Jeremia 48 - KITABU KITAKATIFU

¹ Ku Moabu. Yahova wa mahe, Nyasaye wa Israeli, a vola ndi. O bayaye ku Nebo kigira li lekeywi vutswa; Kiriathaim li leganyeywi, li vuguywi: Misigabu, li leganveywi, nokusasugulwa.

² Lidzominywa lya Moabu si li veye ho kandi mba; mu Heshibon va saaviye ubudamano kulyo: Hambi, ku mu heridze a vule kuva ihiri kandi. Ive kandi O Madimen, u la kiring'anywa; kivavi ki la ku londerera.

³ Mwoyo gwelilira gu twulanga Horonaim, ubudivi nobwoneku bunene

⁴ Moabu yononnyeywi; avakeke veve va koli lilira kuhu lirwa.

⁵ Kigira ku lyanegira lya Luhithu va lanegira nokulira kazozo; kigira mu lisulunguta lya Horonaim va hulira ubusaliri bwelilira lyobwo neku.

⁶ Mwiruke, mu honye myoyo gyenyu, mu ve kuli musala gwo mwigendanyama.

⁷ Ga veye kigira ive wa suuvira miyinzi gyigyo nobutugi bubwo, ive kandi u la vugulwa: na Vakemoshu va la hilwa mu lyadikidzwa, avasalisi veve navanene veve halala.

⁸ Uyu mulanyi a ladza ku madala sa lilala, si ha veye nelidala li la hona; livona kandi li la diva, na kereremu ki lononywa; kuli Yahova a voye.

⁹ U he Moabu tsimbaha, a duke kubuluka a tsie: na madala gege ga la va vutswa, si ga la va nomundu wokumenya mugo.

¹⁰ A laamwe uyu u kolanga miyinzi gya Yahova nobugata; a laamwe uyu wigaliranga kivavi kikye ki vule kunyola masahi.

¹¹ Moabu a menya mu bwelemeridzi kutwula bwana buke, wegedi ku maseke gege, si a tsukwa kutwula mu kiju yiki kuduka mu kiju yiki, kandi a vula kutsia mu lyadikidzwa: kigira yaga bunulu bwibwe bu menyanga muye, na amalusu gege si ga girunkana mba.

¹² Kunangwa Yahova a vola, Henza, madiku gadza, mu madiku yago nda tuma kuye avatsuki, na va la mu tsuka; na va la tsukira viju vivye, nokwatannya tsichupa tsyavo vidonye.

¹³ Na Moabu a la va soni ku Kemoshu, kuli inyumba ya Israeli ya li soni ku Betheli kisuuviri kyavo.

¹⁴ Mwinye mu vola ndi, kwinye ku veye avaluviriri, ku veye avobunyali ku bulwani?

¹⁵ Moabu u lekeywi vutswa, navo vanegiye nokwingira mu madala gege, na avasoleli veve avatovolwa va sulunguta ku liitwa, Mwami a vola, welieta lilye li veye Yahova wa mahe.

¹⁶ Kivi kya Moabu ki veye himbi kuudza, nelisaleridza lilye lidzanga bwangu.

¹⁷ Mwinye vosi ava mu kumbiridzanga, mu mu lirire, kandi mwinye vosi ava manyi lieta lilye; mu vola, O ya vunika kuli ndi impimbo yetsingulu, impimbo indahi

¹⁸ O ive mukana u menyanga ha Dibon, yika u twule mu bukumi bubwo, wikale mu buluhu, kigira u mulanyi wa Moabu wanegiye ku ive, wononnyi tsimpinga tsitsyo.

¹⁹ O ive u menyanga Aroeri, singira ku luginga lwenzira, u linde: u teve uyu wirukanga, na uyu mukali u honanga; u vole, Likuva ki li koleywi?

²⁰ Moabu u leganyeywi; kigira li sasuguywi: mu kupe tsikwili mu lire, mu vole makuva ku Arnon, Moabu li koleywi kyanyi.

²¹ Na likalaga li duka ku kivala kyekereremu; ku Holon, noku Jahaza, noku Mefaathu;

²² noku Dibon, noku Nebo, noku Bethdibilathaim,

²³ noku Kiriathaim, noku Bethgamuli, noku Bethmeon,

²⁴ noku Keriothu, noku Bozra, noku madala gosi geki vala kya Moabu, ihale na himbi.

²⁵ Lwiga lwa Moabu lu kaliki mukono gwigwe gu vuniki, Yahova a vola.

²⁶ U mu hambikidze; kigira yekuminya mwene ku Yahova: Moabu a la galagala mu maluuki gege, naye a la sekererwa.

