Kutwula 17 - KITABU KITAKATIFU

¹ Na livugana lyosi lya avana va Israeli va samula kutwula mu kyangalangwi kya Sini, ku tsingendo tsyavo kuli Yahova ya va laga, ni va lomba lisosa lyavo mu Refidim: na amadzi ga vula kuva ho, avandu va nwe.

² Kigira yaga avandu va hing'ana na Musa, ni va vola, U ku he amadzi, ku nwe. Na Musa ya va volera, Kigira ki mu hing'ana ninze? Kigira ki mu geridza Yahova?

³ Na avandu va nyola yo ubuluhu; na avandu va monya Musa, ni va vola, Kigira ki wa kwanegiridza kutwula Egepeti kukwiita na avana vetu, nemitugu gyetu nobuluhu?

⁴ Na Musa yanira Yahova, na a vola, Nda kola ki ku avandu yava? Va veye himbi kundasa magina.

⁵ Na Yahova ya volera Musa, Vita wimire imbiri wa avandu, na u hile halala na ive avalala ku vakulundu va Israeli; na impimbo yoyo, ya wa duyira mugera, u vugule mu mukono, gugwo, na u tsie.

⁶ Henza, nda singira yo imbiri wowo ku lwanda lwa Horebu; na u la duya lwanda, na amadzi ga la twula kulwo, avandu va duke kunwa. Na Musa ya kola ndiyo imbiri wa avakulundu va Israeli.

⁷ Naye ya gulika ha zana Masa, na Meriba, kigira lihing'ana lya avana va Israeli, kandi kigira va geridza Yahova, ni va teva, Yahova a veye hagati hetu, naho mba?

⁸ Kunangwa Amaleki vadza, ni va lwana na Israeli mu Refidim.

⁹ Na Musa ya volera Joshua, U ku tovolere avandu, na u tsie kulwana na Amaleki: mugamba nda singira ku kigulu, nempimbo ya Nyasaye mu mukono gwange.

¹⁰ Hene yaho Joshua ya kola kuli Musa ya mu volera, na a lwana na Amaleki: na Musa, na Haruni, na Huru vanegira ku kigulu.

¹¹ Kunangwa lwa Musa ya ginga mukono gwigwe, Israeli va guuta; na lwa yekidza mukono gwigwe, Ama leki va guuta.

¹² Navutswa makono ga Musa ga lutsivira; na va leta ligina ni va li vika isi wewe, naye yikala ku, na Haruni na Huru va ginga makono gege, mulala ku luvega lulala, na wundi ku luvega lundi; na makono gege ga dinyeridzwa kuduka lwa liuva lya yera.

¹³ Na Joshua ya guuta Amaleki na avandu veve nobwogi bwekivavi.

¹⁴ Na Yahova ya volera Musa, U ng'ode yaga mu kitabu, ga ve gokwidzolitsa, kandi u ga vole mu amatu ga Joshua: kuvola Inze ndononnya Amalelii ligali kuvatwulidza isi weligulu.

¹⁵ Na Musa yombaka bwali, na ya bu gulika Yahovanisi;

¹⁶ na ya vola, Yahova yesuha: Yahova a la va nobulwani na Amaleki ku makula na makula.