Joshua 20 - KITABU KITAKATIFU

¹ Na Yahova ya volera Joshua na a vola,

² U volera avana va Israeli, u vole, Mu tovole amadala agokwirukira mu, aga mmu volera makuva gago ku mukono gwa Musa,

³ umulumindi wiita mundu ku vosi bugira lisaavira, na bugira limanya, a duke kwirukira yo: nago ga la va ahokwirukira henyu kwiruka uyu u vanzanga kisalya kyamasahi.

⁴ Naye a lirukira mu lilala ku madala yago, na a la singira ha kiribwa kyelidala, na a la vola makuva gege mmatu gavakulundu velidala zana; navo va la mbugula kwingira mu lidala, nokumuha ubwiyangu, a duke ku menya hagati havo.

⁵ Ni i va uyu u vanzanga kisalya kyamasahi a mu londerera, hene yaho va la vula kuhaana umulumindi uyu kumbika mmukono gwigwe; kigira ya kuya wakye na a ta manya, kinga si ya mu dunyira lwambiri.

⁶ Naye a la menya mu lidala yilyo, kuduka lwa i a singira imbiri welivugana kukalagirwa, kuduka kandi ku likudza lyomusalisi munene u veye ho madiku yago: hene yaho umulumindi a lirana, nokutsia mu lidala lilye, nomunyumba yeye, kuduka ku lidala lya ya twula mu lwa yiruka.

⁷ Na ya tovola Kedesh mu Galilaya mu kivala kyevigulu kya Nafitali, na Shekem mu kivala kyevigulu kya Efiraim, na Kiriathuarba (li veye Hebironi) mu kivala kyevigulu kya Yuda.

⁸ Kandi engereka wa Yordani ha Yeriko ku luvega lwevugwi, va tovola Bezeru mu kyangalangwi mu kivala kyekereremu kyehiri ya Rubeni, na Ramothu mu Gileadi mu ihiri ya Gadi, na Golan mu Bashan mu ihiri ya Manase.

⁹ Amadala yaga nigo amadala ga lagwa kuva gavana va Israeli vosi, kandi kuva gomumenya u menyanga hagati havo, kuduka ku vosi wiita mundu ku vosi bugira lisaavira a duke kwirukira yo, a vule kukudza ku mukono gwa u vanzanga kisalya kyamasahi, kuduka lwa a mala kusingira imbiri welivugana.