Kutwula 31 - KITABU KITAKATIFU

¹ Na Yahova ya volera Musa, nokuvola,

² Henza, nangiye I ku lieta lilye, Bezaleli, mwana wa Uri, mwana wa Huru, wehiri ya Yuda:

³ na mmali kumwizulitsa Roho wa Nyasaye, mu bugeeri, nomu limanya, nomu busidza bwemiyinzi tsingano tsyosi,

⁴ kulungikidza miyinzi gyobusidza, kusidzaha mu ithahaba nomu ifetha, nomu mugasa,

⁵ nomu livadza magina gokuhandidzwa, noku livadza misala, nokusidzaha mu miyinzi tsing'ano tsyosi.

⁶ Na inze, henza, inze mbiki halala naye, Oholiabu, mwana wa Ahisamaku wehiri ya Dan; kandi mbiki ubugeeri mu myoyo gya vosi avobugeeri, va lombe vyosi vya nda ku laga:

⁷ lihema lyokuvuganira mu, na lisanduku lyelilolekidza na intebe yetsimbabasi i veye ku iisanduku, na viju vyosi vya Lihema,

⁸ na imeza na viju vyayo, na kinara kyetsitaya kisiye na viju vyakyo vyosi, na ubwali bwekimuli,

⁹ na ubwali bwokusamba kihaanwa halala na viju vyabwo vyosi, na lwero na bwikaliru bwalwo,

¹⁰ na va la lomba tsingubo tsindahi, na tsingubo tsintakatifu tsya Haruni musalisi, na tsingubo tsya avana veve, kutumika mmiyinzi gyomusalisi,

¹¹ na maguta gokuvaka, na kimuli kya vifunyanga mwayu vilahi kya hatakatifu: kuli gosi ga nda ku laga va la kola ndiyo.

¹² Na Yahova ya volera Musa, nokuvola,

¹³ U volere avana va Israeli, na u vole, Ligali mu la gumira masabato gange: kigira ga veye kilolekidzu hagati hange na mwinye mu visukululwi vyenyu vyosi; mu duke kumanya inze mbeye Yahova u takasanga mwinye.

¹⁴ Kunangwa mu la n gumira lisabato; kigira li veye litakatifu ku mwinye: ku vosi u lyononnya ligali a liitwa; kigira ku vosi u koia miyinzi kulyo a la dividzwa kutwula mu avandu veve.

¹⁵ Miyinzi gyi la kolwa mmadiku gatano na lilala; navutswa lidiku lya gatano na gaviri li veye lisabato lyobusosi bwelyehodziridza, litakatifu ku Yahova; ku vosi u kola kali muyinzi mulala ku lidiku lyelisabato, ligali a liitwa.

¹⁶ Kunangwa avana va Israeli va la gumira lisabato, kuhenza lisabato mu visukululwi vyavo, li ve lilagana lyemihiga nemihiga.

¹⁷ Li veye lilolekidza hagati hange na avana va Israeli lyemihiga nemihiga: kigira mmadiku gatano na lilala Yahova ya lomba ligulu na lirova, na ku lidiku lya gatano na gaviri yelemeridza nokusosa.

¹⁸ Na Yahova lwa ya mala kuvolerana na Musa mu kigulu kya Sinai ya mu ha vibao viviri vyelilolekidza vibao vya magina, vya Nyasaye ya ng'oda nekidete kikye.