Joshua 14 - KITABU KITAKATIFU

¹ Yiki ki veye miyandu gyavana va Israeli va vugula mkivala kya Kanani, kya Eleazaru musalisi, na Joshua mwana wa Nuni, na va veye mitwe gyetsinyumba tsyavo yago avetsihiri tsya Israeli, va va gavulira,

² ku lilonda ikura yemiyandu gyavo, kuli Yahova ya laga nomukono gwa Musa, ku tsihiri tsitano ne tsine, ne inusu yehiri.

³ Kigira Musa ya li na a mali kuhaana miyandu ku tsihiri tsiviri nenusu engereka wa Yordani: navutswa si ya haana miyandu ku Valevi hagati havo.

⁴ Kigira ihiri ya Yosefa ya li tsihiri tsiviri, Manase ne Efiraim: na si va haana ku Valevi kidieli mu kivala, ni ga ta li va haana kuvo amadala kumenya mu, halala nekyayiru kyemitugu gyavo, kandi ku butugi bwavo.

⁵ Kuli Yahova ya laga Musa, avana va Israeli va kola ndiyo; ni va gavula kivala.

⁶ Inyinga zana avana va Yuda visunda himbi ku Joshua ha Gilgali: na Kalebu mwana wa Jefune Mukenizi ya mu volera, Ive u manya likuva lya Yahova ya volera Musa mundu wa Nyasaye ku makuva gange nolsu makuva gogo lwa kwa li mu Kadeshibarnea.

⁷ Inze nda li mundu wemihiga makumi gane lwa Musa mutumekiri wa Yahova ya ntuma kutwula Kadeshibarnea kutsia kuluta kivala, na nda mu letera makuva kuli ga li mu mwoyo gwange.

⁸ Navutswa avamitu avanegira halala ninze va salalukidza myoyo gyavandu; navutswa inze nda londa Yahova Nyasaye nobudukiru.

⁹ Na Musa ya nzisuhira lidiku yilyo, na a vola, Ligali kivala yikyo kyenduvatiru yoyo ya sena ku, ki la ka ve miyandu ku ive, noku avana vovo mihiga nemihiga, kigira wa londa Yahova Nyasaye wange nobudukiru.

¹⁰ Kunangwa, kalunu, Yahova uyu u nindi mwoyo, kuli ya vola, mihiga yigyi makumi gane ne gitano, kutwula inyinga yeyo lwa Yahova ya volera Musa likuva yili, inyinga Israeli va gendanga mu kyangalangwi: na kalunu, inze mbeye hano lero nduki mihiga makumi gatano na gavaka negyitano.

¹¹ Navutswa kalunu mbeye netsingulu tsyange kuli nda li ku lidiku lya Musa ya ntuma: kuli tsingulu tsyange tsya li inyinga zana, netsingulu tsyange tsi veye ndiyo kalunu, mbulwani, nokusamula nokwingira.

¹² Kunangwa kalunu u mbe kivala kyekigulu, kya Yahova ya vola kukyo ku lidiku yilyo; kigira ive wa hulira lidiku yilyo kuli Vaanaki va veyo, na madala manene na getsingaga: namusia Yahova a la va halala na inze, na nda va kunga va twule, kuli Yahova ya vola.

¹³ Na Joshua ya mu gasidza; na ya ha Kalebu mwana wa Jefune Hebironi kuva miyandu gyigye.

¹⁴ Kunangwa Hebironi lya gwa miyandu gya Kalebu mwana wa Jefune Mukenizi kuduka lero; kigira ya londa Yahova, Nyasaye wa Israeli, nobudukiru.

¹⁵ Lieta lya Hebironi ku matsyambiri lya langwa Kiriathuarba; uyu Arba ya li mundu munene kuvita avakye vosi mu Vaanaki. Ubulwani bwa kalika na kivala kya sosa.