Joeli 2 - KITABU KITAKATIFU

¹ Mu kupe kisiliva mu Zioni, mu kupe uluku mu kigulu kitakatifu kyange; na avamenyi mu kivala vosi va degere: kigira lidiku lya Yahova lidzanga, kigira li veye himbi;

² lidiku lyekisundi, na lya isi idunyi, lidiku lyamalesi na kisundi kiliduhu, kuli isi i tanga kwayuka ku vigulu; Ii leta avandu avanene na avetsingulu; va kikiri kuva ho kuli yavo madiku gosi, kandi si va la va ho avenyima, kuduka ku mihiga gyevisukululwi vinyingi.

³ Muliru gu sambanga imbiri wavo; na inyima wavo ulumemo lwomuliru lwaakanga: imbiri wavo kivala ki veye kuli mulimi gwa Edeni, na inyima wavo ki veye kyangalangwi; yee, si ha veye nowahona kuvo kali mulala.

⁴ Liloleka lyavo li veye kuli liloleka lyetsiparasi; kandi kuli ava nina ku tsiparasi, va nyagula ndiyo.

⁵ Kuli miliviti gyamagari gobulwani ku vigulu, na ndiyo va tumanga, kuli liluma lyolumemo lwomuliru gu sa mbanga mavivi gemilimi, kuli avandu vetsingulu avetegekera ubulwani.

⁶ Avandu va veye mu busaliri imbiri wavo; mumoni mwosi mu galuye nobutii.

⁷ Va nyagula kuli avandu vetsingulu; va nina ku lidigi kuli avandu vobulwani; na va genda sa mulala ku inzira yeye, kandi si va kyaminya tsimbaso tsyavo.

⁸ Kandi si va lumbananga; va genda sa mulala ku inzira yeye; veduya ku vyuma, na va vula kukyaminya inzira yavo.

⁹ Va twulira lidala; va nyagula ku lugaga; vanegira kwingira mu tsinyumba; vingira mu madirisha kuli mwivi.

¹⁰ Lirova li degera imbiri wavo; ligulu li degera; Iiuva na mweli vi mwaminyeywi, na tsing'ereng'ani tsyemwaminya.

¹¹ Na Yahova a vola nomwoyo gwigwe imbiri welihe lilye; kigira hokusosa hehe na hanene; kigira a veye netsingulu u kolanga likuva lilye; kigira lidiku lya Yahova li veye linene nelyokutihidza; ibwaha u nyala kwikudzera kulyo?

¹² Navutswa kali kalunu, Yahova a vola, Mu girunkane, mu yeke ku inze nomwoyo gwenyu gwosi, kandi nelihonga lilia, nelilira, nelisyoma:

¹³ Mu tandule mwoyo, mu ta tandula tsingubo tsyenyu, mwirane ku Yahova Nyasaye wenyu; kigira uyu a veye netsimbabasi na livererera, si a vihirirangwa bwangu, a veye netsimbabasi tsinyingi, na yeganiranga ku kivi.

¹⁴ Ibwaha u manya a la vula kugirunkana nokweganira, nokulekera ubugasu inyima wewe, kali kihaanwa kyobusie na kihaanwa kyokunwa ku Yahova Nyasaye wenyu?

¹⁵ Mu kupe kisiliva mu Zioni mu takase lihonga lilia, mu lange iivu gana litakatifu:

¹⁶ mu vungidze avandu, mu takase livugana, mu vungidze avasakulu, mu vungidze avana, na ava nunanga tsimbeere; wo serereywi a twule mu inyumba yeye, na mwiha a twule mu inyumba yeye.

¹⁷ Avasalisi, avatumekiri wa Yahova, va lire hagati holusimbu na ubwali, na va vole, U verere avandu vovo, O Yahova, na u ta haana miyandu gyigyo kunyegwa, avetsihiri va duke kwameha kuvo: kigira ki va nyala kuvola hagati hetsihiri, Nyasaye wavo a veye haliha?

¹⁸ Hene yaho Yahova ya kendekera kivala kikye, na a vererera avandu veve.

¹⁹ Na Yahova ya tivula na a volera avandu veve, Henza, nda mu letera ubuswage, na iwaini impya, na maguta, na mu liguta vindu yivi; na si nda mu kola kandi kunyegwa hagati hetsihiri;

²⁰ navutswa lihe yili lyoluvega lwa kasikasini, nda li kunga ihale ku mwinye, li la duke mu kivala kyumu ki veye kyere, kidieli kye imbiri kyalyo ki lingira mu inyanza yevugwe, na kidieli kye inyima ki lingira mu inyanza yemadioli; na ubugundu bwalyo bu la senuka, na lifunya lidamano lilyo li la senuka, kigira li koli miyinzi minene.

²¹ Ive kivala, u ta tia mba, mu yanze na mu sangale; kigira Yahova u koli miyinzi minene.

²² Mwinye tsinyama tsyomwigendanyama, mu ta tia mba; kigira ubwayiru bwomwigendanyama bu sebuka, kigira musala gwamanga, na mukuyu na muzabibu gyi letanga tsingulu tsyagyo.

²³ Kunangwa mu yanze, mwinye avana va Zioni, na mu sangale mu Yaho va Nyasaye wenyu; kigira a mu hedza imbula yokutanga i duka, naye a mu kupidzira imbula, imbula yokutanga na imbula yenyima, mu mweli gwokutanga

²⁴ Na videra vi lizula ingano, na malina Rokukamira muiwaini, ga lizula iwaini impya na maguta.

²⁵ Kandi nda mwirannyira mihiga gyetsisigi tsya lia, liharing'ang'a, na ingedza, na ubutsiriri, lihe linene lyange lya nda leta hagati henyu.

²⁶ Na mu la lia vinyingi, na mu liguta, na mu lidzominya lieta lya Yahova Nyasaye wenyu, uyu wa mu kolera makuva gokugenya; na avandu vange va la vula kuva netsisoni mihiga nemihiga.

²⁷ Na mu la manya inze mbeye hagati ha Israeli, kandi mbeye Yahova Nyasaye wenyu, na si ha veye nowundi; na avandu vange va la vula kuva netsisoni mihiga nemihiga.

²⁸ Na ga la va lwenyima, nda tsuka Roho wange ku avandu vosi; na avana venyu avayai navakana va la profeta, na avakulundu venyu va la lota maloto, na avasoleli venyu va la lola malola:

²⁹ na ku vatugwa avayai na vakana mu madiku yago ndava tsukira Roho wange.

³⁰ Na nda leta vyokugenya migulu, na mu li rova: masahi, nomuliru, neminara gyomwoki.

³¹ Na liuva li la girunkanywa li gwe kisundi, na mweli gu la girunkanywa gu gwe masahi, lidiku lya Yahova linene na lyokutihidza li kikiri kuduka.

³² Na ga la va, ku vosi u lyanira ku lieta lya Yahova a la honnywa: kigira mu kigulu kya Zioni, na mu Yerusalemi, va la va ho yavo avalala ava hona, kuli Ya hova ya vola, na mu yava ava tigaye va la va ho ava Yahova a langa.