Kohelethu 9 - KITABU KITAKATIFU

¹ Mu yaga gosi nda vika mwoyo gwange kuhenzeridza yaga gosi: avobulungi, avobugeeri, na likola lyavo, vi veye mu makono ga Nyasaye; ni li veye liyanza, naho lidunya, mundu si a manya; yaga gosi ga veye imbiri wavo.

² Vindu vyosi vi duka ku vosi kuleng'ana: kindu kilala ki dukanga ku wobulungi noku mudamano; ku mulahi noku musiyeku noku uyu u ta li musiyeku; ku uyu u haananga kihaanwa noku uyu u ta haana kihaanwa; kuli mulahi a veye kandi wobwoni a veye ndiyo; uyu u suhanga a leng'ana kuli uyu u tidzanga lisuha.

³ Likuva yili li veye ubudamano mu gosi aga kolangwa isi weliuva, kindu kilala ki nyola vosi kuleng'ana: yee, kandi, mwoyo gwavana vavandu gwizula ubudamano, na ubulalu bu veye mu mwoyo gwavo inyinga va veye nelivamwoyo, na inyima wa yaga va tsia ku avakudzu.

⁴ Kigira ku uyu u hambanywa na va veye mwoyo vosi ha veye nelisuuvira kigira imbwa i veye mwoyo ni indahi kuvita king'ang'a kya kudza.

⁵ Kigira ava veye mwoyo va manya va la kudza: navutswa ava kudza si va manya kindu mba, kandi si va veye namadanyi kandi; kigira lidzulitswa lyavo li mali kwivirirwa.

⁶ Ubuyanzi bwavo kuli lidunya lyavo, na likendeka lyavo, yivi vyosi vya gota kale; kandi si va veye nekidieli mihiga nemihiga mu kindu kali kilala ki kolangwa isi weliuva.

⁷ Tsia ku inzira yoyo, lia vyokulia vivyo nobuyanzi, kandi u nwe iwaini yoyo nomwoyo gwobusangali; kigira Nyasaye u mali kubugirira miyinzi gyigyo.

⁸ Tsingubo tsitsyo tsi ve tsindavu kazozo; nomutwe gugwo gu vule kugehera maguta.

⁹ U menye nobusangali halala nomukali wa u yanza madiku gosi gelivamwoyo lilyo aga vutswa, aga ya ku ha isi weliuva, madiku gosi aga vutswa gogo: kigira nikyo kidieli kikyo kyelivamwoyo lilyo nomu lididikana lilyo lya u didikananga mu isi weliuva.

¹⁰ Ku vyosi kyomukono gugwo gu duka kukola, u ki kole netsingulu tsitsyo tsyosi; kigira si ha veye nemiyinzi, kinga livalidza, kinga limanya, kinga ubugeeri, mu kilindwa kya u tsitsanga mu.

¹¹ Na ndirana, nokulola isi weliuva, si va li yavo avetsimbiru ava guutanga mu ligerana, kinga mubulwani si va li avetsingulu ava guutanga, kandi si va li avobugeeri ava nyolanga vyokulia, kandi si va li avelimanya ava nyolanga ubutugi kandi si va li avasidza ava nyolanga liyanzidzwa; navutswa mundu sa mulala a veye ne inyinga yeye na inkavi yeye.

¹² Kigira mundu si a manyanga inyinga yeye: kuli tsisudzi tsi hambangwa mu muluvo mudamano, kandi kuli amanyonyi ga hambangwa mu vuginga, ni ndiyo avana vavandu va hambangwa nemitego mu tsinyinga tsindamano, lwa inkuva i va gwira nonoho.

¹³ Kandi ndoli ubugeeri isi weliuva kuli yibu, ni bwa loleka kuva ubugeeri bunene ku inze:

¹⁴ Ha li nelidala likekeke, navandu vakekeke va li mulyo; na yadza mwami munene kulwana nalyo, na ya li kumbiridza, nokwombaka tsimpinga tsinene kulyo.

¹⁵ Na ya li mulyo mundu mulala mudaka mugeeri, na ya honnya lidala nobugeeri bwibwe; navutswa si ha li nomundu widzulitsa uyu mundu mudaka.

¹⁶ Hene yaho nda vola, Ubugeeri nobulahi kuvita tsingulu halala na yaga ubugeeri bwomudaka uyu bwa legwa, na makuva gege si ga hulirangwa.

¹⁷ Ma kuva gavageeri aga hulirwa kalaha ga veye malahi kuvita lihanzuka lya uyu wamehanga hagati ha vasiru.

¹⁸ Ubugeeri nobulahi kuvita vyuma vyobulwani, navutswa mwoni mulala yononyanga vilahi vinyingi.