Kwidzulitsa 20 - KITABU KITAKATIFU

¹ Lwa u twula kutsia mbulwani navasigu vovo, nokulola tsiparasi, namagari, navandu vanyingi kuvita ive, u ta va tia mba; kigira Yahova Nyasaye wowo a veye halala nive, wa kwanegeridza kutwula mkivala kya Egepeti.

² Na ga la va, lwa mwisunda ku bulwani, umusalisi yesunde himbi, nokuvolera vandu,

³ a va volere, Mu hulire, O Israeli lero mwisundanga ku bulwani ku vasigu venyu: myoyo genyu gyi ta kudza mba; mu ta tia mba, mu ta degera mba, kandi mu ta timuka inkolo kigira yavo mba;

⁴ kigira Yahova Nyasaye wenyu niye wimiriranga, kutsia kumulwanira ku vasigu venyu, a duke kumuhonnya.

⁵ Navanyampara va volera vandu nokuvola, Ni mundu ki u veye hano wombaka inyumba impya, ya kikiri kwingira? A tsie yirane yengo wewe gase a la kudzera mbulwani na i lingirwa nowundi mundu.

⁶ Ni mundu ki u veye hano wa simika mulimi gwemuzabibu, naye a kikiri kulia amakuyu gagwo? A tsie yirane yengo wewe, gase a la kudzera mbulwani nowundi mundu a la lia makuyu gagwo.

⁷ Mundu ki u veye hano wa kwa mukali, na a kikiri kuserera? A tsie yirane yengo wewe, gase a la kudzera mbulwani, nomukali a la hilwa nowundi musatsa.

⁸ Kandi avanyampara va mede kuvolera vandu, va vole, Ni mundu ki u veye wobutii nowomwoyo mudedekere? A tsie yirane yengo wewe, gase myoyo gya vamwavo veve gyi la salaluka kuli mwovo gwigwe.

⁹ Na ga la va, lwa vanyampara va mala kuvolera vandu, va vike avanene vamahe ku vandu.

¹⁰ Lwa wisunda himbi ku lidala kulwana nalyo, hene yaho u la gamba kuvo mwoyo gwemirembe.

¹¹ Na ga la va, lwa litivula ku ive nemirembe, nokukwigulira, hene yaho ga la duka, vosi ava nyoleka mulyo kwegehidza ku ive, nokukutumekira.

¹² Ni li va ni iyambakana kukola mirembe nive, navutswa li la kola lihe ku ive, hene yaho u li kumbiridze:

¹³ na lwa Yahova Nyasaye wowo a li vika mmakono gogo, u duye avasatsa vosi ava veye mulyo nobwogi bwekivavi:

¹⁴ navutswa avakali, navana, nemitugu gyelidala, ne vi veye mu lidala lyosi, vilanye vyalyo vyosi, u vi vugule vi ve vilanye ku ive; na u lie vilanye vya avasigu vovo, vya Yahova Nyasaye wowo ya ku ha.

¹⁵ U kole ndiyo madala gosi aga veye ihale nive, aga ta li amadala getsihiri yitsi.

¹⁶ Navutswa amadala getsihiri yitsi, tsya Yahova Nyasaye wowo a ku ha kuva miyandu, u ta honnya kindu kali kilala ki veye mwoyo ki herananga;

¹⁷ navutswa u va dividze ligali: Muhiti, na Muamori, na Mukanani, na Muperizi, na Muhivi, na Mujebusi, kuli Yahova Nyasaye wowo ya ku laga;

¹⁸ va vule kukwegidza kukola kuli livihiriridza lyavo lyosi, lya va kolera avanyasaye vavo; ni mu kola ndiyo mu la va na mahyolo ku Yahova Nyasaye wenyu.

¹⁹ Lwa u kumbiridza lidala madiku manyingi, kukola lihe kulyo, u tononya misala gyalyo kuhila imbadzi kugyo; kigira u la lia makuyu gagyo, kinga u ta gyi tema; kigira musala gwombulimu gu veye mundu, u duke kukola lihe kugwo?

²⁰ Navutswa misala gya u manya si gyi veye misala gyokulibwa, u gyononye u gyi teme, wombakire lugaga ku lidala, li kolanga lihe ku ive, li luhe li g ve.