Kutwula 20 - KITABU KITAKATIFU

¹ Na Nyasaye ya vola makuva yaga gosi, na a vola,

² Inze mbeye Yahova Nyasaye wowo, wa ku twulidza mu kivala kya Egepeti, mu inyumba yobutugwa.

³ U ta va na vanyasaye avandi imbiri wange mba.

⁴ U telombera kifwananyi kya vadzwa mba, kali kifwananyi kyekindu kyegulu, kinga kyomu lirova hasi, kinga kyomu amadzi isi welirova:

⁵ u ta vi sigamira mba, u ta vi tumekira mba; kigira inze Yahova Nyasaye wowo mbeye Nyasaye wokukendeka, u vikanga ubudamano bwavadada ku avana, kuduka ku likula lyakavaka kinga lya kane ku yavo ava dunyira inze,

⁶ kandi mba vera tsimbabasi ava yanza inze ni va gumira malago gange, kuduka tsielfu.

⁷ U ta tala vutswa lieta lya Yahova Nyasaye wowo; kigira Yahova si a la vula kulola mahyolo ku uyu u talanga vutswa lieta lilye.

⁸ Widzulitse lidiku lyelisabato kulitakasa.

⁹ Madiku gatano na lilala u yinzire, na u kole miyinzi gyigyo gyosi;

¹⁰ navutswa lidiku lya gatano na gaviri li veye lisabato lya Yahova Nyasaye wowo: kulyo u ta kola miyinzi gyigyo mba, ive, kinga mwana wowo muyai, kinga mwana wowo mukana, kinga mutugwa wowo muyai, kinga mutugwa wowo mukana, kinga mitugu gyigyo, kinga mu geni u veye hango hoho:

¹¹ kigira mu madiku gatano na lilala, Yahova ya lomba ligulu na lirova, na inyanza, na vyosi vi veye muvyo, na a sosa ku lidiku lya gatano na gaviri: kigira yaga Yahova ya gasidza lisabato, na a li takasa.

¹² Widzominye dada wowo na mama wowo, madiku gogo ga ve manyingi mu kivala kya Yahova Nyasaye wowo a ku ha.

¹³ U tiita mba.

¹⁴ U ta heya mba.

¹⁵ U tiba mba.

¹⁶ U ta gina wakyo mba.

¹⁷ U ta kayirwa inyumba yowakyo mba, u ta kayirwa mukali wowakyo mba, kinga mutugwa muyai wewe, kinga mutugwa mukana wewe, kinga ing'ombe yeye, kinga isukiri yeye, kinga kilala ku vyosi vya a veye navyo.

¹⁸ Na avandu vosi va hulira tsinkupa, nokulola tsimpeni, nokuhulira mwoyo gwekisiliva, na kigulu kya vuva mwoki: na lwa avandu va lola yivi va degera, ni va singira ihale.

¹⁹ Na va volera Musn, U volerane na kwinye, na ku la ku hulira; navutswa Nyasaye a ta volerana na kwinye mba, gase ku la kudza.

²⁰ Na Musa ya volera avandu, Mu ta tia mba: kigira Nyasaye a duki ku minye kumugeridza, kandi litibwa lilye li ve imbiri wenyu mu vule kukola ubwoni.

²¹ Na avandu va singira ihale, na Musa yesunda ku kisundi kinene ha Nyasaye ya li.

²² Kandi Yahova ya volera Musa, U volere avana va Israeli likuva yili, Mwinye avene mu loli kuli inze mbolerani nemwinye kutwula migulu.

²³ Mu ta lomba avanyasaye avandi halala na inze mba; avanyasaye vefetha, kinga avanyasaye vethahabu, mu telombera mba.

²⁴ U la nombera ubwali bwamarova, na u liitira tsisadaka tsyvokusambwa kubwo, na tsisadaka tsyemirembe tsitsyo, magondi, na tsing'ombe tsitsyo: hosi ha mbika lidzulitswa lyelieta lyange, hene yaho nda duka ku ive na nda ku gasidza.

²⁵ Nu u va nu u nombera ubwali bwamagina, u ta bwombaka namagina ga vadzwa; kigira nu u va nu u ginga kiju kikyo kugavadza, ula bwononya.

²⁶ Kandi u ta nina ku bwali bwange ku vikaa, kyahonyo kikyo ki vule kuloleka kubwo.