Kohelethu 12 - KITABU KITAKATIFU

¹ Widzulire Mulombi wowo mu madiku gobusoleli bubwo, madiku madamano ni ga kikiri kuduka, na mihiga kwisunda himba, gya u li vola ku makuva gagyo, si mbeye nobusangali kandi mu mihiga yigyi;

² lwa liuva, nobulavu, nomweli, netsing'ereng'ani vi kikiri kumwami nywa, namalesi kwirana inyima we mbula;

³ mu lidiku yilyo lya yavo ava lindanga inyumba va degera, navetsingulu vinama, na avasia va la hera kigira va gehi, na yavo ava henzereranga mu madirisha va mwa minyeywi,

⁴ na miliango gyi la hanwa ku lihasi; lwa mwoyo gwelisia gu va mwoyo mukekeke, nomulala a la vuka ku mwoyo gwelinyonyi, navakana vosi avolwimbu va liki dzwa hasi;

⁵ yee, va la tia kyegi nga, na vyokutihidza ui li va ku inzira; na mulodzi gu la lavidza vi muli, nelidede li la va musigo, na likayirwa si li veye netsingulu kandi; kigira mundu a tsitsanga yengo we limenya madiku gosi, na ava syomanga va tsitsanga yiyi na yiyi mu tsinzira:

⁶ lwa mugoye gwefetha gu kikiri kukalika, na kituva kyetha habu ki kikiri kwadika, kinga isiongo ni i kikiri kwadikira mu kidaho, kinga ingida ni i kikiri kuvunikira mwida valia,

⁷ nolugukyi kwirana ku lirova kuli lwa li, nomwoyo kwirana ku Nyasaye wa tanga kuguhaana.

⁸ Ga veye vutswa aga vutswa, Mwi lwadzi a vola; vindu vyosi ni vya vutswa.

⁹ Kandi, kigira Mwilwadzi uyu ya li wobugeeri, ya tsitsagil'la nokwegidza avandu limanya; yee, ya ganagana, nokwenya, nokulohidza tsing'ano tsyamakuva tsinyingi ligali.

¹⁰ Mwilwadzi uyu yenya a duke kuvangula makuva ga yanzidkana, na ga ng'odwa mu bulungi, makuva geligali.

¹¹ Makuva gavageeri ga veye kuli makangu; kandi kuli misumari gya kubangirirwa navanene vamavugano, ga twula ku mwayi mulala.

¹² Kandi, kuvita yaga, mwana wange, u bugirire ligondokirwa: mu makuva gokulomba vitabu vinyingi si ha veye nekiheri; nokusomerera ku luhidzanga mubiri.

¹³ Kiheri kyenkuva yiyi ni yiki; gosi ga mali kuhulirwa: U tie Nyasaye, u gumire lilaga lilye; kigira miyinzi gyi dukiranga mundu ku budukiru bwibwe ni yigyi.

¹⁴ Kigira Nyasaye a la leta miyinzi sa mulala kukalagirwa halala nelikuva sa lilala lya viswa, ni li veye lilahi, ni li veye lidamano.