Joshua 16 - KITABU KITAKATIFU

¹ Na kidieli kyavana va Yosefa kya tangira ku mugera gwa Yordani ha Yeriko, ha amadzi ga Yeriko ku luvega lwevugwi, kuli mu kyangalangwi, kwanegira kutwula ha Yeriko hagati hekivala kyevigulu kuduka Betheli;

² kandi lwa twula Betheli kuduka Luz, na lwa vita kuduka ku lwako lwa Vaariki kuduka Atarothu;

³ na lwa sulunguta ku luvega lwemadioli kuduka ku lwako lwa Vajafileti kuduka ku lwako lwa Bethhoron iyemunzi, kuli kuduka Gezeri; nekiheri kyalwo ki veye ha inyanza.

⁴ Na avana va Yosela, Manase na Efiraim, va vugula miyandu gyavo.

⁵ Na lwako lwa avana va Efiraim kuli ubwiko bwavo lu veye ndi: lwako lwemiyandu gyavo ku luvega lwevugwi lu veye Atarothadari, kuduka Bethhoron lyegulu;

⁶ na lwako lwa twulira kuvita ku luvega lwemadioli ha Mikimethathu ku luvega lwa kasikasini; na lwako zana I wa vodonkana ku luvega lwevugwi kuduka Taanathushilo, ni lu vita ku luvega lwevugwi wa Janoa

⁷ ni lusulunguta kutwula Janoa kuduka Atarothu, na Naara, na lwa duka Yeriko, na lwa hera ha mugera gwa Yordani.

⁸ Kutwula ha Tapua lwako lwa yita ku luvega lwemadioli kuduka ku kisinukiru kya Kana; ne kiheri kyalwo kya li ha inyanza. Yigyi gyi veye miyandu gya ihiri ya avana va Efiraim kuli ubwiko bwavo;

⁹ halala na madala ga vikirwa avana va Efiraim mu miyandu gya avana va Manase, madala gosi halala notudala twago.

¹⁰ Navo va vula kukunga Vakanani ava menya Gezeri: navutswa Vakanani va menya hagati ha Efiraim kuduka lero, navo va veye avatugwa ava kolanga miyinzi gyokutugwa.