Joeli 1 - KITABU KITAKATIFU

¹ Makuva ga Yahova aga duka ku Joeli mwana wa Pethueli.

² Mu hulire yaga, mu inye avasakulu, mu tegidze amatu, mwinye vosi ava menyanga mu kivala yiki. Inkuva yiyi ya li mu madiku genyu, kinga mu madiku ga vaguga venyu?

³ Mu gi vole ku avana venyu, na avana venyu va volere avana vavo, na avana vavo va volere kisukululwi kindi.

⁴ Yiki kyobutsiriri bwa leka, isigi ya lia; na kyesigi ya leka, liharing'ang'a lya lia; na kyeliharing'ang'a lya leka, ingedza ya lia.

⁵ Mu vuke, mwinye avahambiki, mu lire; na mu kupe tsikwili, mwinye vosi ava nwedzanga iwaini; kigira iuaini impya; kigira i twulidzeywi ku minwa gyenyu.

⁶ Kigira ihiri i twulira kivala kyange, yetsingulu, i ta li nelivalidzwa; amino gayo ga veye amino geking'ang'a, nayo i veye na amino matambi geking'ang'a kikali.

⁷ Yononnyi muzabibu gwange, nokukuvula musala gwamakuyu guange: i kuvuye magodo gagwo ligali, nokugusyuva ihale, tsitsya tsyagwo tsi koleywi tsindavu.

⁸ U syome kuli mukana mugima wa vikwa tsingubo tsyamagunia kigira musatsa wolukana lwilwe.

⁹ Kihaanwa kyobusie, na kihaanwa kyokunwa vi twulidzeywi ku inyumba ya Yahova; avasalisi, avatumekiri va Yahova, va svomanga.

¹⁰ Mulimi gwoneki, kivala ki syomanga; kigira ubuswage bwoneki, iwaini impya yumi, na maguta ga gehi.

¹¹ Mu ve netsisoni mwinye avalimi, mu syome, mwinye avalindanga mizabibu, ku ingano noku ishaii; kigira ligesa lyomulimi lyoneki.

¹² Muzabibu gu niaye, na mukuyu gwumi; mukomamanga, na ligemu, kandi muchungwa, kali misala gyosi gyemilimi gyi niaye: kigira ubusangali bu niaye kutwula ku avana va avandu.

¹³ Mwebohe na magunia, mu syome mwinye avasalisi; mu kupe tsikwili, mwinye ava tumikanga ku bwali; mudze, mu gone ubudiku bwosi mu magunia, mwinye avatumekiri va Nyasaye wange: kigira kihaanwa kyobusie na kihaanwa kyokunwa vigaliywi vi ta va mu inyumba ya Nyasaye wenyu.

¹⁴ Mu takase lihonga lilia, mu lange livugana litakatifu, mu vungidze avasakulu, na vosi avamenya mu kivala, va vunge mu inyumba ya Yahova Nyasaye wenyu, mwanire Yahova.

¹⁵ O Bayaye lidiku yili kigira lidiku lya Yahova li veye himbi, nalyo li la duka kuli lidividza li twula ku Wanyala Vyosi.

¹⁶ Vyokulia si vi twulidzwa imbiri wetsimoni tsyetu? Yee, ubuyanzi na ubusangali bu twu lidzeywi ku inyumba ya Nyasaye wetu?

¹⁷ Bugutsa bu gundanga mu marova, videra vyoneki, na magungi ga tsomeywi hasi; kigira vya tagwa vi niaye.

¹⁸ Tsinyama tsi kenya ndi? Vyayo vyetsing'ombe vi genya, kigira si vi veye ne kyayiru, yee, vyayo vyamagondi vi lekeywi vutswa,

¹⁹ O Yahova, nzanira ive; kigira muliru gu sambi vyayiru vyomu ligendanyama, na ulumemo lwomuliru lu sambi misala gyosi gyomulimi.

²⁰ Yee, tsinyama tsyomwigendanyama tsi heerana ku ive; kigira migera gya amadzi gyi kami, no muliru gu sambi vyaviru vyomwigendanyama.