Joshua 4 - KITABU KITAKATIFU

¹ Na ga duka, lwa avandu vosi va mala kwambuka Yordani, hene yaho Yahova ya volera Joshua, na a vola,

² U vugule avandu avasatsa likumi na vaviri mu avandu yava, ku ihiri sa indala mulala,

³ nu u va lage, u va volere, Mu vugule magina likumi na gaviri hagati ha Yordani, hevirenge vya vasalisi vya singira budinyu, mu tsie nago, mu ga vike ha bugono bwenyu ha mu gona budiku yibu.

⁴ Hene yaho Joshua ya langa avandu likumi na vaviri ava ya li na a viki kutwula inyinga zana, ku avana va Israeli, ku ihiri sa indala mulala:

⁵ na Joshua ya va volera, Mu vite mwimiri imbiri welisanduku lya Yahova Nyasaye wenyu, mu tsie hagati ha Yordani, mu vugule sa mulala ku mwinye ligina lilala kwivega lilye, kuli livalidzwa lyetsihiri tsyavana va Israeli;

⁶ liduke kuva lilolekidza ku mwinye, lwa, avana venyu va li mu teva ku madiku gadzanga, ni va vola, Kivune kya magina yaga ki veye ki?

⁷ Hene yaho mu la va volera, Ga veye kigira amadzi ga Yordani ga kalika imbiri welisanduku lyelilagana lya Yahova; lwa lyambuka Yordani, amadzi ga Yordani ga kalika: na magina yaga ga la va lidzulitsa ku avana va Israeli mihiga nemihiga.

⁸ Avana va Israeli va kola kuli Joshua ya va laga, va manya va vugula magina likumi na gaviri ha Yordani, kuli Yahova ya volera Joshua, kuli livalidzwa lyetsihiri tsyavana va Israeli; navo va ga ginga vambuke nago kuduka ha va gona, navo va ga vika ha zana.

⁹ Na Joshua ya lohidza magina likumi na gaviri hagati ha Yordani, ha zana ha virenge vyavasalisi va ginga lisanduku lyelilagana vya singira: na ga veye ho kuduka lero.

¹⁰ Kigira vasalisi va ginga lisanduku va singira hagati ha Yordani, kuduka lwevindu v yosi vya Yahova ya laga Joshua a volere avandu vya dukidzwa, kuli gosi ga Musa ya laga Joshua: na avandu va kola bwangu ni vambuka.

¹¹ Na ga duka, lwa avandu vosi va mala kwambuka ligali, lisanduku lya Yahova lyambuka, na vasalisi, imbiri wetsimoni tsyavandu.

¹² Na avana va Rubeni, na avana va Gadi, na inusu yehiri ya Manase, vambuka ni vivika vyuma imbiri wa avana va Israeli, kuli Musa ya va volera:

¹³ va duka kuli avandu tsielfu makumi gane, livalidzwa lya yavo vivika vyuma kwetegeka ku bulwani avambuka imbiri wa Yahova, vs tsie mbulwani, kuduka mkivala kyekereremu kya Yeriko.

¹⁴ Ku lidiku yilyo Yahova ya kuminya Joshua imbiri wetsimoni tsya Israeli vosi; navo va mu tia, kuli wa va tidzanga Musa, madiku gosi gelivamwoyo lilye.

¹⁵ Kandi Yahova ya volera Joshua, na a vola,

¹⁶ U lage vasalisi ava ginganga lisanduku lyelilolekidza, vanegira kutwula mu Yordani.

¹⁷ Kunangwa Joshua ya laga vasalisi, na a vola, Mwanegire mu twule mu Yordani.

¹⁸ Na ga duka, lwa vasalisi ava ginga lisanduku lyelilagana lya Yahova lwa vanegira kutwula mu Yordani, netsinduvatiru tsyavasalisi lwa tsya gingwa nokuvikwa ku marova amumu, hene yaho amadzi ga Yordani girana mbugono bwago, nokwizula nokuvita tsinzako tsyago, kuli lwa ga li ku matsyambiri.

¹⁹ Na avandu yavo vosi vanegira kutwula mu Yordani ku lidiku li kola likumi lyomweli gwokutanga, na vombaka mahema gavo mu Gilgali, ha luvega lwevugwe wa Yeriko.

²⁰ Na magina likumi na gaviri yaga ga va vugula hagati ha Yordani Joshua ya ga singeridza ha Giligali.

²¹ Naye ya volera avana va Israeli, na a vola, Lwa avana venyu va li teva vadada vavo mu madiku gadzanga, ni va vola, Kivune kyamagina yaga ki veye ki?

²² Hene yaho mu la volera avana venyu, ni mu vola, Israeli yambuka mugera yigu gwa Yordani ku marova amumu.

²³ Kigira Yahova Nyasaye wenyu ya kaminya amadzi yago ga Yordani ga twule imbiri wenyu, kuduka lwa mwa mala kwambuka, kuli Yahova Nyasaye wenyu ya kola ku Inyanza Inzankanyu, lwa ya kaminya imbiri wetu kuduka lwa kwambuka;

²⁴ avandu velirova vosi va duke kumanya mukono gwa Yahova, gu veye mukono gwobunyali; mu duke kutia Yahova Nyasaye wenyu mihiga nemihiga.