Kwidzulitsa 21 - KITABU KITAKATIFU

¹ Na a va na a nyoleka mundu wiiteywi mu kivala kya Yahova Nyasaye wowo a ku ha kukigumira, na a goni mbulimu, nomwiiti a vula kumanyekana;

² hene yaho avakulundu navakalagi vovo va tsie, kuduka kugera amadala aga veye hi mbi ku uyu wiitwa:

³ na ga la va, lidala li veye himbi ku uyu wiitwa, avakulundu velidala yilyo va vugule ing'ombe iroli yekyayo, i kikiri kukola miyinzi, kinga i kikiri kukwesa nenira:

⁴ avakulundu velidala yilyo vikidze iroli zana mwivona ha madzi ga vitanga, lya va ta limanga mu, na lya va ta taganga mu, ma va vunanyire mu iroli zana ligoti lyayo.

⁵ Navasalisi avana va Levi visunde himbi; kigira nivo ava Yahova Nyasaye wowo ya tovola va mtumekire, nokugasidza mu lieta lya Yahova, na ku makuva gavo lihangalidzananga lyosi na maduya gosi ga la kalagwa.

⁶ Navakulundu vosi velidala zana, l va veye himbi ku uyu wiitwa, visaviri makono gavo ku iroli zana ya vunanyirwa ligoti lyayo mwivona;

⁷ na va la tivula ni va vola, Amakono getu si ga sunduye amasahi yaga, kinga tsimoni tsyetu si tsi ga loli mba.

⁸ O Yahova, sameha avandu vovo Israeli, ava wa boholola, kandi u ta leka masahi ga ta li nekindu hagati ha avandu vovo Israeli. Namasahi yaga ga la samefwa kuvo.

⁹ Ni ndiyo u la vika ha luvega masahi ga ta li nekindu hagati hoho, lwa u kola ago bulungi mu tsimoni tsya Yahova.

¹⁰ Lwa u tsia kulwana navasigu vovo, na Yahova Nyasaye wowo lwa a va vika mmakono gogo, na lwa u va lanya,

¹¹ nu u lola hagati ha va lanywa, mukali mulahi, na u mu kayirwa, nu u ganagana kumuvugula kuva mukali wowo;

¹² hene yaho u mu hile wenyu mu inyumba yoyo; naye a la vega mutwe gwigwe, nokukala amasanda;

¹³ kandi a navule tsingubo tsyelilanywa lilye, a menye mu inyumba yoyo, kandi a syomere dada wewe na mama wewe umweli gwosi: kunangwa u ve halala naye, u ve musatsa wewe, naye a ve mukali wowo.

¹⁴ Kandi, nu u va nu u vula kusangala naye, u mu he munwa a tsie ha yenyanga; navutswa u ta mu guiidza nefetha, u ta mu kola kuli mutugwa, kigira u mu gehidzi.

¹⁵ Ni i va mundu a veye navakali vaviri, mulala muyanze, nowundi a dunyirangwa, navo vombi muyanze nuyu u ta yanzwa va mivulira avana: nomuyai wa tanga kwivulwa, na a va na a veye womukali u ta yanzangwa;

¹⁶ hene yaho ga la va, ku lidiku lya a haanira ku miyandu gya a veye nagyo, ku avana veve, a ta vika mwana wa muyanze kuva wa tanga kwivulwa imbiri womwana wa uyu u ta yanzangwa, naye na a veye ive wa tanga kwivulwa:

¹⁷ navutswa a bugirire wa tanga kwivulwa, umwana wa u ta yanzangwa, kumuha vidieli viviri ku vyosi vya a veye navyo; kigira niye litanga lyetsingulu tsitsye; tsingulu tsyo wa tanga kwivulwa tsi veye tsitsye.

¹⁸ Mundu na a va na a veye no mwana mutingu, nou ekirage u sula kuhulira mwoyo gwa dada wewe, kinga mwoyo gwa mama wewe, invinga va mu gerehidza, a sula kuvahulira;

¹⁹ hene yaho dada wewe na mama wewe va mu gumire, nokumuhila ku vakulundu velidala lilye mu kiri bwa kyahango hehe;

²⁰ navo; va volere vakulundu velidala lilye, Mwana wetu uyu a veye mutingu nowekirage, si a huliranga mwoyo gwetu mba; a veye muhuvali, nomuhambiki.

²¹ Navasatsa vosi avelidala lilye va mu lase magina, a duke kukudza: na ndiyo u twulidze ubudamano hagati hoho; na Israeli vosi va hulire, va tie.

²² Umundu na a va na a kola ubwoni bu dukana nelikudza, naye ni iitwa ku lisungwa ku musala;

²³ mubiri gwigwe mukudzu gu ta menya ku musala budiku bwosi, ta navutswa ligali u mu te lidiku zana; kigira u sungeywi, Nyasaye u mu laami; gase u lononya kivala kikyo kya Yahova Nyasaye wowo a ku ha kuva miyandu gyigyo.