Kohelethu 11 - KITABU KITAKATIFU

¹ Sikisa vyokulia vivyo ku madzi; kigira u la vi lola kandi inyima wamadiku manyingi.

² U he ava ndu vatano na vaviri vidieli vyavo, yee, kali vatano na vavaka; kigira si u manya ni budamano ki ubu la va ku kivala;

³ Malesi ni gyizula imbula, ga la gi tsuka ku kivala; nomusala ni gu gwa gu henzanga ku luvega lwa kusini, naho ku luvega lwa kasikasini, ha musala gu gwidzanga niho ha gu vedzanga.

⁴ Uyu u henzanga imbuudza a la vula kutaga ubugutsa: na uyu u henzanga amalesi a la vula kugesa.

⁵ Kuli ive si u manya inzira yembuudza ni i li ha, kandi si u manya kuli liviruka lyevigumba mmunda mwomukali u veye inda; kandi ndiyo si u manyi miyinzi gya Nyasaye u kolanga vindu vyosi.

⁶ Inyinga yomugamba taga bugutsa bubwo, na inyinga yomgolova u tigalira mukono gugwo mba: kigira si u manyi nobuliha ubu gasidzwa, ni yibu naho ni yibu, naho bwosi bu la duka kuleng'anabulahi.

⁷ Ligaliubulavu nobunolu, kandi nobulahi ku tsimoni kukola ubulavu bweliuva.

⁸ Yee, mundu na a va mwoyo mihiga minyingi, nobulahi a sangale mu gyosi; navutswa a ganagane madiku gekisundi, kigira ga la va manyingi. Vindu vyosi vidzanga vi veye vya vutswa.

⁹ O musoleli, sangala, mu busoleli bubwo, nomwoyo gugwo gu ku sangalidze mu madiku gobusoleli bubwo, na u gende mu tsinzira tsyomwoyo gugwo, nomu lilola lyetsimoni tsitsyo: navutswa u manye Nyasaye a la ku vika mu likalagirwa kigira vindu yivi vyosi.

¹⁰ Kunangwa u twulidze ubuvereri mu mwoyo gugwo; nobudamano u bu twulidze mu mubiri gugwo; kigira ubusoleli nobutangiru bwomundu vyosi vi veye vya vutswa.