Joshua 17 - KITABU KITAKATIFU

¹ Na yiki ni kidieli kya ihiri ya Manase; kigira ya li wokutanga kwivulwa wa Yosefa. Mu makuva ga Makiru wokutanga kwivulwa wa Manase, ise wa Gileadi, kigira ya li mundu welihe, kunangwa ya li na Gileadi na Bashan.

² Na kidieli n; yiki ki veye kya avana va Manase ava tigala, kuli ubwiko bwavo: ku avana va Abiezeru, na avana va Heleku, na ku avana va Asirieli, na ku avana va Shekem, na ku avana va Heferu, na ku avana va Shemida: yava nivo avana vayai va Manase mwana wa Yosefa kuli ubwiko bwavo.

³ Navutswa Zelofehadi, mwana wa Heferu, mwana wa Gileadi, mwana wa Makiru, mwana wa Manase, Bi ya li na avana vayai, navutswa avakana: na ameta ga vakana veve ni yaga: Mahala, na Noa, Hogila, Milika, na Tiriza.

⁴ Navo visunda imbiri wa Eleazaru musalisi, na imbiri wa Joshua mwana wa Nuni, na imbiri wa vanene, ni va vola, Yahova ya laga Musa kuhaana ku kwinye miyandu hagati ha vabotso vetu: kunangwa kuli lilaga lya Yahova ya va ha miyandu hagati ha vamwavo va dada wavo.

⁵ Ne vidieli vya Manase vya li likumi kuvita kivala kya Gileadi na Bashan ki veye engereka ya Yordani;

⁶ kigira avakana va Manase va nyole miyandu mu vayai veve. Na kivala kya Gileadi ki veye kyavana va Manase vayai va tigala.

⁷ Na lwako lwa Manase lwa twulira ha Asheri kuduka Mikimethathu, ki veye imbiri wa Shekem; na lwako lwa vita ku luvega lwomukono mulungi, kuduka ku avandu va Entapua.

⁸ Kivala kya Tapua ki veye kya Manase; navutswa lidala lya Tapua li veye ku lwako lwa Manase, li veye lya avana va Efiraim.

⁹ Na lwako lwa sulunguta kuduka ku mugera gwa Kana, ku luvega lwa kusini womugera: madala yaga ga veye ga Efiraim mu madala ga Manase: na lwako lwa Manase lwa li ku luvega lwa kasikasini womugera, na kiheri kyalwo kya li ku inyanza:

¹⁰ ku luvega lwa kusini lwa li lwa Efiraim, na luvega lwa kasikasini lwa li lwa Manase, na inyanza ya li lwako lwakye: navo va duka Asheri ku luvega lwa kasikasini, nokuduka ku Isakari ku luvega lvevugwi.

¹¹ Na Manase ya li na madala mu Isakari, na mu Asheri, nago ni yaga Beth shean halala no madala galyo, na Ibileam na madala galyo, na avandu va Dori na madala galyo, na avandu va Endori na madala galyo, na avandu va Taanaka na madala galyo, na avandu va Megido na madala galyo, vivala vivaka vyeginga igulu.

¹² Navutswa avana va Manase si va nyala kukunga avandu va madala yago; navutswa Vakanani va dinya kumenya mkivala yikyo.

¹³ Na ga duka, Iwa avana va Israeli va nyola tsingulu, va niga Vakanani va kole miyinzi gyobutugwa, na va vula kuvakunga ligali.

¹⁴ Na avana va Yosefa va volera Joshua, ni va vola, Kigira ki ive haana ku inze kidieli kilala nolwako lulala vutswa, navutswa inze mbeye ihiri inene, kigira Yahova u ngasidza kuduka lero?

¹⁵ Na Joshua ya va volera, Ive nu u va nu u veye ihiri inene wanegire u tsie mu mulitu, wekaiire mwene kivala mu kivala kya Vaperizi na Vamindu; kivala kyevigulu kya Efiraim ni ki va ni ki veye kinyerere bugira ubwiyangu kukuduka.

¹⁶ Na avana va Yosefa va vola, Kivala kyevigulu si ki duki kwinye mba: kandi Vakanani vosi avamenyi mu kivala kyelivona va veye na magari gevivya, ava veye mu Bethshean no mu madala galyo, navo ava veye mu livona lya Jezireel.

¹⁷ Na Joshua ya volera avenyumba ya Yosefa, kali Efiraim na Manase, na a vola, Ive u veye ihiri inene, na u veye nobunyali bunyingi; si u li nyola kidieli kilala vutswa:

¹⁸ navutswa kivala kyevigulu ki la va kikyo; kali ni gu veye mulitu, u la gu tema, ne kiheri kyakyo ki la va kikyo: kigira u la kunga Vakanani, ra twule mu, kali ni va veye namagari gevivya, kali ni va veye avobunyali.