu ki vike ha luvega helisanduku lyelilagana lya Yahova Nyasaye wenyu, ki duke kuva ho kuli lilolekidza ku ive.

²⁷ Kigira mmanya ubutingu bubwo, neligoti lilyo lidinyu: henzi, inze nkikiri myoyo halala nemwinye lero mu gwiye avatingu ku Yahova, nasindi lwa mmala kukudza?

²⁸ Mu mbuganyiri avakulundu vosi vetsihiri tsyenyu, na vanyampara vyenyu, nduke kuvola amakuva yaga mmatu gavo, nokuvalolekidzira ligulu nekivala kuvo.

²⁹ Kigira mmanya inyima welikudza lyange mu leyononya ligali, nokugirunkana ku inzira ya nda mu laga; mmadiku gekiheri ubudamano bu la mu nyola, kigira mu la kola budamano mumoni mwa Yahova, kumuvukidza ubutima kigira miyinzi gyamakono genyu.

³⁰ Musa ya vola amakuva golwimbu yilu mmatu gelivugana lyosi lya Israeli, kuduka lwa ga fwa.