Kutwula 10 - KITABU KITAKATIFU

¹ Na Yahova ya volera Musa, Ingira ku Farao: kigira inze mmali kudinyiridza mwoyo gwigwe, na mwoyo gwavatumekiri veve, nduke kulang'aminya vilolekidzu yivi vyange hagati havo,

² kandi u duke kuvola mu matu gomwana wowo, nomu agevisukulu vovo, vya nkoli ku Egepeti, na vilolekidzu vyange vya nkoli hagati havo; mwinye mu duke kumanya inze mbeye Yahova.

³ Na Musa na Haruni vingira ku Farao, nava mu volera, Yahova Nyasaye wa Vahebraina a vola, U la sula kwegehidza imbiri wange kuduka inyinga ki? U lakule avandu vange va tsie kuntumekira.

⁴ Naho nu u sula kulakula avandu vange va tsie, henza, mugamba nda leta tsisigi tsingire mu kivala kikyo:

⁵ na tsi la kunika lirova lyosi, kuduka mundu si a nyala kulola lirova: natsyo tsi la lia vya tigala ku mwinye, vya hona ku imbula yamagina, na tsi la lia misala gyosi gya merera mwinye mu mulimi:

⁶ na tsinyumba tsitsyo, na tsinyumba tsya vatumekiri vovo, na tsinyumba tsya Vaegepeti vosi, tsi lizula; na lilwana lyatsyo avadada vovo navaguga vovo si va lola, ku kutwula ku lidiku lya va tanga kuva ho ku lirova kuduka lero. Naye ya girunkana na a twula ku Farao.

⁷ Na avatumekiri va Farao va mu volera, Mundu uyu a la va mutego ku kwinye kuduka inyinga ki? U lakule avandu va tsie, va tumekire Yahova Nyasaye wavo: u kikiri kumanya Egepeti kyoneki?

⁸ Na Musa na Haruni va letwa kandi imbiri wa Farao: naye ya va volera, Mu tsie, mu tumekire Yahova Nyasaye wenvu; navutswa ni vanga bwaha va la tsia?

⁹ Na Musa ya vola, Ku la tsia na avana vetu na vasakulu vetu; na avayai vetu na vakana vetu, na magondi getu na tsing'ombe tsyetu ku la tsia; kigira ga ku dukira kulombera Yahova lidiku linene.

¹⁰ Naye ya va volera, Ga ve ndiyo: Yahova a ve halala na mwinye, nduke kumulakula mu tsie, na avana venyu: henzi bulahi; kigira ubudamano bu veve imbiri wenyu.

¹¹ Ga ta va ndiyo: mu tsie mwinye avasatsa, mu tumekire Yahova; kigira ni yaga ga mwenyanga. Navo va kungwa kutwula imbiri wa Farao.

¹² Na Yahova ya volera Musa, Nyira mukono gugwo ku kivala kya Egepeti ku tsisigi, tsi duke kusenuka ku kivala kya Egepeti, na tsi lie vyosi vi meranga mu mulimi, kali vindu vyosi vya tigala ku imbula yamagina.

¹³ Na Musa ya nyira impimbo yeye ku kivala kya Egepeti, na Yahova ya leta imbuudza yevugwe ku kivala mbasu pei, nobudiku pei; na mugamba imbuudza yevugwe ya leta tsisigi.

¹⁴ Na tsisigi tsya senuka ku kivala kyosi kya Egepeti, na tsya menya mu kivala kyosi kya Egepeti; tsya li tsindamano ligali; si ha li ho netsisigi kuli yitsyo tsinyinga tsyosi, kandi inyima watsyo si tsi la va ho tsindi kuli yitsi.

¹⁵ Kigira tsya kunika kivala kyosi, kuduka kivala kya gwa kisundi; natsyo tsya lia vyosi vya mera ku kivala, na makuyu gosi gemisala gya tigala ku imbula yamagina: si ha tigala nekindu kivisi, musala kinga vya mera mu milimi, mu kivala kyosi kya Egepeti.

¹⁶ Hene yaho Farao ya langa Musa na Haruni bwangu; na ya va volera, Nkoleye Yahova Nyasaye wenyu ubwoni, noku mwinye.

¹⁷ Kunangwa kalunu, mwadza, mu samehe ubwoni bwange inyinga indala vutswa, mu saale Yahova Nyasaye wenyu, a twulidze ku inze likudza yili lyeng'ine.

¹⁸ Naye ya twula ku Farao, na a saala Yahova.

¹⁹ Na Yahova ya girunkanya imbuudza inene ligali i twule madioli, ya twulidza tsisigi nokutsihila mu Inyanza Inzakanyu; si tsya tigala kali indala mu kivala kyosi kya Egepeti.

²⁰ Navutswa Yahova ya dinnya mwoyo gwa Farao, naye si ya lakula avana va Israeli va tsie.

²¹ Na Yahova ya volera Musa, Nyira mukono gugwo kuhenidza migulu, ki duke kuva kisundi ku kivala kya Egepeti, kuduka va havatidze kisundi.

²² Na Musa ya nyira mukono gwigwe kuhenza migulu, na kya duka kisundi kinene mu kivala kyosi kya Egepeti kuduka madiku gavaka;

²³ si va lolana mulala nowakye, kandi mundu si ya twula ha ya li kuduka madiku gavaka: navutswa avana va Israeli vosi va li nobulavu mu tsinyumba tsyavo.

²⁴ Na Farao ya langa Musa, na a vola, Mu tsie, mu tumekire Yahova; navutswa mu leke magondi genyu na tsing'ombe tsyenyu vi tigale, yaga geng'ine: na avana venyu va tsie halala nemwinye.

²⁵ Na Musa ya vola, Ga ku dukira u ku he vihaanwa vyesadaka na tsisadaka tsyokusambwa, ku duke kulombera Yahova Nyasaye wetu isadaka.

²⁶ Imitugu gyetu gyi la tsia halala nekwinye; si ku la leka kali luhagayu lulala; kigira ga ku dukira kuvugula kuvyo ku tumekire Yahova Nyasaye wetu; na si ku manya kya ku tumekira Yahova nakyo, ku luhe ku duke yo.

²⁷ Navutswa Yahova ya dinyeridza mwoyo gwa Farao, naye ya sula kuvalakula va tsie.

²⁸ Na Farao ya mu volera, Twula ku inze, welinde mwene, u ta lola mmoni mwange kandi; kigira lidiku lya u lola mmoni mwange u la kudza.

²⁹ Na Musa ya vola, U voye bulahi; si nda lola mmoni mumwo kandi mba.