Kutwula 32 - KITABU KITAKATIFU

¹ Kunangwa avandu lwa va lola Musa u lindagiye kutwula mu kigulu, avandu vevugannya avene ku Haruni, ni va mu volera, Vuka, u ku lombere vanyasaye, ava kwimirira; kigira ku makuva ga Musa uyu, mundu wa ku leta kutwula mu kivala kya Egepeti, si ku manya kya mu gwira.

² Na Haruni ya va volera, Mu vunanye tsimingiri tsyethahabu tsi veye mu matu ga vakali venyu, ga vayai venyu, ga vakana venyu, na mu ndetere.

³ Na avandu vosi va vunanya tsimingiri tsyethahabu tsya va li natsyo mu matu gavo, nokutsileta ku Haruni.

⁴ Naye ya tsi vugula mu makono gavo, na a tsi vadza noluvadziru, tsi fwanane nekimoli kyobunyinda na va vola, Yivi vi veye vanyasaye vovo, O Israeli, ava ku twulidza mu kivala kya Egepeti.

⁵ Na Haruni lwa ya lola yaga, yombaka ubwali imbiri wakyo; na Haruni ya landidza lilaga, na a vola Mugamba li la va lidiku lyelilia ku Yahova.

⁶ Navo va vuka mabwebwe na va baana tsisadaka tsyokusambwa, nokuleta tsisadaka tsyemirembe; na avandu vikala kulia nokunwa, na va singira kukina.

⁷ Na Yahova ya volera Musa, Tsia, wike hasi; kigira avandu vovo, ava wemira kuvatwulidza mu kivala kya Egepeti, va mali kweyononya:

⁸ va girunkani bwangu kuleka inzira ya nda va laga: velombeye kifwananyi kyekimoli kyobunyinda, nokukisigamira, nokukiitira tsisadaka, na va voye, Yivi navanyasaye vovo, O Israeli, ava kwanegiridza kutwula mu kivala kya Egepeti.

⁹ Kandi Yahova ya volera Musa, Ndoli avandu yava, na henza, va veye avandu aveligoti lidinyu:

¹⁰ kalunu u ndeke ubutima bwange bwaake ligali kuvo, na mba dividze: ma nda kola ive kuva ihiri inene.

¹¹ Na Musa ya goonya Yahova Nyasaye wewe, nokuvola, Yahova, kigira ki ubutima bubwo bwaaka ligali ku avandu vovo, ava wa leta nobunyali bunene, nomukono gwetsingulu kutwula mu kivala kya Egepeti?

¹² Kigira ki Avaegepeti va nyala kumoloma, nokuvola, Ya va twulidza ku va kolera ubudamano, a duke kuvitiira mu vigulu, nokuvadividza va vule kuva ku lirova? U girunkane kutwula ku butima bululu bubwo, na weganire ubudamano yibu bwa u veye nabwo ku avandu vovo.

¹³ Widzulitse Abrahamu, na Isaka, na Israeli, avatumekiri vovo, ava wesuhira ku ive mwene, nokuvavolera, Nda kiridza kisukululwi kyenyu kuli tsing'ereng'ani tsyomigulu, na kivala yiki kyosi kya mboye makuva gakyo, nda ha kisukululwi kyenyu, ki la va miyandu gyavo mihiga nemihiga.

¹⁴ Na Yahova yeganira ubudamano bwa ya vola a la kolera avandu veve.

¹⁵ Na Musa ya girunkana, na a sulunguta kutwula mu kigulu, na ya li nevibao viviri vyelilolekidza mu mukono gwigwe; vibao, ivya li ni vya ng'odwa tsimbega tsyavyo vyombi; vya ng'odwa ku luvega yilu noku lundi.

¹⁶ Na vibao vya li miyinzi gya Nyasaye, na mang'oda ga li mang'oda ga Nyasaye, aga vadzwa ku vibao.

