Kohelethu 1 - KITABU KITAKATIFU

NAHO MWILWADZI.

¹ Yaga na makuva go Mwilwadzi, mwana wa Daudi, mwami mu Yerusalemi.

² Vi veye vutswa vya vutswa, Mwilwadzi a vola; vutswa vya vutswa, vindu vyosi vi veye vya vutswa.

³ Mundu a lekerwa kindu ki mu vindu vivye vyosi vya a kolanga isi weliuva?

⁴ Likula lilala li tsitsanga, nelindi lidzanga; navutswa lirova yili li menyanga madiku gosi.

⁵ Liuva kandi li tonganga, kandi liuva li yeranga, na li kolanga bwangu kuduka ha bugono halyo ha li twulanga.

⁶ Imbuudza i hudzanga i tsitsanga ku luvega lwa kusini, na i girunkanga kandi kutsia ku luvega lwa kasikasini; i girunkananga kazozo mu ligenda lyayo, na imbuudza yiyi yirananga kandi kulonda livodonkana lyayo.

⁷ Migera gyamadzi gyosi gyi tsitsanga ku inyanza, navutswa inyanza si yizulanga mba; hemigera zana gyi twulanga, ni ho ha gyirananga kandi.

⁸ Vindu vyosi vizuye liluha; mundu si a nyala kuvola inkuva yiyi: imoni si yigutanga lilola mba, kandi ugutu si gwizulanga lihulira mba.

⁹ Yago wa ga li ni ndiyo ga li va; na yago aga kolwa na ndiyo ga li koleka: si ha veye nekindu kihya kali kilala isi weliuva.

¹⁰ Ki veye ho kindu kilala kyavandu va volanga amakuva gakyo, Henza, kindu yiki ni kihya? Kya li ho kutwula yaho, mmadiku ga li imbiri wetu.

¹¹ Si ha veye nelidzulitsa amakula gokutanga; kandi si ha la va ho nelidzulitsa amakula gekiheri, aga li va ho lwenyima, hagati ha yava ava li duka lwenyima.

¹² Inze Mwilwadzi nda li mwvami wa Israeli mu Yerusalemi.

¹³ Na nda vika mwoyo gwange kwenya nokuvangula nobugeeri mu vyosi vi kolangwa isi womigulu: li veye linyankana linene lya Nyasaye ya ha avana vavandu kunyankana kulyo.

¹⁴ Mmali kulola miyinzi gyosi gyi kolangwa isi weliuva; na, henza, vyosi ni vya vutswa, nokudidikana ku imbuudza.

¹⁵ Kya kyama si ki nyala kulungikidzwa; na ki ta veye ho si ki nyala kuvalidzwa.

¹⁶ Nda volerana nomwoyo gwange, ni mbola, Henza, nzinyoleye ubugeeri bunyingi kuvita vosi a vimira imbiri wange ha Yerusalemi; yee, mwoyo gwange gu henzeridze ligali mu bugeeri nelimanya.

¹⁷ Nda vika mwoyo gwange ku limanya ubugeeri, nokumanya ubulalu nobusiru kuli vi veye: na nda lola miyinzi yigyo gyi veye kudidikanira imbuudza.

¹⁸ Kigira mu ubugeeri bunyingi livererera li veye mu linyingi: kandi uyu u meda limanya a medanga ubusaliri.