Kwidzulitsa 26 - KITABU KITAKATIFU

¹ Na ga duke lwa u mala kwingira mu kivala kya Yahova Nyasaye wowo a ku ha, kuva miyandu, na u ki gumire nokumenya mu,

² u vugule ku makuyu gokutanga gosi agekivala, aga u vungidza mu kivala kikyo kya Yahova Nyasaye wowo a ku ha; u ga vike mu kihinda, u tsie ha Yahova Nyasaye wowo a la tovola a mennye ho lieta lilye.

³ U tsie ku musalisi u li va ho madiku yago, u mu volere, Lero nziyamanga ku Yahova Nyasaye wowo, nduki kwingira mu kivala kya Yahova yesuhira avaguga vetu a la ku ha.

⁴ Nomusalisi a vugule kihinda zana mu mukono gugwo, a ki vike imbiri wobwali bwa Yahova Nyasaye wowo.

⁵ Na ive u twule u vole imbiri wa Yahova Nyasaye wowo, Dada wange ya li Musiria, wa li himbi kugota, yiika Egepeti, na a menya yo, na a veye avandu vakekeke ku livalidzwa; ya gwa ihiri inene, neyetsingulu, navandu vanyingi.

⁶ Vaegepeti va ku kolera budamano, ni va ku dambidza, ni va ku saliridza, nobutugwa budinyu:

⁷ kwa lilira Yahova, Nyasaye wavaguga vetu, Yahova ya hulira mwoyo gwetu, na ya lola busaliri bwetu, nekivi kyetu, nelidambidzwa lyetu;

⁸ na Yahova ya ku twulidza Egepeti nomukono gwetsingulu, nomukono gwanyirika, nelitihidza linyingi, nelilolekidza, nevyokugennya;

⁹ naye ya ku leta hano, na a ku ha kivala yiki, kivala ki gangulukanga maveere nobwuki.

¹⁰ Na kalunu, henza, ndeti vyokutanga ku makuyu gekivala, kya ive, tswa mba Yahova. Na u ki viki hasi imbiri wa Yahova Nyasaye wowo, u sigame imbiri wa Yahova Nyasaye wowo: i

¹¹ na u sangalire ubulahi bwosi bwa Yahova Nyasaye wowo ya ku ha, noku avenyumba yoyo, ive, no Mulevi, no mumenyi u veye hagati hoho.

¹² Lwa u mali ku haana izaka ku tsizaka tsyosi tsyelimedeka lilyo ku muhiga gwekivaka, ugu veye muhiga gwelihaana izaka, u he Mulevi izaka zana, nommenya, nombisandu, nomukunzakali, va duke kulagira mu viribwa vivyo, nokwiguta.

¹³ Na ive u vole imbiri wa Yahova Nyasaye wowo Vindu vya takaswa mmali kuvitwuiidza mu inyumba yange, mmali kuvihaana ku Mulevi, nomumenya, nombisandu, nomukunzakali, kuli lilaga lilyo lya wa ndaga lyosi: si nzoni lilala ku amalago gogo, kinga si nziviriye:

¹⁴ ku vindu yivi si ndiye ku inyinga lwa nda menya ku mai genga, kinga si nda li haana, ni mbeye nobudamano, kinga si mbaani kigira avakudzu: mbuliye mwoyo gwa Yahova Nyasaye wange, na nkoli kuli gosi ga ive u ndaga.

¹⁵ Mu hokumenya hoho hatakatifu migulu, u henze hasi, nokugasidza avandu vovo, Israeli nekivala kya wa ku ha, kuli wesuhira avaguga vetu, kivala ki gangulukanga amaveere nobwuki.

¹⁶ Lero ndi Yahova Nyasaye wowo a ku lage kukola amalago yaga, nemiima gyigye; kunangwa u ga gumire nokugakola nomwoyo gugwo gwosi, naroho gugwo gwosi.

¹⁷ Lero weyami Yahova kuva Nyasaye wowo, kandi weyami kugenda mu tsinzira tsitsye, nokugumira miima gigye na malago gege, nelikalaga lilye, nokuhulira mwoyo gwigwe:

¹⁸ na Yahova weyami ive lero ndi kuva ihiri yeye mwene, kuli ya ku suuviridza, kandi ga ku dukira kugumira lilaga lilye lyosi;

¹⁹ na a la ku vika igulu ku tsihiri tsyosi tsya ya lomba, ku ubukumi, noku lieta, noku lidzominywa; u duke kuva ihiri intakatifu ku Yahova Nyasaye wowo, kuli ya vola.