Kutwula 18 - KITABU KITAKATIFU

¹ Kunangwa Jethro, musalisi wa Midiani, navizala wa Musa ya hulira gosi ga Nyasaye ya kolera Musa, na Israeli avandu veve, kuli Yahova ya twulidza Israeli mu Egepeti.

² Na Jethro, navizala wa Musa, ya vugula Zipora, mukali wa Musa, inyima wa ya mu galukidza

³ halala na avana veve vaviri, ava lieta lya mulala lya gulikwa Gerishom; kigira ya vola, Inze mmenyanga mumenya mu kivala kyobumenya:

⁴ na lieta lya wundi lya gulikwa, Eliezeru; kigira ya vola Nyasaye wa dada wange, ya li mukonyi wange, na a nkonya ku kivavi kya Farao:

⁵ na Jethro, navizala wa Musa, yadza ku Musa, halala nomukali wa Musa na avana veve, mwigendinyama ha ya lomba busosero bwibwe, ha kigulu kya Nyasaye:

⁶ naye ya volera Musa Inze Jethro, navizala wowo, nduki ku ive, halala nomukali wowo na avana veve vaviri halala naye.

⁷ Na Musa ya twula na a tsia kuvugana na navizala wewe, naye ya mu sigamira, na a mbusa; ni va tevana liva lyavo; navo vingira mu lihema.

⁸ Na Musa ya volera navizala wewe gosi ga Yahova ya kolera Farao, noku Avaegepeti kigira Israeli, na lidambidza lyosi lya va gwira ku inzira na kuli Yahova ya va honnya.

⁹ Na Jethro ya sangala kigira ubulahi bwosi bwa Yahova ya kolera Israeli kuli ya va honnya mu makono ga Avaegepeti.

¹⁰ Na Jethro ya vola A gasidzwe Yahova, wa mu twulidza mu mukono gwa Avaegepeti, nonlu mukono gwa Farao; wa honnya avandu yava va twule mu mukono gwa Avaegepeti.

¹¹ Kalunu mmanya Yahova a veye munene kuvita avanyasaye vosi; yee, mu inkuva ya va kola noluyai kuvo.

¹² Na Jethro, navizala wa Musa, ya vugulira Nyasaye kihaanwa kyokusambwa netsisadaka: na Haruni ya tsia, na vakulundu vosi va Israeli, kulagira ubu kima halala na navizala wa Musa, imbiri wa Nyasaye.

¹³ Kunangwa, mugamba Musa yikala kulungikidza makuva ga avandu: na avandu va singira kukumbiridza Musa kutwula muganba kuduka mgolova.

¹⁴ Na lwa navizala wa Musa ya lola gosi aga ya kolera avandu, ya vola, Inkuva ki yiyi ya u koleranga avandu? Kigira ki ive wikaye weng'ine, na avandu vosi va ku kumbiridza kutwula mugamba kuduka mgolova?

¹⁵ Na Musa ya volera navizala wewe, Kigira avandu vadza ku inze kuteva Nyasaye:

¹⁶ lwa va veye nenkuva, vadza ku inze; na inze nkalaga hagati ha mundu nomutende wewe, kandi mbegidza megidzo ga Nyasaye na malago gege

¹⁷ Na navizala wa Musa ya mu volera, Inkuva ya u kola si i veye indahi mba.

¹⁸ Ligali u la kamuluka, ive na avandu yava ava veye halala na ive: kigira inkuva i veye indiduhu kuvita ive; ive si u nyala kugikola weng'ine.

¹⁹ Kalunu u hulire mwoyo gwange, na nda ku ha inkuva indahi, na Yahova a ve halala na ive: ive u la singirira avandu imbiri wa Nyasaye, na u la hila makuva gavo imbiri wa Nyasaye:

²⁰ na u la vegidza megidzo na amalago ga Nyasaye, na ive u la va mannya inzira ya va li genda ku, na miyinzi gya va li kola.

²¹ Kandi u la tovola ku avandu vosi, avandu avobunyali, ava tia Nyasaye, avandu va ageligali, ava vihirirangwa vyambeti vyobukyamu; na yava u la va singeridza kuva avanene vetsielfu, na avanene vetsimia, na avanene va makumi gatano, na avanene va makumi:

²² navo va la kalaga makuva ga avandu kazozo: kandi ku makuva gosi, li veye linene li la letwa ku ive, navutswa makuva makekeke va la kalaga avene: kunangwa ive u la nyola ubwiyangu mwene, navo va la ginga musigo halala na ive.

²³ Nu u va nu U kola inkuva yiyi, na Nyasaye a ku laga ndiyo, hene yaho u la nyala kusingira, na avandu yava vosi va la tsia havo nemirembe.

²⁴ Kunangwa Musa ya hulira mwoyo gwa navizala wewe, naye ya kola gosi ga ya mu volera.

²⁵ Na Musa ya tovola avobunyali mu Israeli yosi, naye ya va vika kuva mitwe ku vandu, avanene vetsielefu, na avanene vetsimia, na avanene va makumi gatano, na avanene va makumi.

²⁶ Navo va kalagira avandu kazozo: na makuva madinyu va leta ku Musa, navutswa makuva makekeke va kalaga avene.

²⁷ Na Musa ya sivulana na navizala wewe; naye ya tsia mu kivala kikye mwene.