Joshua 1 - KITABU KITAKATIFU

¹ Na ga duka inyima we likudza lya Musa mutumekiri wa Yahova, Yahova ya volera Joshua mwana wa Nuni, wa li mutumekiri wa Musa, na a vola,

² Mutumekiri wange Musa u kudzi; kunangwa ive u vuke, wambuke mugera yigu gwa Yordani, ive, na avandu yava vosi, mu duke ku kivala kya mbedzanga, livola li veye ku avana va Israeli.

³ Hosi hetsinduvatiru tsyevirenge vyenyu tsi sena, mmali ku ha mwinye ha zana, kuli nda volera Musa.

⁴ Kutwula ku kyangalangwi, noku Lebanon yiki, kuduka ku mugera munene, mugera gwe Farati, kivala kyosi kya Vahiti, kuduka ku inyanza inene ku luvega lweliyera lyeliuva, ha la va lwako lwenyu.

⁵ Si ha la va nomundu ku vosi u nyala, kusingira imbiri wowo madiku gosi aga u va mwoyo: kuli nda li halala na Musa, ni ndiyo nda va halala nive; inze ligali si nda ku gehera mba, kandi si nda ku leka mba.

⁶ U ve mugulu nomuluviriri; kigira u la lihidza avandu yava miyandu gyekivala kya ndi suhira avaguga vavo nda va ha.

⁷ U ve mugulu nomuluviriri ligali, u duke kulinda kukola kuli lilsga yili lyosi, lya Musa mutumekiri wange ya ku laga: u ta girunkana kulileka, u tsie ku luvega lwomukono mulungi kinga lwomukono mmosi mba, u duke kugasidzwa ha u tsitsanga hosi.

⁸ Kitabu yiki kyelilaga si ki la twula mmunwa gugwo, navutswa u la ganagana kukyo mbasu nobudiku, u duke kulinda kukola kuli gosi aga ng'odwa mu: kigira inyinga zana u la gasidza inzira yoyo, na inyinga zana u la kola nobugeeri.

⁹ Si nda ku laga? U ve mugulu nomuluviriri; u ta tia, kandi u ta kudza mwoyo: kigira Yahova Nyasaye wowo a veye halala nive hosi ha u tsitsanga.

¹⁰ Kunangwa Joshua ya laga avanyampara vavandu, na a vola,

¹¹ Mu vite hagati hokusosa, mu lage avandu mu vole, Mu tegekidze vyokuiia; kigira ku madiku gavaka mu lambuka mugera yigu gwa Yordani, mu duke kwingira ku gumira kivala kya Yahova Nyasaye wenyu a mu hedzanga, mu duke kukigumira.

¹² Na Joshua ya volera Varubeni, na Vagadi, na inusu yehiri ya Manase, na a vola,

¹³ Mwidzulitse likuva lya Musa mutumekiri wa Yahova ya mu laga, lwa ya vola, Yahova Nyasaye wenyu u mali ku mu ha ubwelemeridzi, naye a la mu ha kivala yiki.

¹⁴ Avakali venyu, na avana venyu, nemitugu gyenyu, vi la menya mu kivala kya Musa ya mu ha engereka ya Yordani; navutswa mwinye mu lambuka imbiri wa vamwavo venyu ni mwiviki vyu na, avasatsa vosi avaluviriri avobunyali, mu la va konya;

¹⁵ kuduka lwa Yahova a ha avamwavo venyu uhwelemeridzi, kuli mwinye, navo kandi va nyoye kugumira kivala kya Yahova Nyasaye wenyu a va ha: ma mu lirana mu kivala kyemiyandu gyenyu, mu duke kukigumira, kya Musa mutumekiri wa Yahova ya mu ha engereka ya Yordani ku luvega lwelitwulira lyeliuva.

¹⁶ Navo va tivulira Joshua, nokumbolera, Yaga gosi aga u ku lagi ku la kola, kandi hosi ho u ku tuma ku la tsia.

¹⁷ Kuli kwa hulira Musa mu vindu vyosi, ku la hulira ive ndiyo: Yahova Nyasaye wowo a ve halala nive, kuli ya li halala na Musa, yaga geng'ine.

¹⁸ Ku vosi mundu u tinguha likuva lyomunwa gugwo, na a vula kuhulira makuva gogo ku yaga gosi aga u mu laga, uyu a liitwa: u ve mugulu nomuluviriri yaga geng'ine.