²⁷ Kigira Israeli si a veye lisekererwa ku ive? Ya loleka hagati ha avivi? Kigira ku tsinyinga tsyosi lwa u mu talanga, u sung'usanga mutwe.

²⁸ O mwinye ava menya ha Moabu, mu twule mu madala, mu menye mu magina; mu ve kuli likulu li lombanga kyaalira kyalyo mmbalu mwomunwa gwobogo.

²⁹ Kwa hulira makuva goluyai lwa Moabu, a veye woluyai ligali uyu; lyeginga lilye, noluyai lwilwe nelyekonya lilye, na lyegingira lyomwoyo gwigwe.

³⁰ Inze mmanya ubutima bwibwe, Yahova a vola, bu veye bwa vutswa, lidzominya lilye si li dukidza kindu kali kilala.

³¹ Kunangwa nda kupira Moabu tsikwili; yee, nda hanzukira ligali Moabu vosi: va la syomera avandu va Kiriheresi.

³² Nda lirira ive nelilira lyokuvita lilira lya Jazeri, O muzabibu gwa Sibima: tsisya tsitsyo tsyambuka inyanza, tsya duka kali ku inyanza ya Jazeri: mulanyi u gwiye ku makuyu gogo genyinga yoluya, noku ligesa lilyo lyamazabibu.

³³ Busangali nobuyanzi bu twulidzeywi mu mulimi gwamanga nomu kivala kya Moabu, na inze nda kaminya iwaini mu vyokumina: si ha veye na uyu u duvaga halala nelihanzuka; lihanzuka si li la hanzukwa mba.

³⁴ Kutwula ku lilira lya Heshibon kuduka Eleale, kali kuduka Jahazu va gi nganga myoyo gyavo, kutwula Zo aru kuduka Horonaim, kali kuduka Egilathushelisiya: kigira amadzi ga Nimrim ga la lekwa vutswa.

³⁵ Ka ndi nda kola a heridzwe ku Moabu, Yahova a vola, uyu u haananga hadi guluku, na uyu u vuyidzanga vimuli ku vanyasaye veve.

³⁶ Kigira yaga mwoyo gwange gu kupira Moabu lwanga kuli lilere, mwoyo gwange gu kupira avandu va Kiriheresi lwanga kuli lilere: kigira yaga ubunyingi bwa yenyolera bu goti.

³⁷ Kigira mutwe sa mulala gu gwiye nekyole, na tsinderu tsyosi tsi vegeywi: ha veye netsimbala tsyokusalagwa mu makono gosi, nevikenge vyosi vi boheywi tsingubo tsyamagunia.

³⁸ Igulu ku tsinyumba tsyosi ha Moabu noku mahasi galyo ha veye nelisyoma hosi: kigira inze mmali kwononnya Moabu kuli kiju ki ta yandzidzanga kyononnyangwa, Yahova a vola.

³⁹ Lya sasugulwa kuli ndi va kupanga tsikwili kuli ndi Moabu virana mugongo netsisoni kuli ndi ni ndiyo Moabu a la va kihenyahenye nokuhendidza vosi ava mu kumbiridza ku tsimbega.

⁴⁰ Kigira Yahova ya vola ndi: Henza, a la buluka kuli indidzu, na a nyira tsimbaha tsitsye ku Moabu.

⁴¹ Keriothu li vuguywe, netsimpinga tsi gumeywi, lidiku yilyo myoyo gya valuviriri va Moabu gyi la va kuli mwoyo gwomukali u lumangwa.

⁴² Moabu a la dividzwa ihiri i vule kuva yo kandi, kigira yekuminya ku Nyasaye.

⁴³ Ubutii, na bogo, na mutego, vi veye ku ive, O u menyanga Moabu, Yahova a vola.

⁴⁴ Uyu wirukanga ubutii a la gwa mbogo; na uyu u twulanga mbogo a la ha mbwa mmutego: kigira nda leta kuye livola li veye, ku Moabu, muhiga gwelihenzwa lilye, Yahova a vola.

⁴⁵ Yavo aviruka va singiye mu kiriri kya Heshibon, na si va veye netsingulu; kigira muliru gwa twula Heshibon, na lumemo lwomuliru lwa twula hagati ha Sihon, na lu sambi lwiga lya Moabu, na lwote lwavana vekivihiri.

⁴⁶ O bayaye ku ive Moabu avandu va Kemoshu va divi: kigira avana venyu vayai va hileywi avahambe, navakana vadikidzeywi mbuhambe.

⁴⁷ Kandi ndirannya lyadikidzwa lya Moabu mu madiku gekiheri, Yahova a vola. Likalagirwa lya Moabu li duki hano.