¹⁷ Na lwa Joshua ya hulira liyoga lya avandu lwa va kupa isango, ya volera Musa, Ha veye neliyoga lyobulwani mu hokusosa.

¹⁸ Naye ya vola, Yigu si gu veye mwoyo gwa yava ava kupa isango kigira va guutanga, kandi si gu veye mwoyo gwa yavo ava liranga kigira va guutwa; navutswa mbulira liyoga lya yava avimbanga.

¹⁹ Kunangwa, lwa yesunda himbi hokusosa, ya lola kifuananyi kyekimoli na likina: na ubutima bwa Musa bwaaka ligali, naye ya ta vibao vi twule mu makono gege, nokuvyatanvira isi wekigulu.

²⁰ Naye ya vugula kimoli kya va lomba, nokukisamba nomuliru, nokukisia kuduka kuva ubusie, nokutsuka mmadzi, nokuniga avana va Israeli va nwe.

²¹ Na Musa ya teva Haruni, Avandu yava va kola ndi ku ive, u duke kuleta kuvo ubwoni bunene?

²² Na Haruni ya vola, Ubutima bwomwami wange bu taaka mba: ive u manya avandu yava, va veye nomwovo gwokukola ubudamano.

²³ Kigira va mbolera, U ku lombere avanyasaye, ava kwimirira; kigira ku Musa, mundu wa kwimirira kutwula mu kivala kya Egepeti, si ku manya kya mu gwira.

²⁴ Na inze nda va volera, Ku vosi va veye nethahabu, gi vunanye: kunangwa va mpa; na a inze nda gi ta mu muliru, na kya twula mu kimoli yiki.

²⁵ Kunangwa lwa Musa ya lola avandu vebaaye, (kigira Haruni ya vebaalidza va duke kulegannywa hagati ha vasigu vavo,)

²⁶ hene yaho Musa ya singira mu kiribwa kya hokusosa, na a vola, Ku vosi u veye ku luvega lwa Yahova, yesunde ku inze. Na'avana vosi va Levi vesunda kuye.

²⁷ Na a va volera, Yahova, Nyasaye wa Israeli a vola ndi, Mwebohe sa mulala kivavi kikye mu kikenge kikye, na mu vite yiyi na yiyi kutwula ku kiribwa yiki kuduka mu kiribwa kindi hagati hokusosa, na mwiite sa mulala amwavo wewe, na sa mulala wakye wewe, na sa mulala mutende w ewe.

²⁸ Na avana va Levi va kola kuli likuva lya Musa: na va gwa ku lidiku yilyo kuli avandu tsielfu tsivaka.

²⁹ Kandi Musa ya vola, Mwevike ku Yahova lero, sa mulala ku muyai wewe, na sa mulala ku amwavo wewe; a duke kumuha ubugasu lero.

³⁰ Kunangwa Mugamba, Musa ya volera avandu, Mu koli ubwoni bunene: na kalunu ndanegira ntsie ku Yahova; namusiya nda lomba kyokukunika ubwoni bwenyu.

³¹ Kunangwa Musa yirana ku Yahova, na a vola, O, avandu yava va koli ubwoni bunene, na velombeye avanyasaye vethahabu.

³² Navutswa kalunu nu u va nu u nyala kusameha ubwoni bwavo naho ni ga ta li ndiyo, nku saala, mwadza weye inze kutwula mu kitabu kikyo kya u ng'odi.

³³ Yahova ya volera Musa, Ku vosi uyu u koli ubwoni ku inze, uyu nda mweya kutwula mu kitabu kyange.

³⁴ Kunangwa kalunu u tsie, kwimirira avandu va duke ha nda ku voleye: henza, ingelosi wange a limira imbiri wowo; navutswa mu lidiku lya ndi va kalagira, nda va kalagira kigira ubwoni bwavo.

³⁵ Na Yahova ya kuya avandu, kigira va lomba kimoli, kya Haruni ya lomba.