Kutwula 12 - KITABU KITAKATIFU

¹ Kandi Yahova ya volera Musa na Haruni mu kivala kya Egepeti, na a vola,

² Mweli guno gu la va ku mwinye litanga lyemiyeli: gu la va gwokutanga muhiga ku mwinye.

³ Mu volere livugana lyosi lya Israeli, na mu vole, Lidiku lyelikumi lyomweli yigu va la vugula sa mulala mwana weligondi, kuli tsinyumba tsya vadada vavo tsi veye, mwana weligondi ku avandu venyumba:

⁴ ni i va avandu venyumba va gehera kulia mwana weligondi, hene yaho uyu na mutende wewe va vugule lilala kuli livalidza lya vandu vavo; kuli lilia lyomundu sa mulala li veye, ni ndiyo mu la validza ku mwanaweligondi.

⁵ Na mwana weligondi lyenyu li la va lidukanu, bugira kindu kidamano likole lyomuhiga mulala: mu la ii vugula mu magondi, kinga mu tsimbuli:

⁶ na mu la li vika haluvega kuduka ku lidiku lye likumi na gane lyomweli zana; na livugana lyosi lya avana va Israeli va la liita mgolova.

⁷ Kandi va la vugula masahi, nokugavika ku maliva noku vividiru vyetsinyumba tsya mu li lira mu ligondi zana.

⁸ Na va la lia inyama yalyo mn budiku yibwo, i sambeywi, nobukima bu ta li na mamera; netsingutsa tsindulu va la gi lia.

⁹ Mu ta gi lia imbisi, kinga yinwa mmadzi, navutswa i sambeywi; mutwe gwalyo, nevirenge na vyomunda vyalyo.

¹⁰ Kandi mu ta leka kindu kyalyo kali kilala ki tigale kuduka mugamba mba; navutswa kindu ki tigala kuduka mugamba mu la ki samba nomuliru.

¹¹ Na mu la lia ndi: vikenge vyenyu vi bofwe, na mwivike vilatu vyenyu ku virenge vyenyu, na mu ve nempimbo yoyo mu mukono gugwo; na mu la li lia bwangu: li veye lipasaka lya Yahova.

¹² Kigira nda vita hagati hekivala kya Egepeti mu budiku yibwo, na nda kuya avatanga kwivulwa vosi ava veye mu kivala kya Egepeti, ku vandu noku mitugu; na nda leta likalaga ku vanyasaye vosi va Egepeti: Inze mbeye Yahova.

¹³ Na masahi ga la va ku mwinye kilolekidzu ku tsinyumba tsya mu veye mu: na lwa ndola masahi, nda vita ku mwinye, na si ha la va ku mwinye likuya lyokumwononya, lwa nkuya kivala kya Egepeti.

¹⁴ Na lidiku yili li la va lyokwidzulitsa ku mwinye, na mu la li linda li ve lidiku linene ku Yahova: mu visukululwi vyenyu mu la li linda li ve lidiku linene kuva lilaga lyemihiga nemihiga.

¹⁵ Mu la lagira ubukima bu ta li namamera madiku gatano na gaviri; ku lidiku lyokutanga mu la twulidza mamara gosi mu tsinyumba tsyenyu: kigira ku vosi u lagira ubukima bwa mamera kutwula ku lidiku lyokutanga kuduka ku lidiku lya gatano na gaviri mundu uyu a la twulidzwa mu Israeli.

¹⁶ Kandi mu lidiku lyokutanga li la va ku mwinye livugana litakatiiu, kandi lidiku lya gatano na gaviri li la va livugana litakatiiu; mu madiku yago si gu la kolwa miyinzi kali mulala ku tsingano tsyosi, ni gu ta li miyinzi gyevyokulia vya ga dukira mundu sa mulala kulia, yigu gweng'ine mu nyala kukola.

¹⁷ Na mu la linda lilia lyobukima bu ta li na mamera; kigira mu lidiku zana yili ntwulidzi amahe genyu mu kivala kya Egepeti: kigira yaga mu la linda lidiku yili mu visukululwi vyenyu vyosi mu lilaga lyemihiga nemihiga.

¹⁸ Mu mweli gwokutanga, ku lidiku lyelikumi na gane lyomweli inyinga ya mgolova, mu la lagira ubukima bu ta li na mamera, kuduka ku lidiku lyomweli lya makumi gaviri na lilala mgolova.

¹⁹ Madiku gatano na gaviri ga ta loleka mamera mu tsinyumba tsyenyu: kigira ku vosi u lagira bwamamera, mundu uyu a la twulidzwa mu livugana lya Israeli, na a va na a veye mumenya, kinga mwivulwa mu kivala.

²⁰ Mu ta lagira kindu kali kilala kya mamera; mu la lagira ubukima bu ta li na mamera mu tsinyumba tsyenyu tsyosi.

²¹ Hene yaho Musa ya langa avakulundu vosi va Israeli, na a va volera, Mu twule kalunu, mu vugule avana va magondi kuli avetsinyumba tsyenyu va veye, mwiite lipasaka.

²² Kandi mu la vugula masanzu ga husupo nokwina mmasahi ga veye mu kituva, nokukupa ku kividiru, noku maliva na masahi ga veye mu kituva; na kuduka mugamba mundu ku mwinye kali mulala a ta tsia kyova.

²³ Kigira Yahova a la vita hagati hekivala kukuya Avaegepeti; na hosi ha a lola masahi ku kividiru, noku maliva, Yahova a la vita ku muliango yigwo, na si a la leka mwononyi kuingira mu tsinyumba tsyenyu kumukuya mba.

