Kwidzulitsa 25 - KITABU KITAKATIFU

¹ Ni li veye ho lihangalidzana hagati ha vandu, ni vadza mu likalagirwa, avakalagi va va kalagira; hene yaho va he mulungi ubulungi, na va kalagire wamahyolo.

² Ni ga dukira, wamahyolo kukuywa, mukalagi a mwalire hasi, nokukuywa imbiri wetsimoni tsitsye, kuli amahyolo gege, kuli livalidza li duka.

³ A nyala kumukuya ubukinduki amakumi gane, a ta vitiridza mba; gase, inyinga a vitidza bukinduki yibu, kuduka bunyingi, amwayo wowo a fwane a leganywa.

⁴ Lwa ing'ombe i hulanga ubuswage u ta gi boha munwa mba.

⁵ Amwavo namwavo ni va va ni va menya halala, mulala ku; o na a kudza na a vula kuva nomwana muyai mukali mutiga uyu, a ta kwebwa kyova ku mugeni mba: amwavo womusatsa wewe a mwiranye a ve mukali wewe, a mu kolere a ga dukiranga amwavo womusatsa wewe.

⁶ Na ga la va, wa tanga kwivulwa wa yivula a la londa ku lieta lyamwavo wewe wa kudza, lieta lilye li vule kugota mu Israeli.

⁷ Ni i va mundu uyu si a yanzi kuvugula mukali wamwavo wewe, hene yaho mukali wamwavo wewe zana a tsie ha kiribwa ku vakulundu, a va volere, Amwavo womusatsa wange u suye ku singeridzira amwavo wewe lieta mu Israeli; a sulanga kunkolera aga dukira amwavo womusatsa wange mba.

⁸ Hene yaho avakulundu velidala lilye va mu lange, na va mu volere: na a va na a singira, na a vola, Si nyanzi kuvugula mukali uyu;

⁹ hene yaho mukali wamwavo wewe a tsie kuye imbiri wavakulundu, kumboholera kilatu kikye ku kirenge kikye, nokumutudzira amate mmoni, nomukali zana a tivule a vole, Umusatsa u sulahga kwombakira amwavo wewe inyumba yeye, a kolwe ndiyo.

¹⁰ Na lieta lilye mu Israeli li langwe, Inyumba yowa twulidzirwa kilatu.

¹¹ Avasatsa ni va va ni va kupana avene navene, nomukali womulala ni yesunda himbi kusola musatsa wewe kutwula mmukono gwa uyu u mu kupanga, na a nyira mukono gwigwe, nokwenya kumukoola;

¹² hene yaho u kalage mukono gwigwe, imoni yoyo i ta va netsimbabasi mba.

¹³ U ta va nevyokugera lugano lugano, vinene nevikekeke mmuya yoyo.

¹⁴ U ta va nevyokugera lugano lugano vinene nevikekeke mu inyumba yoyo.

¹⁵ U ve nekyokugera tsiratili ki dukanu; nekigero ki dukanu: madiku gogo ga duke kuva manyingi mu kivala kya Yahova Nyasaye wowo a ku ha.

¹⁶ Kigira ava kolanga vindu kuli yivi, vosi, na ava kolanga aga ta li ubulungi, vosi, va veye livihiriridza ku Yahova Nyasaye wowo.

¹⁷ Widzulitse aga Amaleki ya ku kolera ku inzira lwa wa twula Egepeti;

¹⁸ kuli ya ku twulira ku inzira, nokukuya avalala ku avandu vovo ava ng'alika inyima, vosi ava li vadedekere inyima wowo, lwa va luha nokukudza mwoyo; na si ya tia Nyasaye mba.

¹⁹ Kunangwa ga la va, lwa Yahova Nyasaye wowo a ku sosidza ku vasigu vovo vosi, mu kivala kya Yahova Nyasaye wowo a ku ha ki ve miyandu gya u gumira, hene yaho u twulidze lidzulitswa lya Amaleki isi weligulu; u tivirira mba.