Jeremia 47 - KITABU KITAKATIFU

¹ Likuva lya Yahova lya duka ku Jeremia muprofeti kigira Vafilisiti, lwa Farao ya li na kikiri kukuya Gaza.

² Yahova a vola ndi: Henza, amadzi manyingi ga senukanga kutwula ku luvega lwa kasikasini, ga la gwa mugera gwokwizulira, na ga la kunika kivala nekindu sa kilala ki veye mu, lidala na vosi ava menya mulyo; avasatsa va la lira, na vosi ava menyanga mu kivala yikyo va la kupa tsikwili.

³ Kigira muliviti gweliduvaga lyetsimbagayu tsya avetsingulu veve, ku lihanga lya magari gege, ku muliviti gwetsingida tsyago, navadada si vekevuka kuhenza avana vovo kigira budedekere bwamakono gavo;

⁴ kigira lidiku yilyo lidzanga kudividza Avafilisiti vosi, kukalaga kutwulidza ku Turo na Sidont sa mulala u konyanga u tigalanga: kigira Yahova a la lanya Avafilisiti, litigala lyekisulu kya Kafitori.

⁵ Kyole ki duki ku Gaza; Ashikelon li mali ku kiring'anywa ligali, nelitigala lyelivona lyavo: u lekalaga ku duka inyinga ki?

⁶ O ive kivavi kya Yahova, u la va na madiku ganga u luhe u sose? Wevike ive mwene mu Iwula: u sose, wehodzeridze.

⁷ Ive u nyala ndi kwehodzeridza, kigira Yahova u mali kukulaga malago? Ku Ashikelon, noku luginga lwenyanza, niho ha ya laga likuva yili.