Kwidzulitsa 13 - KITABU KITAKATIFU

¹ Na a va na a duka hagati hoho muprofeti, kinga muloti wamaloto, na a ku vulira kilolekidzu, kinga kyokugennya,

² ne ki loleka kilolekidzu kinga kyokugennya kya ya ku volera, na a vola, Genda ku londe avanyasaye vandi, ava u ta manya, ku va tumekire;

³ u ta hulira amakuva gomuprofeti zana mba, kinga muloti wamaloto: kigira Yahova Nyasaye wenyu a mu geridzanga, a duke kumanya ni mu va ni mu yanzanga Yahova Nyasaye wenyu nomwoyo gwenyu gwosi naroho gyenyu gyosi.

⁴ Mu gende kulonda Yahova Nyasaye wenyu, mu mu tie, nokugumira malago gege, nokuhulira mwoyo gwigwe, na mu mu tumekire, nokuhambana naye.

⁵ Kandi muprofeti uyu, kinga muloti wamaloto, uyu a liitwa, kigira ya vola agobukyamu ku Yahova Nyasaye wenyu, wa mu twulidza mu kivala kya Egepeti, na a mboholola mu inyumba yobutugwa, a duke kumuhinula ku inzira ya Yahova Nyasaye wowo a ku laga kugenda muyo. Ni ndiyo u la twulidza ubudamano bu twule hagati hoho.

⁶ Ni i va amwavo wowo, mwana wa mama wowo, kinga mwana wowo muyai, kinga mukana, kinga mukali womukiritu kikyo, kinga mulina wowo, u veye kuli mwoyo gugwo, na a ku goonya makiriri, na a ku volera, Genda ku tsie kusigamira avanyasaye a v andi, ava u ta manya, ive, kinga vaguga vovo;

⁷ mu vanyasaye avetsihiri tsi kumbiridza mwinye, tsi veye himbi ku ive, kinga ihale ku ive, kutwula kiheri kilala kyelirova kuduka ku kiheri kindi kyelirova;

⁸ u ta mubugirira, kandi u ta mu hulira; kandi imoni yoyo i ta mu vererera, kandi u ta mu leka, kandi u ta; mu visa:

⁹ u mwiite ligali; mukono gugwo gu ve gwokutanga kuye kumwiita, nenyima makono gavandu vosi.

¹⁰ U la mu lasa magina a kudze, kigira yenya kukuhinula kutwula ku Yahova Nyasaye wowo, wa ku twulidza mu kivala kya Egepeti, mu inyumba yobutugwa.

¹¹ Na Israeli vosi va la hulira, nokutia, va la vula kukola kandi ubudamano kuli yibu hagati hoho.

¹² Nu u va nu u hulira ni ga volangwa amakuva ku lilala lyamadala genyu, ga Yahova Nyasaye wowo ya ku ha kumenya mu, ni va vola,

¹³ Avalala ku vadamano va loleki hagati hoho, va hinulanga avandu velidala lyavo, ni va vola, Gendi ku tsie kusigamira vanyasaye vandi, ava mu ta manya;

¹⁴ hene yaho u teve, nokwenya, nokwidera; na, henza, ni i va nageligali, nenkuva yiyi ni i veye ya dodo, livihiriridza kuli yili li kolangwa hagati hoho,

¹⁵ ligali u kuye avamenyi mu lidala yili nobwogi bwekivavi, kuvadividza ligali, halala na vyosi vi veye mu, ne mitugu gyi veye mu, nobwogi bwekivavi.

¹⁶ Nevilanye vyalyo vyosi u vi vungidze hagati henzira yalyo, na u sambe lidala zana nomuliru, nevilanye vyalyo vyosi, ha ve kihaanwa ku Yahova Nyasaye wowo: na li la va kitumi mihiga nemihiga; li la vula kwombakwa kandi.

¹⁷ Si ki la handa ku mukono gugwo kindu ku vyosi kya laamwa; Yahova a girunkane kutwula ku ubululu bwobutima bwibwe, a ku vererere, a ku kolere tsimbabasi, na a ku kole kuva avanyingi, kuli yesuhira avaguga vovo;

¹⁸ lwa u hulira mwoyo gwa Yahova Nyasaye wowo, nokugumira malago gege gosi ga nku laganga lero, u kole ago bulungi mmoni mwa Yahova Nyasaye wowo.