Kutwula 2 - KITABU KITAKATIFU

¹ Kunangwa mundu wenyumba ya Levi ya tsia na a vugula mukali ku avakana va Levi.

² Na mukali uyu ya vereka, na yivula mwana muyai: na lwa ya mu lola na a veye mwana mulahi, ya mu visa miyeli gyivaka.

³ Na lwa ya vula kunyala kumuvisa kandi, ya mu vugulira akatu kelihunzu, na a ka vaka ubudohi ne irangi, na a vika mu mwana; na a ka veka mu lihunzu li veye ku luginga lwomugera.

⁴ Na mbotso wewe ya singira ihale, a duke kumanya aga kolwa kuye.

⁵ Na mukana wa Farao ya sulunguta ku mugera kwisinga; na avakana avatugwa veve va genda ku luginga lwomugera; naye ya lola akatu mu lihunzu, na a tuma mukana kukaleta.

⁶ Na ya ka kunula, na a lola mwana: na, henza, mwana ya lira. Naye ya mu vererera, na a vola, Uyu nu mulala ku avana va Vahebraina.

⁷ Kunangwa mbotso wewe ya volera mukana wa Farao, U yanza ntsie kulanga muleri mu avakali va Avahebraina, a duke kukunyunyira mwana?

⁸ Na mukana wa Farao ya mu volera, Tsia. Na mukana ya tsia na a langa mama womwana zana.

⁹ Na mukana wa Farao ya mu volera, U hile mwana uyu u tsie kunyunyira, na nda ku ha madanyi gogo. Na mukali ya vugula mwana, na a mu nyunya

¹⁰ Na mwana ya viruka, naye ya mu leta ku mukana wa Farao, na ya gwa mwana wewe. Naye ya mu gulika Musa, na a vola, Kigira nda mu twulidza mu madzi.

¹¹ Kunangwa mu madiku yago, Musa lwa ya duka kuva mukulundu, ya twula na a tsia ku avamwavo veve, na a henza misigo gyavo: naye ya lola Muegepeti a kuyanga Muhebraina, mulala ku avamwavo veve.

¹² Naye ya henza yiyi na yiyi, na lwa ya lola si ha li nomundu, yiita Muegepeti na a mu visa mu muyeke.

¹³ Na ya twula kandi lidiku lya kaviri, na henza, avandu vaviri ku Avahebraina va kupananga: naye ya volera uyu wa tindiranga wakye, Kigira ki u duyanga wakyo?

¹⁴ Naye ya tivula, Ni bwaha wa ku vika kuva mwami na mukalagi ku kwinye? U ganagana kunziita, kuli wa li kwiita Muegepeti? Na Musa ya tia, na a vola, Nkani inkuva yiyi i manyekani ligali.

¹⁵ Na lwa Farao ya hulira inkuva yiyi, yenya kwiita Musa. Navutswa Musa yiruka kutwula imbiri wa Farao, na a menya mu kivala kya Midiani: naye yikala hasi himbi nekidaho.

¹⁶ Na musalisi wa Midiani ya li na avakana vatano na vaviri: navo vadza kudaha amadzi, nokwizulitsa milinga kunwehidza kyayo kya dada wavo.

¹⁷ Na avayi vadza ni va va kunga; navutswa Musa ya singira na a va konya, na a nwehidza kyayo kyavo.

¹⁸ Na lwa va duka ku Reueli dada wavo, ya vola, Mwa li ndi ni mu duka bwangu lero?

¹⁹ Navo va vola, Muegepeti ya ku twulidza mu makono ga avayi, kandi ya ku dahira amadzi, nokunwehidza kyayo.

²⁰ Naye ya teva avakana veve, na a vola, A veye haliha? Kigira ki mu leki mundu uyu? Mu mlange a lie vyokulia.

²¹ Na Musa ya manya, na a menya halala na mundu uyu: na ya ha Musa Zipora mukana wewe.

²² Naye yivula mwana muyai, na ya mu gulika Gerishom; kigira ya vola, Mbeye mumenya mu kivala kyobumenya.

²³ Kunangwa inyima wa madiku yago manyingi, mwami wa Egepeti ya kudza: na avana va Israeli va kenva kigira ubutugwa, na va lira na lilira lyavo lya duka imbiri wa Nyasaye kigira ubutugwa.

²⁴ Na Nyasaye ya hulira likenya lyavo, na Nyasaye yidzulitsa lilagana lilye lya ya kola na Abrahamu, na Isaka, na Yakobo.

²⁵ Na Nyasaye ya lola avana va Israeli, na Nyasaye ya va manya.