Kutwula 22 - KITABU KITAKATIFU

¹ Mundu na a va ni yiba ing'ombe, kinga ligondi, ni yiita, kinga na a gulidza; a la leta tsing'ombe tsitano kigira ing'ombe, na magondi gane kigira ligondi.

² Mwivi na a loleka na a hudulanga, na a kuywa kuduka likudza, si a la vanzirwa masahi gege mba.

³ Liuva ni li twuliye kuye, a la vanzirwa masahi gege; ga mu dukira kuhaana mitungu kudukana: na a va na a ta veye nekindu, a la gulidzirwe kigira ubwivi bwibwe.

⁴ Na kindu kiibwa ni ki nyoleka mu mukono gwigwe, ni kiri mwoyo, ni i va ing'ombe, kinga isukiri, kinga ligondi; a la tunga hali kaviri.

⁵ Mundu na a kola mulimi, kinga mulimi gwamazabibu kulibwa, na a leka mutugu gwigwe kugendagenda, nagwo ni gu lia mulimi gwomundu wundi; a la tunga ku vindu vyomulimi gwigwe mwene, noku vyamazabibu gege vi veye vilahi kuvita.

⁶ Muliru ni gu hamba, nokugumira amafwa, kuduka ku maboho gobuswage, kinga ku bu kikiri kugeswa, kinga mulimi ni gu hya; uyu wa hambidza muliru, ligali a la tunga.

⁷ Mundu na a ha wundi ifetha, kinga vindu vindi, a mu lindire, navyo ni vibirwa mu inyumba yeye, mwivi na a nyoleka, a la tunga hali kaviri.

⁸ Na mwivi na a vula kunyoleka, mwene inyumba a lisunda imbiri wa Nyasaye, kulola na a veye iye wa nyira mukono gwigwe kuvugula viju vyowakye, naho si a li iye.

⁹ Ku mahyolo gosi, ni ga veye kigira ing'ombe, kinga isukiri, kinga ligondi, kinga ingubo, kinga ku vindu tsingano tsyosi vi goti, kya mulala a vola, Ni yiki, likuva lyavandu vombi li la letwa imbiri wa Nyasaye; na uyu wa Nyasaye a kalagira kuva muhyoli a la tunga wakye hali kaviri.

¹⁰ Mundu na a va na a ha wakye isukiri, kinga ing'ombe, kinga ligondi, kinga mutugu ku gyosi, a ki linde; na ki kudza, kinga ki salira, kinga ki kungwa, na mundu a vula kukilola:

¹¹ lisuha lya Yahova li la va hagati havo vombi, na a va ni ya nyira mukono gwigwe kuvugula kindu kya wakye naho mba; na uyu mwene kindu a la bugirira, na si a la mwiranyira.

¹² Navutswa ni ki va ni kibiwa kuye a liranyira mwenekyo litunga li dukana.

¹³ Ni ki va ni kya donyanywa, a ki lete ki ve kilolekidzu; si a la tunga mba kya donyanywa.

¹⁴ Mundu ni yekopa kindu kyomutende ni kyoneka, kinga ki kudza, na mwene na a ta li halala nakyo, ligali a la tunga.

¹⁵ Navutswa mwene na a va na a veye halala nakyo, si a la tunga mba: na a va na a veye mutungwa, litungwa lilye li la gota.

¹⁶ Mundu na a va na a volidza mukana mugima u kikiri kukwebwa, na a va halala naye, ligali a la haana enko kigira uyu kuva mukali wewe.

¹⁷ Dada wewe na a sula ligali kumuha, a la tunga ifetha kudukana nevindu vyenko vyavakanavagima.

¹⁸ U ta leka mukali mukumu kuva mwoyo.

¹⁹ Ku vosi mundu na a gona nomutugu ligali a liitwa.

²⁰ Uyu wiita isadaka ku munyasaye wundi, na a ta li Yahova ying'ine, a dividzwe ligali.

²¹ U ta tindira mugeni, kandi u ta mu kolera kirage: kigira mwinye mwa li avageni mu kivala kya Egepeti.

²² U ta kupidza kivi mukunzakali wekikali, kinga mwana mbisandu.

²³ Nu u va nu u va kupidza kivi mu kindu ku vyosi, navo ni vanira inze kali hakuzu, ligali nda hulira lilira lyavo;

²⁴ nobutima bwange bu laaka muliru, na nda mwiita nekivavi; na avakali venyu va la va avakunzakali, na avana venyu avabisandu.

²⁵ Nu u va nu u hambidza kivete, mundu mudaka ku avandu vange va u veye halala navo, u ta va kuye kuli u mbanzanga; kandi u ta vika kuye kyambeti.

²⁶ Nu u va nu u vugula ingubo yowakvo kuva kihambiriru, ga ku dukira kwirannya inyinga liuva li kikiri kuyera:

²⁷ kigira ingubo i veye kyokwefuma kikye kyeng'ine, i veye ingubo yeye yeligodo lilye: a la gonera ki? Na ga la duka lwa a lanira inze, nda hulira; kigira mbeye netsimbabasi.

²⁸ U ta legeridza Nyasaye, kandi u ta laama munene wavandu vovo.

²⁹ U ta lindagira kuleta ku vigese vivyo, kinga ku vyokunwa vivyo. Wa tanga kwivulwa ku avana avayai vovo u la mpa.

³⁰ Kandi u la kola ndiyo ku tsing'ombe tsitsyo, noku magondi gogo: u la vi leka madiku gatano na gaviri halala na mama wavyo; na lidiku li kola gatano na gavaka u la mpa.

³¹ Mu ve avatakatifu ku inze: kigira yaga mu ta lia inyama ya tsinyama tsyomigendinyama tsya donyanya; mu he tsimbwa.