²⁴ Kandi mu la linda inkuva yiyi i ve lilaga ku ive noku avana vovo mihiga nemihiga.

²⁵ Kunangwa, lwa mu li duka mu kivala kya Yahova a la mu ha, kuli ya mu suuviridza, mu la gumira ubutumiki yibu.

²⁶ Kunangwa, lwa avana venyu va li mu teva, Ga veye ki ku mwinye, ubutumiki yibu?

²⁷ Hene yaho mu la vola, I veye isadaka yelipasaka lya Yahova, wa vita ku tsinyumba tsya avana va Israeli mu Egepeti, lwa ya kuya Avaegepeti, nokuhonya tsinyumba tsyetu. Na avandu vinaminya mutwe nokusigamira.

²⁸ Na avana va Israeli va tsia ni va kola ndiyo; kuli Yahova ya laga Musa na Haruni, va kola ndiyo.

²⁹ Kunangwa ubudiku hagati, Yahova ya kuya avatanga kwivulwa mu kivala kya Egepeti, kutanga ku wa tanga kwivulwa wa Farao wikala ku intebe yeye yobwami, kuduka ku wa tanga kwivulwa wa uyu wa bofwa wa li mu inyumba ya hasi yavahambe; kandi ku vyosi vya tanga kwivulwa ku mitugu.

³⁰ Na Farao ya vuka ubudiku, uyu, na avatumekiri veve vosi, na Avaegepeti vosi; ha li nelilira linene mu Egepeti; kigira si ha li nenyumba kali indala yomundu ya vula kukudza mba.

³¹ Naye ya langa Musa na Haruni mu budiku, na a vola, Mu vuke, mu twule hagati ha vandu vange, mwinye na avana va Israeli; mu tsie kutumekira Yahova kuli mu voye.

³² Kandi mu hile magondi genyu, na tsing'ombe tsyenyu, kuli mu voye, mu tsie; na mu ngasidze kandi.

³³ Kandi Avaegepeti va goonya avandu yavo, kuvatuma va twule mu kivala bwangu; kigira va vola, Kwinye kwosi ku veye avakudzu.

³⁴ Na avandu va vugula ubusie bwobukima ni bu kikiri kuvikwa mamera, na viju vyavo vyokulugira vya bofwa mu tsingubo tsyava ku mavega gavo.

³⁵ Na avana va Israeli va kola kuli likuva lya Musa; ni va teva Avaegepeti viju vyefetha, na vi ju vyethahabu, ne tsingubo:

³⁶ na Yahova ya va ha liverererwa imbiri wa Avaegepeti, kuduka navo va va ha vyosi vya va teva. Navo va lanya Avaegepeti.

³⁷ Na avana va Israeli va tsia lugendo kutwula Ramesese kuduka Sukothu, livalidza lyavo lya li kuli avandu avasatsa tsielfu tsimia tsitano na indala, na avana halala navo.

³⁸ Na kandi kiduma kinene ku yava ava hambana navo va tsia halala navo; kandi magondi, netsing'ombe, kuduka imitugu minyingi muno.

³⁹ Navo vuminya ubukima bu ta li na mamera bwobusie bwa va leta kutwula Egepeti; kigira si bwa vikwa mu mamera, kigira va kungwa kutwula mu Egepeti, na si va nyala kulindagira mba, kandi navo va li ni va kikiri kwelombera vyokulia.

⁴⁰ Kunangwa inyinga ya avana va Israeli va menya mu Egepeti gya li mihiga tsimia tsine nemihiga makumi gavaka.

⁴¹ Kunangwa, inyinga yemihiga tsimia tsine nemihiga makumi gavaka, kali ku lidiku zana yili, ga duka amahe gosi ga Yahova ga twula mu kivala kya Egepeti.

⁴² Bu veye ubudiku bwa ga dukiranga kwizulitswa ligali imbiri wa Yahova, kigiraya va twulidza mu kivala kya Egepeti: yibu nobudiku bwa Yahova, bwa ga dukiranga kulindwa ligali na avana vosi va Israeli mu visukululwi vyavo vyosi.

⁴³ Na Yahova ya volera Musa na Haruni, Lilaga lyelipasaka ni yili: Mundu wehiri yindi si a la lia ku mba;

⁴⁴ navutswa mutugwa womundu sa mulala wa gulwa nefetha, lwa u mali kumukeva, kunangwa a la lia ku.

⁴⁵ Mumenya na mutumekiri u tungangwa, si va la lia ku mba.

⁴⁶ Va la li lia mu inyumba indala; si u la hila kyova kali kilala kyenyama yalyo kutula mu inyumba; kandi u ta vunanya kigumba kyalyo kali kilala.

⁴⁷ Livugana lyosi lya Israeli va la kola inkuva yiyi.

⁴⁸ Na mumenya u menyanga halala nive, ni yenya kulombera Yahova lipasaka, avekisatsa veve vosi va kevwe, kunangwa yesunde himbi kulilomba; naye a la fwanana nomundu wivulwa mu kivala kyenyu: navutswa mundu kali mulala u vula kukevwa a ta lia ku mba.

⁴⁹ Lilaga lilala li la va ku uyu wivulwa ku mwinye, noku mumenya u menyanga hagati henyu.

⁵⁰ Na avana va Israeli vosi va va kola ndiyo; kuli Yahova ya laga Musa na Haruni, va kola ndiyo.

⁵¹ Kunangwa lidiku zana yili, Yahova ya twulidza avana va Israeli mu kivala kya Egepeti na amahe gavo.