Kohelethu 7 - KITABU KITAKATIFU

¹ Lieta lilahi nobulahi kuvita maguta gobuguli budinyu; nelidiku lyelikudza, ni lilahi kuvita lidiku lyelivulwa lyomundu.

² Nobulahi kutsia ku inyumba ya va syomanga mu, kuvita kutsia ku ya va litsanga mu lisavo: kigira ni kyekiheri kyavandu vosi, uyu u veye mwoyo a la ganagana mmwoyo gwigwe.

³ Livererera ne lilahi kuvita liseka: kigira mwoyo gu sangalitsangwa neli vererera lyommoni.

⁴ Mwoyo gwo mugeeri gu veye mu inyumba ya va syomanga mu; navutswa mwoyo gwa vasiru gu veye mu inyumba yobukino.

⁵ Nobulahi kuhulira ligondoka lyavageeri, kuvita mundu kuhulira lwi mbu lwavasiru.

⁶ Kigira kuli liva lyomwoyo gwa mafwa ga twulikanga isi wenyingu, ni ndiyo liseka lyomu siru li veye: yaga kandi na ga vutswa.

⁷ Ligali linyaga li kolanga umundu mugeeri kuva musiru; na vikukula vyi gotidzanga limanya.

⁸ Kiheri kyekindu ni kilahi kuvita litanga lyakyo: na u veye mwekudziri mu mwoyo nomulahi kuvita u veye nomwoyo gwoluyai.

⁹ U ta va nomwoyo gwokuhyuhyukana kuduka kuvihirirwa: kigira ubutima bu me nyanga mu viritu vyavasiru.

¹⁰ U ta vola, Kigira ki madiku ga kale kuva malahi kuvita madiku ga ka lunu? Kigira si u tevanga nobugeeri mu inkuva yiyi.

¹¹ Ubugeeri nobulahi kuli miya ndu: yee, bu veye nobukonyi ku yavo ava lolanga liuva.

¹² Kigira ubugeeri bu veye lidigi, kuli ifetha i veye lidigi: navutswa ubulahi bweli manya bu veye ndi, ubugeeri bu veye lugaga lwelivamwoyo lya uyu u veye nabwo.

¹³ Mu ganagana ligali mi yinzi gya Nyasaye: kigira ni bwaha u nyala kulungikidza kindu kya ya lomba bukyamu?

¹⁴ Mu lidiku lyokugasidzwa u sangale, nomu lidiku lyekivi u ganagane: yee, Nyasaye ya lomba kilala kulindana ne kindi, kuduka mundu a vule kumanya ki li duka inyima wewe.

¹⁵ Yaga gosi nda ga lola mu madiku gange ga vutswa: a veye ho mundu mulungi u divanga mu bulungi bwibwe, kandi a veye ho mundu mudamano u tsitsagil'langa mu livamwoyo lilye mu vikolwa vivye vyobukyamu.

¹⁶ U ta va nobulungi ubu vitiriru; kandi u tekola kuva nobu geeri ubuvitiriru: wedividze kigira ki?

¹⁷ U ta va mudamano ligali, kandi u ta va musiru: u kudze inyinga yoyo i kikiri kuduka, kigira ki?

¹⁸ Nobu lahi u gumire likuva yili; yee, u ta twulidza mukono gugwo ku likuva yili: kigira uyu u tidzanga Nyasaye a la twula mu yaga gosi.

¹⁹ Ubugeeri bu veye tsingulu ku uyu u veye nobugeeri kuvita avamehanga likumi va veye mu lidala.

²⁰ Ligali si ha veye nomundu wobu geeri mulala ku lirova, u kolanga bulahi, nokuvula kukola ubwoni.

²¹ Kandi u ta linda makuva gosi aga volangwa, gase u la hulira mutugwa wowo na a ku nyeganga;

²² kigira hali kanyingi mwoyo gugwo gu manya ive mwene kandi u nyegi avandi.

²³ Vindu yivi vyosi mmali kuvihenzeridza mu bugeeri: nda vola, Inze nda va nobugeeri; navutswa bwa li ihale ninze.

²⁴ Aga veye yo, i veye ihale ligali kandi ga veye noluliva ligali: ni bwaha u nyala kugavangula?

²⁵ Nda vodonkana, nomwoyo gwange gwa vikwa ku limanya nokuvangula, nokwenya ubugeeri na kivune kyevindu, nokumanya ubudamano ni bwobusiru, nobusiru nibwo ubulalu.

²⁶ Na ndola kindu kuvita litsunwa lyelikudza, ni uyu mukali womwoyo gwigwe gu veye mitego neviveto, na makono gege nevibohero: ku vosi u yanzidza Nyasaye a la nozoka ku mukali uyu; navutswa wobwoni a la gumirwa.

²⁷ Henza, ndoli yaga, Mwilwadzi a vola, ni neng'annya kindu yiki neyiki, kumanya livalidza;

²⁸ lyomwoyo gwange gwenyanga, navutswa si ndoli mba: musatsa mulala mu avandu elfu mmu loli; navutswa mukali mulala mu yavo vosi si mmu loli mba.

²⁹ Henza ndoli likuva yili; Nyasaye ya lomba mundu mulungi; navutswa venyanga vya va visaavira vinyingi.