Kwidzulitsa 22 - KITABU KITAKATIFU

¹ Lwa u lola ing'ombe yamwavo wowo kinga ligondi lilye ni vi gotanga, u tevisa kuli wa vula kuvilola: ligali u la vi galukidza ku amwavo wowo.

² Namwavo wowo na a va na a ta veye ahimbi, kinga nu u vula kummanya, u vi hile wenyu mu inyumba yoyo, u ve navyo kuduka amwavo wowo yadze kuvyenya, na u mu he.

³ U kole ndiyo kandi ku isukiri yeye; kandi u kole ndiyo ku tsingubo tsitsye; kandi u kole ndiyo ku vyosi vya gota kya amwavo wowo, kya gota no u ki lola: u tevisa kukyo.

⁴ Lwa u lola isukiri yamwavo wowo kinga ing'ombe yeye i gwiye ku inzira, u tevisa mba: u ta vula kumukonya kugisingeridza kandi.

⁵ Mukali a tivika ingubo i dukiranga musatsa, kinga musatsa a tivika tsingubo tsyomukali; kigira u Kolanga yaga a veye livihiriridza ku Yahova Nyasaye wouo.

⁶ Inyumba yelinyonyi ni i loleka imbiri wowo ku inzira, kinga ku misala gyosi, kinga hasi, ne i veye mu navana kinga mabuyu, nelinyavuli ni li goneye ku avana, kinga ku mabuyu, u ta vugula linyavuli halala navana:

⁷ ligali u leke linyavuli li tsie, navutswa u nyala kuvugula avana; bu duke kuva bulahi ku ive u kole madiku gogo ga ve manyingi.

⁸ Lwa wombaka inyumba impya, u lombe lugaga ku, gase u la leta kisahi kuduka ku inyumba yoyo, mundu na a va ni yaguluka.

⁹ U ta taga mulimi gugwo gwemizabibu tsingano tsiviri tsyobugutsa, gase makuyu gosi ga lononywa, bugutsa bwa wa taga, nelimedeka lyamazabibu gogo.

¹⁰ U ta lima neng'ombe nesukiri kukwesa ligembe halala.

¹¹ U tivika ingubo yatsugana bwoya bwamagondi nakatani halala.

¹² U lombe buyusi tsimbega tsine tsyengubo yoyo, tsyokwiyuhira.

¹³ Mundu ku vosi na a vugula mukali, na a va halala naye, na a mu dunyira,

¹⁴ na a mu yala amakuva getsisoni, nokuvika kuye lieta lidamano, na a vola, Nda vugula mukali uyu, na lwa ndisunda himbi kuye, si nda nyola kuye vilolero vyolukana;

¹⁵ hene yaho dada womukana uyo na mama wewe, va la vugula vilolero vyolukana lwomukana va vi lete ku vakulundu velidala ha kiribwa;

¹⁶ na dada womukana a volere vakulundu, Nda ha musatsa uyu mwana wange a ve mukali wewe, naye a mu dunyira;

¹⁷ henzi, u viki kuye amakuva getsisoni, a vola, Si ndoli ku mwana wowo vilolero vyoliukana; na henzi vilolero vyolukana lwomukana wange. Na va lang'aminye ingubo imbiri wa vakulundu velidala.

¹⁸ Navakulundu velidala yilyo va vugule musatsa uyu va mu he amageli;

¹⁹ va mu tungidze tsishekeli mia tsyefetha, va he dada womukana, kigira u viki lieta lidamano ku mukana wa Israeli; naye a ve mukali wewe; si a veye nomunwa kumukunga madiku gege gosi mba.

²⁰ Navutswa amakuva yaga ni ga veye geligali, vilolero vyolukana vi vula kekunyoleka ku mukana;

²¹ va hile mukana zana ha kiliango kyenyu mba ya dada wewe, navasatsa velidala lilye va mu lase magina a kudze, kigira ya kola busiru mu Israeli, ku likolera ubuheyi mu inyumba ya dada wewe: na ndiyo u la twulidza ubudamano hagati hoho.

²² Musatsa na a nyolelerwa na a goni nomukali mkali womusatsa, va kudze vombi, musatsa u goni nomukali, nomukali zana: ni ndiyo u la twulidza budamano mu Israeli.

²³ Na a va ho mukana mugima womusatsa ya kwa, mundu na a mu lola mu lidala, na a gona naye;

²⁴ hene yaho mu va hile vombi ha kiribwa kyelidala zana, mu va lase magina, va kudze; mukana, kigira si ya kupa tsikwili, naye a veye mu lidala; nomusatsa, kigira u legannyi mukali womutende; ni ndiyo u la twulidza ubudamano hagati hoho.

²⁵ Navutswa musatsa uyu na a va na a nyola mukana uyu mmulimi, womusatsa ya kwa, musatsa uyu na a mu niga netsingulu, na a gona naye, musatsa zana a kudze yeng'ine:

²⁶ navutswa u ta kola kindu ku mkana mba; si ha li nobwoni mu mukana kuduka ku likudza; kigira ga veye kuli mundu u twuliranga mutende, kumiita, yaga kandi ga veye ndiyo;

²⁷ kigira ya mu lola mmulimi, nomukana wa kwebwa ya kupa tsikwili, na si ha li nomundu wokumusola.

²⁸ Musatsa na a va na a lola mukana mugima, u ta kwebwa, na a mu gumira, nokugona naye, ni va nyolwa;

²⁹ hene yaho musatsa uyu a he dada womukana tsishekeli makumi gatano tsyefetha, a ve mukali wewe, kigira ya mwononya; si a veye nomunwa kumukunga madiku gege gosi.

³⁰ Mundu a ta vugula mukali wa dada wewe, kandi a ta vimbula kyahonyo kya dada wewe.