Kutwula 1 - KITABU KITAKATIFU

¹ Yaga ga veye ameta ga avana va Israeli, ava duka mu Egepeti, umundu sa mulala na avenyumba yeye vadza halala na Yakobo:

² Rubeni, Simeoni, Levi, na Yuda,

³ Isakari, Zebuloni, na Benjamini,

⁴ Dan na Nafitali, Gadi na Asheri.

⁵ Na vosi ava twula munda mwa Yakobo va li avandu makumi gatano na gaviri: na Yosefa va li na a veye mu Egepeti.

⁶ Na Yosefa ya kudza, na avamwavo veve vosi, na vosi velikula zana.

⁷ Na avana va Israeli va li nolwivulu ligali, ni va medeka munonono, nokuduka kuva vanyingi ligali, nokunyola tsingulu tsinyingi ligali; navo vizula kivala.

⁸ Kunangwa mwami muhya ya singira ku kivala kya Egepeti, wa vula kumanya Yosefa.

⁹ Naye ya volera avandu veve, Henza, avandu va avana va Israeli va veye vanyingi, kandi va veye netsigulu kuvita kwinye:

¹⁰ hambi, ku va kolere ubugeeri; gase va la medeka, na ga duke, inyinga yobulwani va la hambana na avasigu vetu, nokulwana na kwinye, nokutwula mu kivala.

¹¹ Kunangwa va vika kuvo avasingiriri kuvadambidza nemisigo gyavo. Navo vombakira Farao madala gokuvika mu ubutugi, Pithom na Ramesese.

¹² Navutswa kuli va meda lidambidza kuvo, na ndiyo kandi va kira kumedeka, nokulanda. Na va vihirirwa kigira avana va Israeli

¹³ Kunangwa Avaegepeti va tuga avana va Israeli ubutugwa ubudinyu:

¹⁴ na va kola liva lyavo bululu ku butugwa butinyu, ku miyinzi gyobudohi na gyamatafali, na gyemilimi ku tsing'ano tsyosi, ubutugwa bwavo bwosi, yibwo bwa va va tugwa mu nobutugwa budinyu ligali.

¹⁵ Kandi mwami wa Egepeti ya volera avivulidzi va Vahebraina, avomulala ya langwa Shifira, na wundi ya langwa Pua:

¹⁶ naye ya va volera, Lwa mwivulidzanga avakali va Vahebraina, nokuvalola mu livula; ni i va a veye mwana muyai, ma mu mwiite; navutswa ni i va a veye mukana, ma a la va mwoyo.

¹⁷ Navutswa avivulidzi va li ava tia Nyasaye, navo si va kola kuli mwami wa Egepeti ya va ha munwa, navutswa va linda avayai va ve mwoyo.

¹⁸ Na mwami wa Egepeti ya langa avivulidzi yavo, na a va teva, Kigira ki mu koli inkuva yiyi, nokulinda avana avayai va ve mwoyo?

¹⁹ Na avivulidzi va volera Farao, Kigira avakali va Avahebraina si va veye kuli avakali va Avagepeti; kigira vivula bwangu, na vivulanga mwivulidzi na a kikiri kuduka kuvo.

²⁰ Na Nyasaye ya kolera avivulidzi yavo bulahi: na avandu v a medeka, ni va kira kuva netsingulu tsinyingi.

²¹ Kunangwa, kigira avivulidzi va li ava tia Nyasaye, ya va singeridzira avetsinyumba.

²² Na Farao ya laga avandu veve, na a vola, Avana avayai vosi avivulwa mu va te mu mugera, na avana avakana vosi mu la va linda kuva mwoyo.