Kwidzulitsa 3 - KITABU KITAKATIFU

¹ Hene yaho kwa girunkana, ni kwanegira ku inzira ya Bashan: na Ogu mwami wa Bashan ya ku twulira, uyu navandu veve vosi, kulwana ha Edrei.

² Na Yahova ya mbolera, U ta mu tia; kigira mmali kukuvikira uyu, navandu veve vosi, nekivala kikye, mmakono gogo; na u la mu kolera kuli ga wa kolera Sihon mwami na Vaamori, wa menya Heshibon.

³ Kunangwa Yahova Nyasaye wetu ya vika Ogu, mwami wa Bashan, mmakono getu, navandu veve vosi: na kwa mu kuya kuduka si va tigala kali vakekeke.

⁴ Na kwa vugula madala gege gosi inyinga yeyo; si ha tigala kali lidala lilala lya kwa vula kuvugula kuvo; madala makumi gatano ne lilala, nekivala kyosi kya Arigobu, ubwami bwa Ogu mu Bashan.

⁵ Madala yaga gosi ga veye madala gombakwa namadigi matambi, neviribwa, nevibohero; halala namadala manvingi ga ta veye namadigi.

⁶ Kwa gononya ligali, kuli kwa kolera Sihon mwami wa Heshibon, nelyononya ligali avandu vosi halala navakali navana vamadala gosi.

⁷ Navutswa mitugu gyosi, nevilanye vyomu lidala, kwa vugula kuva vilanye vyetu.

⁸ Kandi kwa vugula kivala inyinga yeyo mmakono gavami vaviri va Vaamori, ava li engereka ya Yordani, kutwula livona lya Arnon, kuduka ku kigulu kya Herimon

⁹ (Herimon zana Vasidone va langa Sirion, na Vaamori va langa Seniru);

¹⁰ madala gosi gekivala kyekereremu, na Gileadi kyosi na Bashan kyosi, kuduka Saleka na Edrei, madala gobwami bwa Ogu mu Bashan.

¹¹ (Kigira Ogu mwami wa Bashan yeng'ine ya tigala mu litigala lyemindu; henza, kitali kikye ki veye kitali kyekivya: si ki veye ha Raba ku avana va Amon? Ubutambi bwakyo bwa li makono gatano na gane, nobugika bwakyo bwa li makono gane, kuli mukono gwomundu.)

¹² Nekivala yiki kwa ki vugula kuva miyandu gyetu inyinga yeyo: kutwula Aroeri, li veye himbi nelivona lya Arnon, nenusu yekivala kyevigulu vya Gileadi, namadala ga li mu, nda ha Varubeni na Vagadi:

¹³ nekivala kya Gileadi kya tigala na Bashan kyosi, ki veye ubwami bwa Ogu, nda ha nusu yehiri ya Manase; kivala kyosi kya Arigobu, nakyo ki veye Bashan kyosi. (Yiki ki langwa kivala kyemindu.

¹⁴ Jairo mwana wa Manase ya vugula kivala kyosi kya Arigobu, kuduka ku lwako lwa Vageshuri na Vamaakathi, na ya vi langa, Havothujairo kuli lieta lilye, kuduka lero.)

¹⁵ Na Makiru nda mu ha Gileadi.

¹⁶ Na Varubeni na Vagadi nda va ha kutwula ku Gileadi kuduka livona lya Arnon, hagati helivona, na ku lwako lwalyo, kuduka ku mugera gwa Jakobu, lu veye lwako, lwa avana va Amon;

¹⁷ nekereremu, na Yordani nalwako luakyo, kutwula ku Kinerethu kuduka ku inyanza ya kereremu, nayo ni Inyanza yo Munyu, isi wekisulungutu kya Pisiga ku luvega lwibukwe.

¹⁸ Kandi nda mu laga inyinga yeyo, ni mu volera, Yahova Nyasaye wenyu u mu heye kivala yiki mu ki gumire: mwambuke ni mwiviki vyuma vyelihe imbiri wa vamwavo venyu avana va Israeli, mwosi ava mu veye netsingulu.

¹⁹ Navutswa avakali venyu, navana venyu, nemitugu gyenyu (kigira mmanya mu veye nemitugu minyingi), vi la menya mu madala genyu ga nda mu ha,

²⁰ kuduka Yahova a sosidze avamwavo venyu, kuli mwinye, navo kandi va la gumira kivala kya Yahova Nyasaye wenyu a va ha engereka wa Yordani: kunangwa mu iirana sa mulala ku miyandu gyigye, gya nda mu ha.

²¹ Na nda laga Joshua inyinga yeyo, ni mmu volera, tsimoni tsitsyo tsi loli vyosi vya Yahova Nyasaye wenyu a koli ku avami vaviri yava: ni ndiyo Yahova a la kolera ubwami bwosi yeyo ha wambuka.

²² Mu ta va tia; kigira Yahova Nyasaye wenyu, niye u mu lwaniranga.

²³ Kandi nda goonya Yahova inyinga yeyo, ni mbola,

²⁴ O Yahova Nyasaye, wa tanga kumannya mutumwa wowo ubunene bubwo, nomukono gugwo gwetsingulu: kigira ha veye na nyasaye ki mwigulu kinga mu lirova, u nyala ku kola kuii miyinzi gyigyo, kandi kuli likola lilyo lyetsingulu?

²⁵ Nsaala ive, nyambuke, ndole kivala kilahi yikyo, ki veye engereka ya Yordani, kigulu yikyo kilahi, na Lebanon.

²⁶ Navutswa Yahova ya vihirirwa inze kigira mwinye, si ya mbulira mba; kandi Yahova ya mbolera, Ga duke ive; i u ta mbolera kandi ku makuva yaga.

²⁷ Wanegire ha ntongi ya Pisiga, na u ginge tsimoni tsitsyo ku luvega lwemadioli, nakasikasini, nekusini, nivugwe, u lole netsimoni tsitsyo: kigira si u lambuka Yordani yigu.

²⁸ Navutswa weganehidze Joshua, u mu leminye mwoyo, na u mu luviridze; kigira a lambuka imbiri wavandu yava, nekivala kya u lola, a la va lihidza kuva miyandu.

²⁹ Kunangwa kwa menya mwivona lyoluvega lwa Bethpeoru.